Wir Iohann von gottes gnaden Ertzbischoff zu Trier des heiligen Romischen Richs Jnn Gallien vnd durch das Kunigrich zu Arelaten Ertzkantzler vnd Churfurste Bekennen Nachdem
als nach cristi vnsers lieben hern geburt Tusend Vierhundert vnd Jn dem sechsvndachtzigsten Jaren wir von der keyserlichen maiestat vff eynen tage ghen franckfurt an den Meyne Jn etlichen
des heiligen Romischen Richs geschefften vnd nit von wegen der waele eynes Romischen konyngs gefordert daselbst vß zufelligen sachen eynen Romischen konynge zu welen guete zusyn Jn Rathe
fundenn vnd so solch waele geschehen Vnd der durchluchtigst furste here Wladislaus konyngk zu Beheym Marggraue zu Merhern tc vnser lieber herre vnd Oheym vß nit forderunge zu
solcher waele vnwillen vnd verdrieß entfangen der halben vß Jnhalt eyner verschribunge ader Priuilegiums syner liebe vorfaren konyngen zu Beheymen als Churfursten des heiligen Ro=
mischen Richs gegeben funffhundert marck goldis zufordern furgenomen Vnd so solliche marck forderunge syner liebe zu angezeygter waele nicht Jn verachtunge ader abbruche syner ko=
niglichen wirde ere vnd gerechticheid sunder alleyn vß zufelligen sachen Jn der yle beschehn auch syne liebe von dem heiligen Romischen Riche vnd vns vur eynen Churfursten vnd Ertzschencken
des heiligen Romischen Richs vur vnd vur gehalten ist vnd nach gehalten wirdet So habn wir Iohann Ertzbischoue zu Trier obgnt dem gedachten durchluchtigsten fursten hrn Wladislaen
konyng zu Beheym tc vnserm liebn Oheym auch der loblichen krone zu Beheym zu eren nutze vnd zuenthaldunge fruntlicher eintracht bewilliget Vnd vur vns vnse nakommen Ertzbischouen
zu Trier fur vnd mit wissen Jn krafft diß brieues bewillign Als der massen vnd meynonge So vnd ob hinfurt zu ewigen gezeiten eyn Romischer konyngk gewelct vnd gekoren vnd der gemlt
vnser lieber Oheym here Wladislaus konyng zu Beheym ader nachuolgende Cristliche konynge zu Beheym Darzu wie sich gebuert nicht gefordert ader geheischen wurdn Vnd wir ader vnser
nachkomen durch vns ader vnser bottschafft by solcher waele vnd Chure eyns Romischen konyngs genwertig syn Vnd sollich waele vnd Chure mit vnser ader vnser nakomene wissen vnnd
willen geschehn wurde das wir alsdan ader vnse nakomene Jn funffhundert marck goldis woun bewilligt haben vnd die Jnn dryen Jaren yedes Jares eyn dritteile dem genan vnserm
herren vnd Oheym dem konyng ader krone zu Beheym zubezaln verfallen syn Wir wolln auch das diese vnse verschribunge dem gedachten vnserm hrn vnd Oheym dem konyng
vnd der krone zu Beheym an yrer friheid Priuilegia vnd gerechticheid keynen abbruche noch vermynnerunge tun ader brengen sall Alles getruwelich vnd vngeuerlich des zu Vrkunde
haben wir vnser Jngesiegel herane tun hangen Gebenn zu Erembrenstein Am Mittwochen nach dem heiligen Valintage Jm Jare vnsers hrn Tusend Vierhundert Nuynvnd
achtzigk