Wir ludwig von gots gnaden zu Hungern beheim dalmacien Croacien (etc) kunig Marggraue zu merhern Herczog zu lucemburg vnd in Slesien
Marggraue zu lausicz (etc) Bekennen vnd thun kundt gen allermenigclich fur vnns vnnse erben vnd nachkomende kunig zu hungern vnd
Beheim das wir betracht vnd angesehen haben getrewe vleissig vnd annehme dienst So der hochgebornn vnnser Oheim vnnd oberster
haubtman der Nider slesien vnnd lieber getrewer friderich In Slesien herczog zur Lignicz Briegk (etc) offtmals vnnsen vorfarn vnd vnns
willig gethan zukunfftig thun sol vnd mag Vnd haben als ein kunig zu hungern vnd Beheim aus Behemischer kunigclicher macht
gemeltem vnnserm Oheim vnd seinen Erben alle Jre priuilegien herlicheit freyheiten gerechtigkaiten gaben vnd begnadung damit er
vnd sein erben vber sein Lanndt vnd lewte vormals von vnnsen vorfarn kunigen vnd vnns begnadet vnd befreyet auf ein
newes Confirmirt vnd bestetiget Confirmirn vnd bestetigen alle vnd yczliche gaben vnd begnadung die von vnnsen vorfarn
vnd vnns als kunigen zu hungern vnd Beheim Jme vnd sein erben gegeben vnd zugeaygent wie die namen haben mugen In alle
stucken Clausen puncten vnd artikeln als wenn sie von worte zu worte hie Jnn clerlich begrifen vnd außgedruckt Auch
Jnn aller mass wie sein vorfarn vnd Er dieselben bißhere gehabt gebraucht vnd genossen hat hiemit krefftigclig vnd volkom=
lich Jnn krafft deß vnnsers briefs Gereden vnd versprechen auch Jne vnd sein Erben bey solichem allem genedigclich zuhannt=
haben vnd schuczen alles getrewlich vnd vngeuerlich des zu vrkundt mit vnnsm kunigclichen anhangenden Insigel besigelt
Geben auf vnnserm Schlos prag dinstags nach Exaudi Nach Cristi gepurt Tausennt funffhundert Jm Zwainundzwain=
czigisten Vnnser reiche des hungerschen vnd Behemischen Jm Sibenden Jaren