Ich Peter Ratzschin von Rysenburg Ritter vnnd Jtzo der Hungarischen vnnd Behemischen Kunigklichen Maiestat c(etera) meiner Allergnedigisten frawen
Rat Bekhenn offennlich mit disem brieff fur mich vnnd all mein Erben Als die Allerdurchleuchtigist Grosmechtigist furstin vnd
fraw fraw Anna Kunigin zu hungern vnd Behem c(etera) Ertzhertzogin zu Osterreich c(etera) Marggrauin zu Merhern c(etera) mein Allergnedigiste fraw
Kunigin Mich zu Jrer Maiestat VnderCamerer der Siben stet in der Cron Behem so Jrer Maiestat als gekronndten Kunigin daselbst in Behem zugehoren vnd von
hochgedachtem derselben liebsten herrn vnd Gemahel Eingegeben worden sein verordent vnd gnedigklich angenomen hat Dergestallt das Jch be=
melter Jrer Behemischen stet Zins vnd Einkomen Jarlichs zu den verordennbten Terminen vnd fristen Einbringen vnd Empfahen vnd zu
hennden Jrer Maiestat Pfenningmaister oder Velltchandtler erlegen vnd alle Jar ordennlich verraitten Aber annder gfelt puss fenden c(etera) Extraordi=
narij Zuefennndt c(etera) Jrer Maiestat selbs hannden annttwurtten hierjnn Jch meinen pflichten nichts vorzweigen Auch in solchem Ambt allenthalben Jrer Maiestat
Nutz vnd frumen furdern vnd schaden wennden sol Jnn hallt Jrer Maiestat Bestall brieff mir deshalben verferttigt vnnd zugestelt der von wortten
zu wortten also laut Wir Anna von gots gnaden Romische zu hungern Behem Dalmacien Croacien c(etera) Kunigin
Ertzhertzogin zu Osterreich Marggrauin zu Merhern Hertzogin zu Lutzenburg vnnd in Slesien c(etera) Marggrauin zu Lausnitz c(etera) Bekhennen offen=
lich mit disem Brieff Als vnns der Durchleuchtigist Grosmechtigist furst Herr ferdinand Romischer zu hungern vnd Behem c(etera) Kunig vnnser freunt=
licher hertzgeliebter herr vnd Gemahel die Siben stet in der Cron Behem ainer Jden Kunigin daselbst in Behem zugehorig in massen die Durchleucht=
tig furstin vnnser freuntliche hertzgeliebte swester Kunigin Maria c(etera) wittib dieselben stet vor vnns aingehapt zugepellt vnd Einanttwurtten
hat lassen Das wir demnach den Gestrengen vnnsern lieben getrewen Petern Ratzschin zu Rysenburg Jtzunder Camrer derselben stet in ansehung
das Er solch Ambt hieuor bey bemelter vnnser freuntlichen lieben swester Kunigin Maria auch in verwaltung gehapt Jtz auf vnns selbs gefallen bestellt
vnd angenomen haben Thuen auch solchs hiemit wissentlich in krafft dits Brieffs Also das genannter peter Ratzschin als vnnser VnderCamerer das
Einkhomen vnnd die Zins von bemelten steten hinfuran in vnnsern namen vnd vmb vnnsers wegen Einpringen zu gepurenden fristen vnd ainer Jden
haimbsuchung vnnserm Pfenningmaister oder Velltchandtler hannden zu zwayen fristen denemblich auf Pfingsten vnnd an bemelten Zinsen auf
Liechtmessenn vnd sant Georgen tag damits gefallen vnnd den vberschus was an sant Gallen vnd sant Martins Zinsen zu gantz vnd volliger bezalung
bemelts vnnsers Einkomens noch geben werden sol auf weyhennachten darnach Jarlichs vnd ainer Jden Jars besonnder auf bemelts vnnsers
Pfenningmaisters oder Velltchandtlers gepurliche quittung in guter Lanndtsweriger muntz raichend bezalen vnnd alle Jar ordennliche Raittung
daruon Aber sonnst alle anndere Extraordinarien Gefell vnd pussen Jder zeit vnns anzaigen in solchem pey seiner pflicht nichts verschweigen vnd
allain zu vnnsern hannden Einpringen vnd annttwurtten Inndem Nutz vnd frumen allenthalben furdern schaden wennden vnnd hieuon vnnserer
Obrigkeit nichts enttziehen lassen Auch sonnst allermassen thuen soll was ain getrewer Diener vnd Ambtman seinem herrn vnd frawen
Zuthuen schuldig in massen Er deß gegen vnns Jnn hallt seiner Reuers verschriben vnd verpflicht ist Darjntgegen haben wir Jm Jarlichs
zu Besoldung bemelts Ambts Zwaigundert schockh von den Einkomen bemelter stet volgen zulassen vnnd wann Er zu vnns an den hof erfordert vnd
komett wirdt das wir Jm von haußauß auf die anzal pferdt mit wieuilen Er vmb vnns erfordert wirdt auf ain Jedes pferdt ain monat sechs gulden
Reinisz Jtz vnder anhaim in sein hauß zugeben bewilligt Allergnedigklist vnd vngewerdt Mit vrkhundt dits Brieffs mit vnnserem
hiefurgedruckhtem secret verferttigt Vergeben ist an deß hailigen Ritters sant Georgen tag Anno d(omi)ni Tausenndt funffhundert vnd in dem
ainvnddreissigisten Das demnach Jch obbemelter Peter Ratzschin hochgedachter meiner Allergnedigisten frawen Kunigin mit geschwor=
nem ayd wie sich gepurt zugesagt versprochen vnd gelobt hab zusag versprich vnd gelob auch hiemit wissentlich in krafft dits Brieffs fur
mich vnd all mein Erben pey meinen waren trewen vnd Eeren Allain dem Jnen so bemelter mein Bestallbrieff Jnnhelt vnd vermag gehor=
samlich nachzukomen vnd zugeleben hochbemelter meiner Allergnedigisten frawen Nutz vnd frumen zufurdern schaden zuwennden von
derselben Jrer Maiestat Einkomen Obrigkeit gerechtigkait vnd was sonnst zu bemelten Siben steten gehorig mit meinem wissen gentzlichs
nichts entziehen zulassen vnd alles das zuthuen was getrewer Ambtman vnd diener seinem herrn vnd frawen zuthuen schuldig ist
welchs alles Jch mich also hiemit als das am aller hochsten krafft vnd macht haben kan c(etera) vnd mag gentzlich vnd on alle geferliche außredt
allerweil mir obbemelt vnderCamerer Ambt von gedachter meiner Allergnedigisten frawen Kunigin zuuerwarn vnd Jnnzuhaben
vertraut wirdt welches doch allzeit zu Jrer Maiestat gnedigem gefallen steen soll ratt vnd vnherwogen zuhallten vnd in kainem punct oder
Artickhl darwider zuhanndlen obligier vnd verpflicht Alles treulich vnd ongeuerde Mit vrkhundt dits Brieffs mit meinem fur=
gedruckhtem Jnnßigl vnd aigen vnderzaichnumbz hanndtschrifft verferttigt Vergeben ist an deß hailigen Ritters sant Georgen tag
Anno d(omi)ni Tausenndt funffhundert vnd in dem ainvnddreissigisten
Peter Ratzschin
von Rysenburg m(anu) p(ropria)