Ich adam Gyller vonn petersdorff Ritter auff Gyllerstein vnnd Trautenaw etc(etera) Bekenne vnd thue kunth myt dysem brieffe
vor allermenigklichen der yn horen oder lesen das ich den hamer zu petersdorff gelegen mit sampt dem geholcze das ich do gefunden habe
verkaufft habe dem vorsichtigen hamer meyster matz hempeln von Langenaw vnd sein erben mit allem recht vnd gerechtigkait
die de hamer zu recht haben zu besiczen mit freyen strowmen vnd brewen der auff vnd abcz ein freie mule mach bawen
vnd wen der hamer meyster koczmalz brewen das er dem hern der von geben sol oder der herschafft ein halbscheffel malz
vnd sol haben freie graben freie schicz teich freie wege vnd stege vnd freie teich do selbest vnd backen pfarhen vnd alle handt
werge das ein meyster gebrauchen die er bedarfft zu seynem hamer vnd nittorfft allenthalben wie die hamer zu Bohemen
zu recht haben vnd das er auch mochte pechen steine suchen vnd gebrauchen zu seiner nottdorfft auff alle meyne grunde dieweil
habe mit meyner pflicht gemach zu Trautenaw zu kundig aus genume rognitz auch freye weide sol er haben zu sey(n)
ner notdorfft freie iaget vnd wen er ein groß wilt schleget sol er der herschafft ein hinder firtel do von geben vnd hasen vnnd
ander klein wilt sol der meyster freie haben sie sollen ym zu furen auch vngehindert seyn kauff salcz von sie wollen vmb
sein geldt was er bedarfft vnd habe im auch den teich verkaufft ein stuck wasser obigk petersdorff gelegen vnd vnder peters(dorff)
dorff zu dem selbigen petersdorff wasser genant sol er frey fischen haben bys yn die aue an den mitwoch vnd freytage
vor mittage wie es vor Trautenaw stadt leute fischen ynder aue vnd dasselbige habe ich ym verkaufft vmb funffczig schogk meiss(nisch)
inczer zal vnd er sol es also behalten auff recht Erbe Ierigen sol er geben ein schogk meissnisch vnd fur alle Iare Ierigen sol er
geben ij schogk meissnisch als lange bis er bezalt ein solchs Summa geldis vnd als ein Ierling sol er der herschafft zinsen der
von iij schogk meissnisch vnd ein schar vnd ein foge vnd dasselbige geteilet das er sol geben auff sanct Gallen ander halbschogk
vnd eyn foge vnd auff sanct Ierigen ander halbschogk vnd eyn schar vnd zun selczen zinsen habe ich ym freye zugesagen das er sie
nicht geben darff byß vber drey Iar noch datto dyß brieffes auff sanct galle dernoch sol er anheben zu zinsen vnd fort
wie oben geschreben vnd sol auch volkome haben der hamer meyster mehr erbe gutter haben do selbest zu dem hamer ym
striffen vnnd welchs er ym wirt striffen vnd zu ym brenge die selbige felder vor zinsen vor geben dem herschafft was die
getaner haben der vor geben neben dem vorigen oben geschriebene zinsen vnd des zu vrkundt vnd besser bestetunge vnd
haldunge dem genanten matz hempeln vnnd sein erben vnd noch komlingen habe ich meyn angeboren Sigel wissent
lich zu dysem brieffe dencken lassen vnd des zu besserem gedechtnis habe ich die edle Ernueste hern Iacob kussitz
von kussitz auff kczelsdorff gesessen vnd hern andreas pederitzki von pederitzki vnd zun hoste das sie haben ire sigel neben
meynem zu beczeugunge yn anhangen vnd yren erben zu diesem brieffe dencken lassen der do gegeben yst vnd geschrieben yst
Sontagk noch Iohannis dem Tauffer Im xxxiiij Iare der myner tzal