Wir die von Herrn Ritterschafft prager und annder bey steten des Kunigreichs Beheim bekennen. Nachdeme der Romischen zu Hungern und Beheim Kuniglichen Mt. unserm allergnedigsten Herren durch weylendt den hochgebornen fursten und Herren Herren Karoly Hertzogen zu Munsterberg als gewesten lanndtshaubtman Im furstentumb ober und nider slesien und die andernn dore In g zuegeordenten Rechtsprecher des Kuniglichen hofs zu Preslaa auf begerenn des hochgebornen fursten und hern hern georgen Marggrafen zu Branndenburg et(c) vor schiner zeit ein vorchundung zu kumen der inhalt wie der Her Marggraf von dem wolgebornen hern hern Han von pernstain als vatterlichen vormundt des Jung hertzogen zu Teschen von wegen zwainzig tausent guldin ungerischs haubtsuma und sechs tausent guldin schaden oder Expens so der her marggraf vermug aines vortrags mit weylendt den hochgebornen fursten und hern herrn Casimirn Hertzogen zu Teschen und fridrichen Hertzogen zu lignitz von wegen der furstentumb Opl und Ratibor aufgericht im schuldig sein solle fur dem fursten Obergericht zu Presla mit recht furgenomen und betragt sey vermug die lading darumb ausgangen wie dann solches merers Inhalts die denunciation Cleerlich mit sich bringt derhalben sich der Her Marggraf von hochgedacht Kunigl. Mt. aines vortrags zu prag aufgericht im rechten zusteer inen begeret aus wellicher verkundung Cleerlich abzunemen das des furstentumb slesi vorhaben ist das hochgedachte Ko. Mt. et(c) vor dem Oberfurstenrecht in slesien diser sachen halben zerecht steen solle des aber ansechlich und enmitl wider der Cron beheim treffentlichen Privilegia welliche nit ausgedenktn worten ordnen und wollen das ein kunig zu Beheim auch alle der Cron beheim undertan von dem wenigsten bis zu dem maist und dem maist bis auf den wenigsten es sey in waserley sachenn es wolle nindtert anderswo zerecht steen sollen dan fur dem Kuniglichen stuel zu prag. Das wir demnach in disem faal zu unsern volmechtigen gwalthabernn und anwalden gesatzt und geordnet setzen und ordnen auch hie hiemit wissentlich in Craft ditz briefs in der allerbesten mas und form wie es vor ainer ieder Obrikeit und sunderlich fur dissem Ober furstenrecht in slesi und in disser hanndlung am Crefftigsten und bestendigsten sein mag. den wolgebornen hern hern Sebastian hern von der waytmuel auf Chomutaw und den Edlen und gestrengen hern Georgen zu suschkin und auch widermumb zu underenthe erlanbt wolten haben der Cron beheim privilegia so des wie oben dauon gemeldet vermugen sollen furbringen und defendiern und das furstentumb slesi dehin freuntlichen zutermanen und zuweisen das sie der Cron beheim in Iren privilegien nit Irrung thuen wellen sunder nit mer sunder sam hie und dise handlung die weil es ein Kunig zu Beheim berurt fur dem Kuniglichen stuel zu prag da sie billichen hin gehoret zu Remittiern begeren und in summa alles hierinnen handlen sollen und mugen das die notdurft erfordert und wir selbs handlen mochtenn des wir unns der pilligkait nach in bedennkung der Cron Beheim des halben privilegien bei dem furstentumb slesi gantz unabsgeschlagen versehen. Und was sie also von unsern wegen zu bestattung und erhaltung der Cron Beheim privilegien in disser hanndlung furnemen oder handlen das ist alles unser guetter will und wolgefallen. Es sol inen auch hierinnen so vil glauben geben werden als begreiffen notdurftig sein wurd ann den wollen wir inen hiemit also creftig geben haben als wan er von wort zu wort mit allen Clausen und puncten hierinnen geschriben stundt. Alles trewlich und ungeuerlich und umb merer gezeugnus willen besigelt mit gemaines landts anhangenden Insigell. Geben auf dem Pragerschen sloss den vierundzwainzigistn tag des monats septembris Im funftzehenhundert und virzigistn Jare