Wir Heynrich Burgraue von Lyznik. Tun wizzlich alle den dy dysen Brif sehen adir horen lesen. Daz wir mit vordedachtem
mu(o)te vn(d) mit rate vnser(er) fru(n)de vn(d) vnser(er) Manne vorkoufet haben. vnser(e)m lybe(n) Omen h(er)n Thymen von Colditz vn(d)
sinen Erben. vnser Gerichte daz wir gehat haben vf sime Gute. vn(d) allerley Recht daz wir dar an gehat habe(n) in Dorffen
vn(d) uf den Velden. an Wysen. an wazzere. an Holzte vn(d) an al deme daz da zu(o) geho(e)rt. vm(b) Zwey Hundert Schok. Breyter prag(er)
silber phenninge. Dyz sint dy Dorffere. da wir ym vnser Gerichte an vorkouft haben. Wenyngen demuch. Colmen. Podelot. Ma
sebawitz. Thamendorff. Loffenmu(e)l mit den Ekkern dy da zu(o) geho(e)rt. Komachow. Caldenby. Zchyrlin. Scarpelow. vn(d) da selbes zu(o)
Scarpelow hab(en) wir ym ouch vorkouft. Dry Husen vn(d) sy(m)dhalp schilling tynses mit Gerichte vn(d) mit alle(m) rechte als wir ez ge
hat habe(n) vn(d) dy yene von vns zu(o) lene gehat habe(n) der daz Gut ist. Was ab(er) daz and(er) Gute ist zu(o) scarpelow. daz man von
vns(er)m Omen h(er)n Thymen zu(o) lene hat gehabet. da hab(en) wir ym ouch daz Gerichte an vorkoufet an al den daz da zu(o) geho(e)rt
Wir globe(n) ouch. vns(er)m libe(n) Omen h(er)n Thymen von Colditz. vn(d) sinen Erben by gute(n) tru(e)we(n). an argelist daz wir sy an de(m)
vorgenante(m) Gute. vn(d) Gerichte nymm(er) gehindern wolle(n) vn(d) vorzigen vns. slechtes alles des Rechtyn daz wir an dem
vorgenante(m) Gute gehat habe(n). Wir bekenen ouch offenlich an disem briue. daz dy Bach dy da fluzet in dem Grunde
hinder Brefen Husz. von der stat da der Gebur. Gut an tryt. von Busewitz vn(d) von Musleitz bys in dy Muldaw. sal
vns(er) beyder Markscheydunge sin. an vns(er) beyder Gerichte. vn(d) dy selbe Bach sal vns(er) beyder sin. Der Berk d(er) da heyset
Loffenstein. mit d(er) Lyten dy da zu(o) geho(e)rt. vn(d) dy Lyte dy zu(o) der Loffenmu(e)l geho(e)rt. da behalde(n) wir vnser Gerichte
an. vn(d) vnser Ome h(er)r Thyme von Colditz vn(d) sine Erbe ir len vn(d) ir Recht. Vnd daz wazzer daz vs d(er) vorgenan
ten Bach fluzet uf dy mu(e)l daz sal ouch vnser beyder sin. en der wyse. daz dy Loffenmu(e)l. von vns(er) wegen vngehin
dert blibe von dem wazzer. Daz wir dise rede stete vn(d) gantz von worte zu(o) worte. an alle argelist halden. des Zenge
wir vnser Ingesigel. zu(o) orkunde an dysen Brif. Dute rede vn(d) dyz Briues sint getug(e). vns(er) lib(er) Brud(er) h(er)r albrecht
der Tu(m)probst zu(o) misne. vns(er) libe(n) Ohe(m) Heydenrich von dem Buse. vns(er) Brud(er) h(er)r H(er)man d(er) Crucig(er). vns(er) Bruder
h(er)r albrecht d(er) elder von lyznik. vns(er) Ohe(m) h(er)r albrecht vn(d) Meynh(er)r Hunde von lyznik. vns(er) man. H(er)man von lymptub
H(er)man von Droyntitz. Syfrid von Barhawitz. Nykkel von penpitz. Apitz von Borthtewitz. vn(d) ander vns(er) bider lute dy
da by gewest sin. Diser brif ist gegebe(n) zu(o) lyznik. als man Zcelt von Gotes geburt. Drizen Hundert Jar. in dem
viertzigeste(m) Jare. dar nach an sente Mathyas tage. des Heyligen Zwelfboten.