Wir Rudolff der Annder von Gottes genaden Erwelter Römischer Kayser
zu allen zeitten Merer des Reichs in Germanien zu Hungarn Behaimb Dalmatien Croatien vnnd Sclauonien etc(etera) Künig Ertzhertzog zu Osterreich Hertzog zu Burgundi zu Brabannd zu Steyer zu Kärndten zu Crain zu Lützenburg zu Würtemburg Ober vnnd Nider Schlesien
Fürst zu Schwaben Marggraff des Hailigen Römischen Reichs zu Burgaw zu Mährern zu Ober vnnd Nider Laußnitz Gefürsteter Graff zu Habspurg zu Tirol zu Pffirt zu Kyburg vnnd zu Görtz Lanndgraff in Elsaß Herr auf der Windischen Marck zu Portenaw vnnd zu Salins etc(etera)
Bekhennen offentlich mit disem Brieff vnnd thun khundt allermeniglich Das vns der Ersam vnser vnnd des Reichs lieber getrewer Hanns Schickh für sich vnnd von wegen seiner Ehelich(en) Haußfrawen Anna geborner vonn ~Schönaw~ vnnd irer baider Erben vnnd Nachkhomen
ain Kauffbrieff so inen von dem Edlen vnserem vnnd des Reichs lieben getrewen Hannsen vonn ~Schönaw~ zu ~Schönaw~ vmb das Schloß vnnd Dorff ~Schönaw~ mit allen seinen zugehörungen gethan vnnd auffgericht worden ist fürbracht vnnd vns demütiglich gebetten
das wir inen denselben Kauffbrieff gnediglich confirmieren vnnd bestetigen wolten Welcher Kauffbrieff von wortt zu wortt also lauttet Ich Hanns vonn ~Schönaw~ zu ~Schönaw~ Bekhenn offentlich mit disem Brieff vnnd thun khundt allermeniglich Das ich mit
wolbedachtem muth guttem zeitigem rath vnnd rechtem wissen für mich meine Erben vnnd Nachkhomen dem Ersamen Hannsen Schickhen vnnd seiner Ehelich(en) Haußfrawen Anna geborner vonn ~Schönaw~ vnnd iren baiden Erben vnnd Nachkhomen
mein Schloß vnnd Dorff ~Schönaw~ mit allen seinen zugehörungen Rechten vnnd gerechtigkhaiten wie ich dasselb bißher ingehabt vnnd besessen hab vmb ain benante Summa Gelts nemblich vmb Tausent Gulden Rheinisch die mir der obgenant Hanns Schickh
vnnd sein Ehelich(e) Haußfraw Anna geborne vonn ~Schönaw~ bar bezalt vnnd erlegt haben recht vnnd redlich verkaufft vnnd zu khauffen geben hab vnnd verkauff inen dasselb Schloß vnnd Dorff ~Schönaw~ mit allen seinen zugehörungen Rechten vnnd gerechtigkhaiten
wie obgemelt in crafft diß Brieffs also das sy vnnd ire Erben vnnd Nachkhomen dasselb Schloß vnnd Dorff ~Schönaw~ mit allen seinen zugehörungen Rechten vnnd gerechtigkhaiten wie obgemelt nun hinfüran ewiglich innhaben nützen niessen vnnd gebrauchen
sollen vnnd mögen als ir aigen gut vnnd erbschafft vnnd ich oder meine Erben vnnd Nachkhomen sy oder ire Erben vnnd Nachkhomen daran nit irren noch betrüben sollen noch wöllen in khain weiß noch weg vnnd des zu warurkhundt hab ich mein
angeborn Insigel an disen Brieff gehennckht der geben ist zu ~Schönaw~ an Sanndt ~Martins~ tag Anno Domini Tausent Fünffhundert vnnd im Acht vnnd Sibentzigisten Jare Wann wir nun den obgemelten Kauffbrieff vnnd alles was darinn
begriffen ist gnediglich angesehen vnnd erwogen haben wir denselben Kauffbrieff vnnd alles was darinn begriffen ist gnediglich confirmirt vnnd bestetigt confirmieren vnnd bestetigen inen denselben auch hiemit wissentlich in crafft diß Brieffs
also das sy vnnd ire Erben vnnd Nachkhomen denselben Kauffbrieff vnnd alles was darinn begriffen ist nun hinfüran ewiglich innhaben nützen niessen vnnd gebrauchen sollen vnnd mögen als ir aigen gut vnnd erbschafft vnnd wir oder vnsere
Nachkhomen am Reich sy oder ire Erben vnnd Nachkhomen daran nit irren noch betrüben sollen noch wöllen in khain weiß noch weg vnnd gebieten darauff allen vnnd yeden vnsern vnnd des Reichs Churfürsten Fürsten Gaistlichen vnnd Weltlichen
Prelaten Graffen Freyen Herren Rittern Knechten Landtvögten Hauptleutten Vitzdomben Vögten Pflegern Verwesern Ambtleutten Schultheissen Burgarmaistern Richtern Räthen Burgern vnnd Gemainden vnnd sonst allen andern vnsern vnnd des Reichs
Underthanen vnnd Getrewen in was wirden standt oder wesen die sein ernstlich vnnd vestiglich mit disem Brieff vnnd wöllen das sy den obgenanten Hannsen Schickhen vnnd sein Ehelich(e) Haußfrawen Anna geborne vonn ~Schönaw~ vnnd ire baider Erben vnnd Nachkhomen
an diser vnserer Confirmation vnnd Bestetigung nit irren noch betrüben sonder sy darbey gerüwiglich bleiben vnnd sy der gnediglich geniessen lassen bey vnserm vnnd des Reichs schweren vngnad vnnd straff vnnd darzu ainer peen nemblich
Zehn Marckh lötigs Golts die ain yeder so offt er freuentlich hierwider thett vns vnnd dem Reich in vnser Camer die annder halbtail aber den obgenanten Hannsen Schickhen vnnd seiner Ehelich(en) Haußfrawen Anna geborner vonn ~Schönaw~ vnnd iren baiden Erben vnnd Nachkhomen
unabläßlich zu bezalen verfallen sein sol Doch vns vnnd dem Reich an vnsern vnnd des Reichs Rechten vnnd gerechtigkhaiten vnnd sonst meniglich an seinen Rechten vnschedlich vnnd vnuergriffen Mit vrkhundt diß Brieffs besigelt mit vnserm
Kayserlichen anhangenden Insigel Geben in vnserer Statt Prag den Fünfften tag des Monats Decembris Anno Domini Tausent Fünffhundert vnnd im Acht vnnd Sibentzigisten vnserer Reiche des Römischen im Viertten des Hungerischen im Sibenden vnnd des Behaimbschen im Viertten Jare
Ad mandatum Sac(rae) Cae(sareae) Ma(ies)t(a)t(is) proprium
~Mathias~ ~Zündt~