Wir Rudolff der Ander von Gottes genaden erwelter Römischer Kaiser zu allen zeitten
Mehrer des Reichs In Germanien In Hungern Behaimb Dalmatien Croatien (et)c(etera) khünig Ertzherzog zu Osterreich Marggraff zu Mährern Herzog zu Lützemburg und In Schlesien Marggraf zu Lau=
sitz Bekhennen offentlich mit disem brieff thuen khundt menniglich, Das unns die ersamen unnser liebe getreuen N. Burgermaister unnd Rathmannen der Stadt Teschin gen gehorsamblich angenüft
unnd gebetten haben, Das wir Inen alle unnd Iegliche Ire brieff Priuilegia Recht unnd gerechtigkhaitten unnd guette gewonheitten, die sy von unnsern vorfarn khünigen zu Behaimb unnd andern
Iren herrn redlich erlangt unnd hergebracht haben, auch Inen von Weylandt unnserem geliebten Herrn Vatter Kayser Maximiliän hochloblicher unnd seligister gedächtnus Confirmirt unnd
bestettigt sein, gleich falß gnedigclich zuuerneuern unnd zu Confirmiren geruehen wolten, Als haben wir angesehn Ir zimblich pitt unnd Inen darauff solche Ire brieff Priuilegia
Recht gerechtigkhaitten unnd guette gewonheitten, die sy wie gemelt von unnsern vorfarn khünigen zu Behaimb unnd anndern Iren herrn, sonderlich von Weylandt Burggraf Hannußen, uber das
Pierpreuen, Mältzmachen unnd annders Redlich erworben unnd hergebracht haben, in allen Iren Puncten, Articlen unnd mainungen, alß ob die von wort zu wort hierinnen begriffen, Iellerma=ßen
unnd gestalt wie Inen dieselben von hochgemeltem unnsern geliebten herrn unnd Vattern bestettigt sein, gleichfalß Confirmirt bestettigt unnd becrefftigt, Vernewern bestettigen be=
crefftigen unnd Confirmiren Inen die hiemit auß Regierender Behaimischer Khüniglicher macht in crafft diß briefs was wir Inen daran von Rechts oder gewonhait
wegen bestettigen sollen unnd mügen, Unnd gebietten darauff allen unnd Ieden unnsern underthenen, was hohes oder Nidern Standts ambts oder wes unns die sein, ernst=
lich unnd Vesteclich mit disem brieff unnd wellen, das sy die obgemelte Burgermaister unnd Rathmannen der Stadt Teschin gen an solchen Iren brieffen Priuilegien Rechten gerechtig=
khaitten unnd guetten gewonheitten auch diser unnser Confirmation nicht hindern, noch Irren oder das Iemanden andern zuthuen gestatten, In khaine weiß noch wege, Sonnder sy
dabey hanndthaben, schutzen, schirmen unnd gebrauchen bleiben lassen, Alß lieb ainem Ieden sey unnser swere straff unnd ungenad zuuermeiden, Das unns an unnsern diensten
gehorsamb unnd Rechten menniglichs unschad ohne fahr, Zu urkhundt diß briefs besigelt mit unnserm Kayserlichen anhangenden Insigel. Geben
auff unnserm Khüniglichen Schloß Prag den Siebenzehenden Tag des Monats Februarij, Nach Christi unnsers lieben herrn unnd seligmachers geburt, Im Funfftzehenhundert
unnd ain unnd achtzigisten, Unnserer Reiche des Römischen im Zehenden, des Hungerischen im dreyzehenden, Unnd des Behaimischen auch im Zehenden /.