Zů wissen vndt kůndt sey hiemit allen vndt Ider menniglichen denen dieser kauffbrieff zů
sehen, oder lesen vorkombt, das Ich Lieborius Roggen zů Berckungen Im Ambt Scharffenstein wonende wolbedechtig verkaufft vnnde zů kaufft gegebenn
hab, dritthallb hůefft weniger eines Ackers vnnde ein viertell vonn einem Acker, Erbhafftiges Landes, vnnde wiesen wachs, Inn der weißunge Biyenro
da gelegenn, dem Gestrengenn Edlenn vnnde Ernuestenn Lippoldt vonn Stralendorff Chůrf(ürstlicher) M(ajestä)t Raht vnnde Gemeinenn Oberambtman des Eichsfeldes, Meinem
gepietendem Herren vnnde Liebem Jůncker, Nemlich Iglichenn Acker vor Sechs gůtter ganckhafftiger thaler groschen, der ein Ider zů vier vnnde zwantzig gr(oschen)
gerechnet vnnde gezalt worden, thůt die gantze Sůmma, vier hůndert, zwey vnnde viertzigk thaler zwelff groschen, Weill aber hiebeuor zwischen wolermeltem Hern
Oberambtman, vnnde mihr, vmb vier Acker wiesen wachs hůnder der Münchmůllen gelegenn, so Ierlich dem Ambt Herborgk ~nur~ vier gůlden verdinst, ein dausch
gehalten, Also das Ich obereuenden vier Acker wiesen, inn meinen Nůtz bekommen, vnnde noch zů gebrauchenn hab, des ist an obengemelter kauff Sůmma
vonn Ihr W(ürden) G(estrengen) vier vnnde zwantzigk thaler, mir innebehalten vnnde abgezogen worden, Iedoch mitt solcher vorwilligung vnnde Außtrůckeligem Vorbehalt
So mihr oder Meinen Erben die vier Acker wiesen wachs, vmb gemelten zinns vber kůrtz oder langk nicht konnen gelasen werden, das als dan der Herr Ober
Ambtmann oder Ihr W(ürden) G(estrengen) Erben, Mir oder Meinen Erben, obge~melte~ vier vnnde zwantzigk thaler als dann sonder einig weigerung nochmals bezalen sollen vnnde
wollenn. Weill Aůch mehr vnnde offt ermelter Herr Oberambtman, die ab mihr gedauschte vier Acker wiesen wachs in Biyenroda, Etliche Iar
zů einem deich gebrauchet, Als ist vorwilligt, das der Ierlich bedagte zinns daruonn, seith es Ihr W(ürden) G(estrengen) genůtzet, mir weniger als nichtes zů schaden gehen sollen,
sonder Iderzeitt Ihr W(ürden) G(estrengen) biß denn vonn Bůltzingßleben, mich schadelos halten vnnde benemen wollenn. Anlangende aber die nachstendige kauff Sůmma,
Als vierhůndert, Achtzehen thaler, zwelff groschen, sint mir also baldt, ann einer vnßertrenen Sůmma, mitt ganckhafftiger Můntz zů gůttem danck richtig vnnde woll
bezalet worden. Derowegen Ich Lieborius Rogge, vor mich, vnndt meine Erben, mehr vnnde wolermeltem Herrn Oberambtman vnnde Ihr W(ürden) G(estrengen)
Erben, solcher kauff Sůmma ein krafft dieses loeß, qůitt, ledig vnnde loß sagen thů, Aůch darůff obalt Ihr W(ürden) G(estrengen) solchs landtgůt eingenůmet vnnde vberlasenn
Vorbehaltelich aber, das ich die Ietzt abtretende außgesehete winter vnnde sůmmer frucht Inn gleichnůs dem wiesenwachs zů hawen vnnde grůnnen dis vier vndt
Neůntzigste Iahr, vor mich zů nůtzenn vnndt Zůgebrauchen hab, Dargegen Ich solche endt~ernd~ vnnde wiesenwachs, mitt zinsenn vnndt Ander vnpflicht was da
rum, dis Iahr darauff gehet, ver sehen vnnde verrichten will. Da denn alles zů steter, vester haltung, vnndt zů vnderhendter vnndt zeůgen hierůber be
růffenn, die Erbarn ampt Henrich Weibing zů Kalmeroda, vnndt Biorgen Laderwalde zů Berckungen, vnndt zů mehrer beglaubigung, haben beyde der Herr Ober
Ambtman, Als keůffer, vnndt Lieborius Rogge der verkeůffer, denn Erbaren vnndt Achtparn Kennert vonn Hoxen, Ietziger zeitt Schůltheis inn Heyligenstadt, Ersůcht
vnndt gebetten, das er sein gewonlich Ambtssigell zů endt dieser kauffbrieffe, deren zwey gleich lautendt, vnndt Einer handt schrifft vorverttiget, hengen wolle,
Welches ich gedachter Schůltheis, aůff begerenn vnndt bitte, Als wissentlich gethann, hiemitt bekenn, Iedoch mir, meinem Ambt vnndt Erben, In Allwege
ohne schadenn, Geschehen denn 23. Monats tag May. Im Iahr Christi Ein dausent, fůnff hůndert, Neůntzig vnndt vier.