Wir Ferdinand der Dritte, von Gottes gnaden Erwehlter Römischer Kaiser, zue allen
zeithen mehrer des Reichs in Germanien, zue Hungarn, Behemb, Dalmatien, Croatien, vnd Sclauonien König (etc.) Ertzhertzog zue Osterreich, Marggraff zue Mähren, Her=
tzog zue Lützenburg vnd in Schlesien, Vnd Marggraff zue Laußnitz. Bekhennen offentlich mit disem Brieff, vnd thuen khundt allermänniglich, wie woll Wir auß Kaiserlicher vnd Königlicher hoheit vnd
Würde, darein Vnß Gott der allmächtige gesetzt, auch angebörner guette Vnd Mildigkeit iederzeit genaigt sein, aller vnd ieder Vnserer getreuen vnd gehorsamben Vnterthanen, Ehr, Nutz, auffnehmen vnd bestes zue
bedrachten, vnd zue befördern, So sind Wir doch billig mehr bewogen, die ienige welche Vnß, vnd Vnserm hochlöblichen Ertzhauß Osterreich, vor andern mit stetten, getreuen, vnd gehorsamben diensten thätig vnd
lich anhengig Vnd verwandt sein, mit sonderlichen Kaiserlichen vnd Königlichen gnaden, Ehren, vnd Würden zue bedenckhen. Wan Wir dan gnedigist angesehen, wargenomben Vnd betracht, die sonder=
bahre guete qualiteten Vernunfft, vnd geschickligkeit, darmit vor Vnserer Kaiserlicher Vnd Königlicher Person, der Ehrnueste Vnser lieber getreuer Johann Cometa berüemet worden, wie auch zue
Kaiserlicher Vnd Königlicher gemüeth getzogen, die getreue, embßige, gehorsambe, Vnd ersprießliche dienst, so Vnß, vnd Vnserm hochlöblichen Ertzhauß Osterreich in Vnterschiedlichen Occasionen, inson=
derheit aber in deme schon Viel Jahr hero getragenen, Vnd dato noch tragendem Primatoris ambt zue Budweiß, gantz Vnverdrossen erzaigt, Vnd geleistet hat, dieselbe auch Vnserm gnedigisten Wohl=
gefallen nach, weitter fortzusetzen, Vnd hinführo nicht weniger müglichesten fleißes zue thuen gehorsambist Vrböttig ist, solches auch woll thuen khan, soll, vnd mag. Hierumben so haben Wir mit wollbe=
dachtem Mueth, guettem zeitlichen Rath, vnd rechtem Wissen, obbemelten Johann Cometa zue Vnserm Kaiserlichen, Vnd Königlichen Rath, gnedigist gewürdiget, an: Vnd auffgenomben; nehmen auf,
vnd würdigen ihme darzue hiemit wissentlich, vnd Krafft diß brieffs, mainen, setzen, vnd wollen, daß Er nun hinführo Vnser Rath sein, von männiglich darfür gehalten, erkennet, geehret, ge=
nandt, Vnd ihme solcher Titl, auß allen Vnsern Cantzleyen, Vnd sonsten von männiglich gegeben, vnd geschrieben werde. darzue auch alle vnd iegliche Ehr, Würde, Vortheil, freyheit, vnd gerechtigkhait
wie andere Vnsere Kaiserliche vnd Königliche Räth haben, sich deren erfreuen, gebrauchen vnd geniesen solle vnd möge, von männiglich ungehindert: Doch solle Er dargegen Vnsere gehaimb, die ihme
anvertrauet werden, biß in seinen Todt Verschweigen, auch in sachen Vnd geschefften, in welchen Wir Ihne ferner gebrauchen werden, Vnß seinem guetten Verstandt nach, daß beste einrathen, Vnsern
nutz, vnd fromben zue befördern, allen schaden, vnd nachtheil zue wenden, zue warnen, vnd zue Verhüeten schuldig sein, auch sonsten ins gemein alles anders thuen vnd lassen, waß ainem getreuen Vn=
terthan gegen seinem Herren zue thuen gebühret, vnd geziemet, massen dan Vnser gnedigistes Vertrauen in seine Person gestellet ist. Zue Vrkundt dieß Brieffs Besigelt mit Vnserm Kaiserlichen
Vnd Königlichen anhangenden grössern Insigl, der geben ist zue Ebersdorff den Vierten Monats tag Septembris, im Sechtzehenhundert drey vnd Viertzigisten, Vnserer Reiche des Römischen im Siebenden,
des Hungarischen im achtzehenden, Vnd des Böhaimbischen im Sechtzehenden. Jahr.
Ferdinand
Georgius Comes de Martinitz
R(egni) Boh(emiae) Cancellarius.
Albrecht von Kolowratt
Titl von Vnser, Cometa Primator zue Budweiß. (etc.)