Wir Leopold von Gottes gnaden Erwöhlter Römischer Kaiser zu
allen zeitten Mehrer deß Reichs in Germanien, zu Hungarn, Böheimb, Dalmatien, Croatien vnd Sclauonien König, Ertzhertzog zu Osterreich, Marg
graff zu Mähren, Hertzog zu Lutzenburg vnd in Schlesien, vnd Marggraff zu Laußnitz. Bekennen offentlich mit diesem Brieff, vnd thuen kundt Jedermenniglich. Wiewohl Wir auß
Römischer Kayser: vnd Königlicher Würde, darein Vnß der Allerhöchste gesetzt, auch angeborener güete vnd mildegkeit Jederzeit geneigt seindt, aller vnd Jeder Vnserer gehorsamben vnd getrewen
Vnderthanen Ehr, Nutz, auffnehmen vnd bestes zu betrachten vnd zuförderen: So seindt Wir doch billig mehrers gewogen, die Jenigen, welche Vnß, vnd Vnserm Ertzhauß Osterreich vor
Andern, mit stätter getrewer vnd gehorsamber dienstbarkeit anhengig vnnd verwandt sein, mit sondern Ehren, Würden vnd Gnaden zubedencken. Wann Wir dann gnedigist
angesehen, wahrgenommen vnd betrachthet haben, die sondere güete Qualiteten, Tugent, Vernunfft vnd geschickligkeit, worinnen Vnß der Wohlgeborne, Vnser Lieber getrewer Nicolaus
Ignatius von Osterhauß, auff Mistliboritz, vnd New Syrowitz berüembet worden, Insonderheit aber, die getrewe, rastlose, fleißige, gehorsambe vnnd willigste dienste, so Vnß vnd Vnserm
Ertzhauß Osterreich seine VorEltern, insonderheit sein Vatter in seinem ob sich gehabten LandtRechts Beysitzer Ambt in Vnserm ErbMarggraffthumb Mähren, vnd in die drey vnd zwan
zig Jahr verwaltteten Znaÿmbischen Craÿßhaubtmannschafft geleistet, dergleichen Haubtmannschafft besagter Freyherr von Osterhauß in vorerholtem Znaÿmber Craÿß, auch in das Neün
te Jahr seinem besten vermögen nach vorsehen, vnnd sich hierdurch zu weitterer beförderung meritirt gemacht; Alß haben Wir mit wohlbedachtem Mueth, guetem Rath vnd
rechtem wissen, gedachten Nicolaum Ignatium von Osterhauß zu Vnserm Königlichen Rath gnedigst gewürdiget, auff: vnd angenommen; Nehmen auff, vnd würdigen Ihne darzu
hiemit wissentlich, vnd in Crafft diß Brieffs: Mainen, Setzen vnd Wöllen, daß Er ein hinführo Vnser Königlicher Rath sein, von Männiglich darfür gehalten, erkandt, geehrt,
vnd genandt, auch Ihme solcher Tittel auß allen Vnsern Cantzleÿen, vnd sonsten gegeben vnd geschrieben werden, darzu auch alle vnnd Jede Ehr, Würde vnd vortheil, freÿheit vnnd
Gerechtigkeit, wie andere Vnsere Königliche Räthe haben, vnd sich deren erfreüen, gebrauchen, Nützen vnnd geniessen, soll vnd mag, von Männiglich vngehindert; Jedoch
soll Er dagegen, Vnsere geheimbnussen, die Ihme anvertrawet werden, biß in seine Grueben, zuverschweigen, auch in Sachen vnd geschäfften, darzu Er inß künfftig gebrauchet wer
den möchte, Vnß seinem besten verstandt nach, das beste einzurathen, Vnsere Nutz vnnd frommen zubeförderen, Allen Schaden vnnd Nachtheil zuwarnen vnd zuverhüetten schuldig
sein, auch sonst in gemein alles daß Jenige thuen, was einem getrewen Rath gegen seinem Herrn zuthuen gebühret vnnd geziemet, hierauff Er dann Vnser gnedigster Verordnung
in sein Person geeÿdet ist. Zu Vrkundt deß Brieffs, besiegelt mit Vnserm Kayser: vnnd Königlichem Anhangenden Grösseren Jnsigel. Der Geben ist in Vnsere
Statt Wien, den Neun vnnd Zwanzigisten Monathstag Julij, nach Christi Vnsers Lieben Herrn vnd Seeligmachers gnadenreichen Geburth, im Sechtzehenhundert, Fünff vnd
Siebentzigsten, Vnserer Reiche, deß Römischen im Siebentzehenden, deß Hungarischen im Ein vnd Zwanzigsten, vnnd deß Böheimbischen im Neunzehenden Jahr.
Leopoldus
Ad mandatum Sac(rae) Caes(areae)
Regiaeq(ue) Maiestatis proprium.