Wir Hainrich von gotes gnaden Herzog zu Slesie H(er)re zu Glogow und zu Sagan. tu(e)n und bekhennen offenbar mit disem brief. allen den di nu leben. und her nach
chunftig sein. Daz wir mit bedachtem mu(e)t. mit gu(e)tem rat und willen aller uns(er) freunde willichlich und unbetwungen. haben von dem Hogeborn mechtigen
fursten. h(er)n Johannes. Chu(e)nig zu Behem Grafen zu Lu(e)cenburc. Obristen fursten in Slesie und h(er)ren zu Brezlab. uns(er)m rechten lehenh(er)ren. alle unser lande. und
Glogow halbe. und was dar zu geho(e)rt. da wir recht zu haben. mit irn weichbilde(n) und Grencen. als di unser vater zu selig(er) gedechtnizze. hat an uns bracht. mit
purgen. vesten. steten. leuten. und gu(e)t. und mit allen den rechten. di wir dar inne haben. heut an disem tag. fur uns und unser erben und nachchomen. mit
rechter e(e)r und gwonhait. zu rechtem lehen und zu mansthaft enphangen. Auch hat der selbe unser h(er)re der chu(e)nig. durch besund(er) gnaden und gunst di er zu
uns hat. uns und uns(er)n erben. alle uns(er) vetern. Herzog Conrads von der Oelsing. und Herzog Hannus von der Styna lande. ob si an erben abgingen. u(e)berlazen.
Und haben wir fur uns und unser erben und nachchomen. globt und swa(e)rren an aydes stat. mit gu(e)ten tru(e)n an alle arg list. im und seinen erben und nachchomen
Chu(e)nigen zu Behem. mit den vorgenanten landen allen di wir nu haben. od(er) her nach gwinnen di zu lehen gen von dem Chu(e)neich zu Behem. getru(e)lich warten
dienen und tu(e)n. an allen irn no(e)ten. nach gwonhait der lande. und als ein belehent furste und man seinem rechten h(er)ren. warten. dienen und tu(e)n zu rechte sol. So
sullen auch der vorgenant unser h(er)re. sein erben und nachchomen Chu(e)nig zu Behem. uns und alle unser erben und nachchomen. u(e)rtaindingen. beschirmen. und auch
behelfen an allen uns(er)n no(e)ten. als ein h(er)re. seinen man. zu rechte sol u(e)rtaindingen und behelfen. gegen allermenlich. zu allen uns(er)n rechten. Si sullen auch der vorgenant
unser h(er)re. sein erben und nachchomen Chu(e)nig zu Behem. nach uns(er)n. und uns(er) vorgenanten vetern landen und vesten. nicht stellen trachten noch ste(e)n. es gesche
danne. mit uns(er)m und mit uns(er) erben und nachchomen gu(e)tem willen. und sullen uns pei den selben landen weichbilden. und vesten. und pei allen rechten. gwonhaiten
und Grencen. lazen bleiben. und auch da pei behalden. und was wir vesten haben u(e)bern. und uns gebrochen sein. von dem Chu(e)nig von Cracow. der sullen si uns
helfen und raten wid(er) gwinnen. und gelo(e)sen. so daz wir furbas mugen unser land und grentz behalden. und dar ub(er) diser sache aller sind Gezeug. di wirdigen
veter in got. h(er)r Arnest Erczbischof zu Prag. her Predzlab bischof zu Brezlab. h(er)r Johannes bischof zu olmu(e)tcz. und di Hogeborn fursten. h(er)r Karl. unsers vor
genanten h(er)ren des Chu(e)nigs von Behem. erstgeborn sun marcgraf zu merh(e)rn. h(er)r Johannes h(er)zog von thropaw. auch des selben uns(er) h(er)ren sun. h(er)zog Bolco von
Opol. her Heinric voyt von plawen. her Hynk genant Berk von der duben. her Hainrich von Luchtenburc. h(er)r Wank. h(er)r Jesk. und h(er)r Benesch von wartemberc
h(er)r Hayman von der duben genant von riachod. h(er)r H(er)man von schonburc genant von Crimmow. h(er)r Jesk von michelsperc. h(er)r Puzze von lu(e)ncz Cam(er)er in Behem
h(er)r Andrich von pibstain. und and(er) erber h(er)ren und rit(er). und layen und pfaffen genueg. und dar ub(er) zu einer urchunde und zu ein stetichait diser sach aller
geben wir disen offen brief. u(e)sigelten mit uns(er)m hanganden Insigel. Der gegeben ist zu Prag an sand Clementen tag nach Cristes geburd. dreucehen hund(er)t Jar
in dem vier und vierzigsten Jar.