Wir Burgermeister der Rat und di Burger gemeinlich der Stat ze Frankensteyn. Bekenn und tun kunt offenlich mit disem briefe allen den di in sehen horen oder lesen das der hochgeborne furste unser herre
herczog Niclos von Munstirberg dem edeln manne hern Heinrich von Hugwicz und seinen erbn unsir vorgenant Stat ze Frankensteyn mit dem wicbilde dem closter ze Camencz mannen hantfesten und allir
czugehorunge nichtes uszgenomen recht und redlich versaczt hat als in seinem brief der darob geschribn stet volkomenlich begriffen ist in sulchem lute. Wir herczog Niclaus von gotis gnaden eyn
furste von Slesien herre ze Munstirberg tun kunt alln di disen brief ansehn das wir uns mit gutem willn und mit bedachtem mute und mit rate unsir getruwen manne und ouch unsir burger
ze Munstirberg haben mit hern Heinrich von Hugwicz unsirm liebn und getruwn fruntlich und lieplich berichtt und entscheyden umb alle sache und umb alln bruch der czwisschn uns bedin stat ist
gewest und mit namen umb alle schult di wir im sein schuldig gewest beide von unsirs vatir wegen und ouch von unsir wegen welherlei di sei von geretem gelde von pferden von schaden von
schaczung von pfandlosunge wi sy her komen sei darumb er uns meches hat gemanet bis an disen hutigen tag also das wir im hern Heinrich und alln seinen erbn han uszgesaczt unsir Stat
Frankensteyn mit irem wicbilde und alle di man di dor in gehoren das closter Camencz mit allem dem gute das dorczu gehort und in selbem wicbilde gelegen ist und das hosegerichte
doselbis mit allir herschaft mit allem rechte und mit namen mit allen den nuczen di von der Stat Frankensteyn und dem wicbilde bekomen mugn als wirs gehat habn selbs nichtes usz
zenemen vor tusint marg polenischer zal pragscher pfenninge von unsir vrowen tag wurczewei der nehist kumpt ubir czwei gancze iar und gelobn doran zegebin dreiszig marg
grosschen hern Heinrich und seinen erbn das sy di Stat und das wicbilde gehalden mugen di selbn dreiszig marg sullen sy uf schaden gewynnen uf den fierden pfenning also das ir
dreiszig werden di sulln sy uf das selbe pfant slan zu der houbtsumme. Wer abir das wir in der zeit der satczunge hern Heinrich und seinen erbn icht geldes gebin vil oder wening oder ab
im von anevellen eynis gutes das di leute wurde icht geviele ab sy es verkouften oder selbir wolden behalden fur also vil geldes als das gut wert wer oder ab es im verflegen di
er und seine erbn selbir nuczen wolden icht geuile wen sy dem lantrichter zehen marg von eyn lehn dorvon gegebin das sulln sy uns zemale abslan wer ouch ab wir in den erstn
iarn di Stat Frankensteyn mit dem wicbilde nicht enlostn so sulln sy der Heinrich und seine erbn das vorgenant gelt tusint marg und achczig marg on als vil ab in des icht geuile
als hi vorgeschribn stet gewynnen uf schaden uf den fierden pfenning und sulln abir beyd schaden und houptgut und ouch achczig marg di wir in zu der kost gebn sullen
in dem andirn iare uf das vorgenant pfant slan. Wer ouch ab wir di selbe Stat Frankensteyn mit dem wicbilde in dem andirn iare nicht enlostn so sol der vorgenante
Heinrich und seine erbn di Stat mit dem wicbilde verkoufen oder versetzen umb di tusint marg und umb alln schaden der doruf get als davor geschribn stet und ouch
umb czwir achczig marg di von dem kost gelde czwei iar doran geslagen seint wo oder weme sy mugen so alleyne di man des wicbildes nicht von geindirt werden doch
in sulchem undirscheid das her Heinrich und seine erbn wem di Stat mit dem wicbilde verkouft wirt ir gelt tusint marg und czwir achczig marg und ouch den schaden
der uf di tusint marg gegangen ist dorvon nemen sulln und was denne ubrig ist das sol uns werden und geuallen. Ouch gelobe wir herczog Niclos vorgenant on arge list
das wir den oder di den di vorgenant Stat mit irem wicbilde von hern Heinrich und seinen erbn verkouft wirt oder versaczt nicht hindirn sulln mit keynir an
sprache. Gegebin zu Munstirberg an sanct Marien Magdalenen obund noch gotes geburth tusint iar drewhundirt iar in dem sechst und firczigstn iar undir unsirm
grossen Ingesigel. Dornoch bekennen wir vorgenant Burgirmeistir der Rat und Burger gemeinlich der vorgenant Stat ze Frankensteyn das her Heinrich von Hugwicz der
vorgenant hat man manschafte das closter ze Camencz uns und unsir Stat mit allir zugehorung dem allirdurchleuchtigstn furstn und unsirm gnedigstn herren hern
Karl Romischn kunge ze alln czeitn merer des Reichs und kunge ze Beheim sein erbn und nochkomen kungen ze Beheim zerechtem pfande uszgesaczt hat in allir der weis als
in dem vorgenant brief geschribn stet. Darumb gelobn wir vorgenant Burgirmeistir und der Rat von wortn wizzen und willn der gemeine der vorgenant unsir Stat ze
Frankensteyn mit gutem truw on alle argelist das wir dem vorgenant unsirm herren dem Romischn kunge und kunge ze Beheim seinen erbn und nochkomen kungen ze Be
heim getru gewar gehorsam undirtanig und wartende welln sein ze eynem rechtn pfande in allir der weis als in den vorgenant briefn geschribn und begriffen ist und
von worte zu worte nichtes uszgenomen als wir des vorgenant hern Heinriche von Hugwicz pfant gewesn sein noch des briefs lute. Und des ze urkund und ze
gedechtnusz gebn wir disen brief besigilt mit unsir Stat Insigel. Der gebn ist ze Breslow noch Cristus geburth druczenhundirt und acht und firczig iar an dem
nehisten freitage noch sancti Martini tag.