Wir Ludewig von Gots gnaden Marggrafe ze Brandenburg und ze Lusitz des hailigen Romischen Riches obirster kamerer phallenczgrafe bey Reyn Herczog in Bayrn und in Kernden
Grafe ze Tirol und ze Gorcz und vogt der Gotshus Aglay Trient und Prixs Tůn chunt und bekennen offenlichen mit disem brief allen den die in sehent horent oder lesent daz
wir zu der Aufrichtung und gůte die der hohgeborn furste her Růdolf phallenczgrafe bey Reyn und Herczog in Bayrn unser lieber vater umb sein Lande herschefte vesten Gůt
Gerichte zolle wisser wisenweme gulte und nutze und umb all derselben Lande und herschefte zugehorung wo die gelegen sein in der phaltze und in Bayrn wie man die
mit sunderlichen worten mag benennen und umb alle phantschefte die er von dem Reiche oder sust von iemant anders ynnehat und auch umb die man manschefte lehenschaft
Lute und diener die zu den vorgenanten herscheften vesten und gůten gehorant und was er ieczo ynnehat oder noch gewinnet dem allerdurchluchtigisten fursten und herren
herren Karl Romischem kůnig ze allen ziten merer des Riches und kůnig ze Behaim unserm lieben genedigen herren und der durchluchtigisten furstinne frawen Annen seiner elichen
wirtinne unser lieben frawen und swiger und iren kinden und erben es sein sune oder tohter getan hat unsern gůten willen maynung und gunst volchomenlichen gebn
und verjehen uns fur uns und unser erben und nachkomen alles rehten anspruche und anredung die wir darzu haben oder gehaben mohten es sey von wegen des vorgenanten
Herczog Růdolfs oder von andern unsern vordern seligen phallenczgrafen bey Reyn und Herczogen in Bayrn von den wir deheinerlay reht darzu gehaben mohten und
geloben fur uns uns erben und nachkomen ewiclichen dem obgenanten unserm herren seiner wirtinne und iren kinden sunen und tohten mit gůten truwen ane geverde
daz wir dehein vordrung anspruche noch anredung furbaß darzu mit gaistlichem oder mit werltlichem rehte mit gewalt oder sust in deheineweis nymmer haten noch haben wellen
sunder sy bey den obgenanten Landen und zugehorungen als vorgenant stat unbetrubt und ungehindert ewiclichen lazen usgenomen des rehten daz ain phallenczgrafe
bey Reyn hat und haben sol an der wal und kůr ains Romischen kůnigs ains kunftigen kaysers und ander eren und wirdichait die zu der vorgenanten phallencz und kůre
gehorant und den briefscheften und manscheften die von der phallencz und der obgenanten kůr ze lehen rurent die bey uns und unsern erben ewiclichen beleiben sullen
wer aber daz wir alle sampt also versturben daz die obgenant phallencz und wirdichait der kůr erblos wurden so sullen baide phallencz und kůr mit manscheften und
lehenne da hin vallen da sy ze rehte hin gehoran Auch lazen wir den obgenanten Herczog Růdolfen unsern vater mit gůtem willen ledig und los aller gelubde verbintnuss
und ayde die er dem allerdurchluchtigisten fursten und herren herren Ludewigen Romischem kayser ze allen zeiten merer des Riches unserm lieben herren und vater seligen und auch
uns getan hat mit dem munde oder in briefen als verre als sy die vorgenanten sache rurent oder geruren mugen in dehein weise wer aber sache daz die obgenant fraw Anna
uns swiger also versturb daz sy kind nicht hiez so sullen die obgenanten lant herschefte vesten phantschefte und zugehorung wider vallen da sy ze rehte hin gehorant
und darumb geloben wir fur uns unser erben und nachkomen mit gůten truwen ane geverde dem obgenanten unserm herren seinen erben und nachkomen daz wir in und die
selben sein erben und nachkomen kůnig ze Behaim da bey ungehindert wellen lazen untz an die zeit daz in alles daz gůt daz er dem obgenanten Herczogen Růdolfen seinem
swäher gelihen hat und noch leihen wirt in chünftigen zeiten und alles daz er auf in gewendet hat oder noch furbaß gewendet daz mit offen briefen oder sust mit andrer
redlicher chuntschaft weisend ist und offenbar wirdet ganczlichen vergolten und widergeben wirt ze urkunde des briefes der geben ist ze Tressen nach Gotes
geburte drewzehen hundert iar und darnach in dem ainen und funfczigisten iar an Erichtag nach unser frawen tag als sy geboren ward