Wir Carl von Gots gnaden Romischer kunig ze allen zeiten merer des Reichs, vnd kunig ze Behem, Albrecht H(er)zog ze oster(reich) ze steyr, vnd ze k(er)nden, Johans margraf ze
merhern, vnd Rudolf des obgenanten H(er)zog Albr(echts) Erstgeborn sun von denselben gots gnaden vor vns selber, vnd alle vns(er) brud(er) bekennen, vnd tun chund offenlich mit disem
brief allen den die in sehent, od(er) horent lesen, Daz wir durch angebone liebe, lauter trew, vnd stete freuntschaft, die von gemeinscheffte der geburde vnd des geslechts alleweg
zwischen vns gewesen sind, vnd mit hilfe gots sullen ewichlich vnuerrucht in freuntlich(er) gut(er) minne beleibn ze sund(er)lichm troste vnd gnaden vns getan vnd ainen vns allesampt
mit wolbedachtem mute mit rate vns(er) fursten h(er)rn vnd auch getan mit recht wizzen ze samne verbundn habn, vnd verpindn vns vor vns, vnd vns(er) erbn ewichlich in guten
trwn, an geuarde vnd mit dem eyde den wir allesampt darub(e) gesworen haben vf den heiligen ewangelien, vnd geloben in chraften diser spuntnusse in guten steten trwen, daz
wir inwendig den kreizen vnd gemarken vns(er) kunigreich, furstentume, vnd herschefte die vns von erbschaft angehorent, vnd die wir ytzund innehabn od(er) mit hilfe gots
furbaß noch gewinnen, einand(er) getrwlich vnd freuntlich beholfen sein wellen vnd sullen wid(er) aller meniglich nymant auzgenomen, vnd in den zeiten so vns od(er) mer wem vns(er) erbn
vns(er) kunigreich furstentum h(er)schefte vnd lande veintlich angriffen werden, So sullen vnd welln wir and(er)n zesamt, als wir des ermanet werden an vfschub, vnd an all(er) verziehn
dem od(er) denselben mit leib od(er) mit gute, rat, hilf, gunst, vnd bruderlich liebe mit aller macht bey gestendig vnd geholfen sein vf vns(er)n aigen schadn vnd verlust, die weil
wir leben wid(er) ainen iglichn menschen vnd persone in welichm eren od(er) wesen der sey vnd ob er ouch in kunig(e)lichn wirdn were nymant duzzenamen, Als da vor begriffen
ist, duzzenemen doch den kunig von vng(er)n, wann wir mit dem in allen den punden beleibn sullen als die brif sagent die vns(er) obgenant(er) Romisch(er) kunig die weil wir marg(ra)f
ze merh(er)n waren, vnd selig(er) gedechtnisse die hochgebornen fursten her Carl ze vng(er)n vnd her Johans ze behem kunige vnd her ott h(er)zog ze oster(reich) vnd wir obgenant(er) h(er)zog
Albr(echt) vnd ouch wir obgen(anter) Johans marg(ra)f ze merh(er)n in den zeiten graf ze tirol einand(er) gebn habn, wann dieselb brif vnd pinde vnuerrucht vnd vnzerbrochn beleibn
sullen, In solich(er) beschaidenhait, welh vesten lande burge vnd stette in des landes gewunnen werdn d(er) vnser hilfe begert, daz die denselben vngeschaidt beleibn sullen
Aber varnde hab vnd geuangen, mag vnd sol ainer iglich(er) ze seinem nutze behalten, d(er) si mit sein(er) arbait erchrieget vnd gewinnet, Vnd in welichs hilfe wir sein
d(er) sol vns kost gebn, brot, weyn, vnd fyer, nach d(er) lande gelegenhait, alle die zeit die wir in sein(er) hilfe beleibn, Vnd die obgen(anten) spuntnusse gelubde vnd eyde ge=
lobn vnd welln wir stete vnd vnuerrucht habn vnd haltn vnd da wid(er) nymm(er) getun, noch strebn mit dem rechte od(er) mit d(er) tat, gelaich od(er) abwegs, mit werken
worten, sinnen, entschuldigung, helfrede od(er) varben selb(er) od(er) mit ymant and(er)s haimlich od(er) offenbar, od(er) suß in dhainen weis, wie man die kan od(er) mag, sund(er)lich benennen
gut vrchund ditz briefs, besigelt mit vns(er)n Insigeln, Vnd wir Rudolf der obgen(ante) hochgebornen fursten h(er)n Albrechts, H(er)zogen ze oster(reich) erstgeborn(er) sun, vmb daz wir
aigens Insigels nicht habn, So gelobn wir die obgen(anten) puntnusse gelubde vnd eyde in aller d(er) weis, als da vor begriffen ist, vor vns, vnd alle vns(er) bruder
gantz stete vnd vnuerrucht ze habn vnd ze halten, gleich weys, als ob vns(er) selbs Insigel gehangen were an disem brif, Der gebn ist ze wienn, do man zalt
nach crists gepurde dreuzehn hund(er)t iar, vnd darnach in dem dreu vnd funfzigistem iar des nesten donrstag(e)s vor dem palmtage, vnd vnsers des obgen(anten)
Romischn kunigs Reichs in dem ailenden iare