Wir burgermeyst(er) vn(d) ratlute vn(d) dy burge gemeynlich der stat czu der Svidnicz bekenen vn(d) tun kunt offenlich mit desim briue allen den dy on sehen od(ir) horen lesen wann der
hochgeborn furste vn(d) herre her Bolke h(er)czog von slesien vn(d) herre czu frostenberg vn(d) Svidnicz vn(d) czu dem Jawor vnsir lieber genedig(er) herre mit wol bedachtim mute
mit gutem willen vn(d) myt rate syner getruen manne an gesehen hat di besund(er) vruntscaft vn(d) liebe vn(d) ouch dy sunderliche truwe di mite her di allir durchluchtigste
furstinne vn(d) frawe frawen Anna Romisschen kuniginne czu allen guten merer(in)ne des riches vn(d) kuniginne czu Behem etwe(n)n selig(er) gedechtnisse herczogen heinrichs vnsirs
herren sines brud(ir) tocht(ir) vnsir genedige frawe begriffen hat vn(d) von angeboren(er) gute stetclichen meynt vn(d) hat ir der obg(enanten) vnsir frawen vn(d) eris libes erben beydes geslech
te die sie mit dem allir durchluchtigsten fursten vn(d) herren h(er)n karln Romisschem kunige czu allen guten merer des riches vn(d) kunig czu Behem gewinnet alle sine furf
tentu(m) herczogtum vn(d) herschefte czu der Svidnicz vn(d) czu dem Jawar mit allen den andern steten vesten vn(d) czugehorungen v(er)schriben vn(d) vormachet in alle der maze
als in synes furstlichen briues da noch begriffen ist insamlichen lute Wir Bolke von gotis gnadin h(er)czog von slesien herre von furstenberg czu der Svidnicz vn(d) czu
dem Jawor bekennen vn(d) tun kunt offenlich mit disem briue allen den dy in sehen od(ir) horen lesen das wir haben an gesehen di sunderliche gnade vn(d) fruntliche gu(n)st
des allir durchluchtigsten fursten vn(d) herren h(er)n karls Romisschen kunigs czu allen guten merer des riches vn(d) kunigs czu Behem vnsir lieben genedigen herren di her
vns vn(d) vnsir(n) geslechte bewiset hat mit der hontshaft die geschehen ist czwischen im an eyme teile vn(d) der durchluchtigsten furstinne frawen Annen der Romissche(n)
kuniginne vn(d) kuniginne czu Behem vnsir liber frawen vn(d) mumen etwe(n)n h(er)czoge(n) heinrichs seligen vnsirs brud(ir) tocht(ir) an dem and(ir)n vn(d) darumb geben mache(n)
vn(d) v(er)schriben wir der obg(enanten) vnsir liben frawen vn(d) mumen als eyner kuniginne czu Behem vn(d) iris leibes erben di sie mit dem obg(enanten) vnsir(n) h(er)ren dem kunige habe(n)
wir(d)it vnsir h(er)czogtum furstentu(m) vn(d) herschefte czu d(er) Svidnicz vn(d) czu dem Jawor mit den steten Svidnicz Strigon Hayn landishut Bunczelbach Nympa Jawor
lewenb(er)g hirschb(er)g Bunczlaw vn(d) Czoboten mit den vesten vn(d) slesken Grifensteyn Grifenb(er)g leen Schonow Eliastof hornsb(er)g vn(d) kemp(er)ch mit allen d(er) amte(n) d(er) ansehese
ten lehen lehenscheften furlehen den guten gerichten d(er) o(ber)n vn(d) nyd(er)n czinsen gulden kornen wischbilden kretz(e)m pfrunden vn(d) gotis gabin welden puschen b(er)gen
Glase(n)n wazz(er)n wazz(er)louften v(er)sen wisen weiden G(er)aute vogelweide rechten nuczen gewonheiten vn(d) allen czugehorunge wy man die benenne(n) mag mit sunderlichen
worten nichts hind(er) vns czunemen in allir der maze als wir is iczunt halden vn(d) besiczen mit rechte czu vns bringen mochte In sulcher bescheidenheit Ouch das sache
das wir von gotis v(er)hengnisse also vorscheiden das wir eliche leibes erbin mannis geslechte hind(er) vns nicht lazen das de(n)ne die obg(enante) vnsir genedige frawe vn(d) liebe
mume vn(d) iris liebes erbin die sie mit vnsir(n) herre(n) dem kunige haben wirdit als do vor geschriben stet die selben vnsire h(er)czogtum furstentu(m) herschefte lant lute vn(d)
alle and(ir) czugehoru(n)ge als do vor begriffen ist erbin vn(d) besiczen sal genczliche vn(d) eygint vn(d) do mite tun vn(d) lazen noch iren willekur als mit irem rechte(n) erbe
vnschedlich doch der hochgeborn furstinnen frawen Agnisin vnsir elichen wirtinne in irem leipgedinge wenn sie all die obg(enanten) furstentu(m) lant vn(d) herschefte mit alle(n)
nucze habin vn(d) besiczen sal nur czu iren lebtagen Wer ab(ir) das wir mit gnaden gotis eliche leibis erbin mannes geslechte gewunnen so sullin die selbin vnsir erben
der obg(enanten) frawen vn(d) mumen ad(ir) iris leibis erben ab sie nicht were Czehen tusent Schog groz(er) pfennige pragischer muncze mit gereite gelde berichen vn(d)
beczalen Odir die vesten lewenb(er)g vn(d) Bunczlaw mit wischbilden vesten rechten nuczen vn(d) czugehorungen czu rechtem pfande seczen als lange vncz das sie die obg(enanten) Czehe(n)
tusent Schog genczlichen berichte(n) vn(d) beczalen vn(d) do mite sullen de(n)nne die selben vnsir erbin bi dem obg(enanten) eygint vnsir(n) furstentu(m) herschefte vn(d) landen vn(d) eygint
d(er)in bliben wer ouch das wir eliche liebes erbin mannis geslechte nicht heten vn(d) doch tocht(ir) liezen so sullen die obg(enanten) vnsir liebe genedige frawe od(ir) iris liebes
erbin die sie mit vnsir(n) herre(n) dem kunige gewinnet yclicher vns(er) tocht(ir) Czehen tusent Schog groz(er) pfennige gebin vn(d) sie bestaten noch rechter gewonheit als
geborn fursten kind(ir) Ouch hab(e)n wir gelobt vn(d) geteidingit sie das sache das die obg(enante) vnsir eliche wirtinne vnsir tot gelebte das sie de(n)nne noch der czeit vnsirs
todis keine Burgg(ra)uen pfleg(er) ad(ir) Amptman vf vesten husin in steten ad(ir) in landen od(ir) iren and(ir)n od(ir) wechsiln sol ez sie de(n)nn das sie eyme bid(er)man d(er) do glich
gut vn(d) gewis sei dem ersten an sin stat secze an dem d(er) obg(enanten) vnsir frawen od(ir) iren erben moge bliben genuge vn(d) das der czu vor sich allir gelubde eide vn(d) truwen v(er)bunde(n)
habe d(er) obg(enanten) vns(er) frawen der kuniginne od(ir) iren erbin gelich sine(n) vorfarn an des stat h(er) geseczet w(ir)dit vn(d) ouch das die obg(enante) vnsir frawe genedege vn(d) liebe mume warten
de des anevalles e wann sie in gewer keme also furbe das sie leibis erbin mit dem obg(enanten) vnsir(n) herre(n) nicht gewinne so sullen alle ir(er) lute knechte Burg(ra)uen burg(er)
vn(d) alle lancsazen all der obg(enanten) eide vn(d) gelubde ledig sein doch in sulcher bescheidenheit das de(n)n obg(enanten) vnsir(n) herren dem kunige vn(d) syne(n) erbn das obg(enante) gelt vn(d)
heymstuir d(er) obg(enanten) czehen tusent Schog geuallin sol od(ir) mit pfand(in) gesichert w(er)den in all der maze als do vor begriffen ist das sie do mite tun vn(d) lazen noch irem
willekur vn(d) das gebin wen sie wollen vn(d) ouch das die obg(enante) vnsir frawe vn(d) mume den obg(enanten) vnsir(n) herren den kunig obirlebte vn(d) e(n)ne ad(ir) man neme an vnsir(n) dank
vn(d) willen so sullen beide sie der man vn(d) alle kint die sie mit im gewinnet in dem obg(enanten) vnsir(n) furstentu(m)e vn(d) herscheften nichis nicht habin Ouch ist geredet vn(d)
geteidingit das die obg(enante) vns(er) vrowe die kuniginne vn(d) vnsir liebe mume noch ymand von iren wegen vns vn(d) vnsir erbin mannes geslechte vmb ke(n)nlei erbtail ad(ir)
vmb keine and(ir) sache an reden ad(ir) an sprechin sullen and(er)s wenn do vor geschribin ist ouch meine(n) vn(d) wellen wir sei das sache das vns ehaftege not an trete(n) w(ir)
den vmb geuenknisse krieg od(ir) and(ir) geschihte vns od(ir) vns(er) manne ere vn(d) liep czu losen das wir de(n)nn d(er) selben vns(er) furstentu(m) lant vn(d) lute gewaldig sin czu
tun vn(d) czu lazen doch in guten truwen an alle geuerde Dor noch vn(d) sint dem mal das vns der obg(enante) vns(er) genedig(er) herre mit sulchen sinen gnadin gunstlich vn(d)
fruntlich begriffen hat so geloben vn(d) wollen w(ir) im mit guten truwen on geuerde beistendic sin vn(d) beholfen wed(ir) allir menlichen nymand vzgunemen vn(d) in in(n)er
vn(d) wege(n)n czu lazen mit leibe noch mit gute vn(d) sine veinde sullin vns(er) veinde sin vn(d) meinen vn(d) wollen ouch keine syne wed(ir) sachen od(ir) veinde cristen Juden ad(ir)
heiden in vnsir(n) landen husen hofen haldin od(ir) vorteidingen die wed(ir) das recht sin vn(d) nicht recht tun wollen Die gune wir im vn(d) sine amptluten das sie die selben an grif
fen vn(d) rechtfertigen sullen vn(d) mogen wo sie der bekomen in allen vnsir(n) herscheften vn(d) landen czur vrkunde dis briues v(er)sigilt mit vnsir(n) grozen Ingesigil d(er) gegebin ist
czur Svidnicz noch Cristis geburt druczenhund(ir)t In dem dri vn(d) fumfczigsten Jare an der nehesten mitewochen noch sancti petris vn(d) paulis tag der heilegen cjwelf boten
Da von durch sunderlich gebot des obg(enanten) fursten vn(d) herren herczogen Bolken vnsir(n) lieben genedigen herre der vns das geboten vn(d) geheizen hat mit leibend(er) stime
vn(d) in offenbarer geginwertikeit semer edlin getruwen manne so habe(n) wir mit wol bedachtim mute mit worte gunst wizzen vn(d) willen d(er) ganczen gemeinshaft
allir vns(er) miteburg(er) der obg(enanten) allir durchluchtigsten furstinn der Romisschen kuniginn vn(d) kuniginn ze Behem vnsir(n) frawen vn(d) genedigen frawen vn(d)
iris leibis erbin die sie mit dem obg(enanten) fursten vn(d) herre(n) kunig karl irem elichem wirte gewinnet gehuldet vn(d) gelobt vn(d) gesworn hulden gelobten vn(d) swor(n)
das wir wenn ez czu sulchen schulden komit als do vor geschribin stet in vnsirs herre(n) herczogen Bolken briuen ir vn(d) den selbin iren leibes erbin wenn sie die mit
hilfe gotis gewinnet getruwe gehorsam warende vn(d) vnd(ir)tenig sin wollen vn(d) sullen als vns(er) naturlicher vn(d) angebor(n)n herschaft in all den punkten meinungen vn(d)
artikiln vn(d) in all der maze als die obg(enanten) vns(er) herre herczogen Bolken briue sprechin vzgenomen doch den artikil der czu dem lezten in dem selbin briue stet vmb
di hilfe die beide der obg(enante) kunig karl vn(d) ouch vns(er) herre h(er)czog Bolke ein and(ir) tun vn(d) leisten sullen wann vns die selben gelubde nicht anegen vn(d) czu den and(ir)n
vnsir(n) sachen dor vff wir gelobt vn(d) gesworn haben nicht gehoret czur vrkunde dis briues v(er)sigilt mit vnsir(n) Ingesigil der gegebin ist czu der Svidnicz noch Cristis
geburt driczenhund(ir)t vn(d) dar noch in dem dri vn(d) fumfczigsten Jare des nehesten dunn(ir)stagis noch sancti petris vn(d) paulis tage der heilegen cjwelf boten