Wir Ruprecht der Jung von gots gnaden pfallenzgraf bi Reyn vnd herzog in Beyrn bekennen vnd tůn kunt offenliche mit disem brife Allen den die in sehent oder horent lesen daz wir mit wolbedachtem můte mit Rate vnser
freunde vnd mit rechter wizzen dem Allerdurchleuchtigstem fursten vnd h(er)ren h(er)n Karl Romischem kunige zů Alln zeiten mer(er) dez Reichs vnd kunige zů Beheim vns(er)m liebn gnedigem h(er)ren seinen erbn vnd Nachkomen kunigen zů
Beheim vnd der kronen dez selbn kunigreichs erblichn vnd ewichlichn vmb zwelftausent mark lotigs silbers damit er vns auz vns(er)m geuencknůzze von sachsn gelediget vnd gelost hat die nachgeschribn vesten Newnstat
Starenstein Hirsaw vnd Liechtenstein vnd darnach vmb zweinzigtausent mark lotigs silbers die er auf seles gedechtnůzze des hochgeborn fursten h(er)n Rudolfen ettwenn pfallenzgrafen bi Reyn vnd herzogen in Beyrn vns(er)s
liebn vettern vns wizzentliche gewendet vnd in gelihen hat die nachgeschribn vesten Stet vnd merkte Sulzbach Rosenb(er)g Hertenstein Nidstein Důrrendorf Hyltpoltstein Hohenstein Liechtenekk franckenb(er)g Lauffen Eschen-
bach Harspruck Auerbach Velden Begniz vnd daz plech vnd Alles daz daz vns vetter der egnant zu Beyrn innegehabt vnd besezzen hat mit Allen dorfern lewten herschefften gůten gerichten Bennen zolln geleiten waz-
sern wispennen gůlten zinsen nůzen vellen welden Bůschen geiegeden vogelweiden wisen weiden wazzern eÿden wazzerlauffen Teichen vischereyn Bergen grůnden sluchten genken krewzen steinfelden
vnd Alln nůzen ob vnd vnder der erdn wie man die genennen mag vnd auch mit Ritt(er)n knechten mannen amptschefften lehen lehenschefften v(er)lehenten gůten burghůtn vnd gotsgabn dienern eygenlewten
pfantschefften von dem Reiche od(er) sust von iemanden and(er)s vnd Allen zůgehoringen Erbe vnd eygen als ez gelegen ist pfantschafft fur pfantschafft recht vnd redlichen v(er)kauft habn in Aller der mazz als sie
der obgn vns(er) vetter selig(er) innegehabt vnd besezzen hat vnd als sie von seinem tode auf vns erblichn chomen waren vnd czeihen vns fur vns vnd erbn vnd nachkomen ewichlichn Alles rechten an-
sprache vnd Anredunge die wir zu den obgnanten vesten Steten merkten vnd Allen zůgehoringen als sie dauor begriffen sind gehabt habn habn od(er) gehabn mochten in dheinemweis vnd czeihen vns
auch aller hilfe gaistlichs vnd werltliches rechten vnd aller geseze keyserlicher vnd babstlicher Bůche der lande gewonheit vnd aller vbung vnd behelfnůzze damit diser kauff mocht in dheinemweis
gehindert werdn vnd meynen daz wir vns erbn vnd Nachkomen vns damit nimm(er) in dheinen zeiten mit dem Rechten oder mit d(er) tât mit worten oder w(er)ken behelfen sulln od(er) wolln Auch
gelobn wir mit gůten trwen on geu(er)de fur vns vns(er) erbn vnd Nachkomen dem obgn vns(er)m h(er)ren dem kunige seinen erbn vnd Nachkomen kunigen zů Beheim daz wir in vnd der
kronen dez selbn kunigreichs Alle die obgn vesten Stet merkte vnd zůgehoringen als sie dauor begriffen sind v(er)sprechen vnd antwurten sullen vnd wolln fur vns(er)n vettern keyser Ludewigs
seligen kindern den hochgeborn fursten h(er)n Ruprechten den eltern pfallenzgrafen bi Reyn dez heiligen Reichs obersten Truchsessen vnd herzogen in Beyrn vnd fur Allermengliche vnd fur Alle an-
sprach eines ietlichn wie d(er) genennet sei Als in den landen Recht vnd gewonliche ist vnd zů merer(er) sicherheit habn wir gebeten die Erwirdigen fursten vnd h(er)ren h(er)n Gerlachen erzbis-
chof zů meincz h(er)n Albrechten zů wirczburg h(er)n Albrecht zu freysingen die Byschof vnd die hochgeborn fursten h(er)n Rudolfen herzogen in ost(er)riche h(er)n Albrechten pfallenzgrafen bei Reyn
vnd herzogen in Beyrn vns(er)n vettern vnd die edeln h(er)ren Sÿfriden von Wytchenstein Ludoweigen vnd fridrichen von otyngen die Grafen vnd h(er)n Euzen von Hohenloch daz sie zů ewi-
gem gedechtnůzze vnd zů gezeugnůzze dez obgn kauffes irer Insigel geruchen bei dez vns(er)s an disen brif zů hencken vnd wir Gerlach von gots gnaden Erzbischof zů meincz dez
heiligen Reichs Erczkanczeler in dewtschen landen Albrecht von wirczburg Albrecht von freysinge die Byschof vnd wir Rudolf h(er)zog in ost(er)rich zů Steyr vnd zu kernden Albrecht
pfallenzgraf bei Reyn vnd herzog in Beyrn von der selbn gots gnaden Sÿfrid von Wytchenstein Ludoweig vnd fridrich von otingen Grafen vnd Euz von Hohenloch beke-
nen offenliche daz wir durch sundlicher bet(e) dez obgn hochgeborn fursten h(er)n Ruprechts dez Jůngn pfallenzgrafen bei Reyn vnd h(er)zogen in Beyrn vns(er) Insigel zů gezeug-
nůzze vnd zů ewiger gedechtnůzze dez obgn kauffes an disen brif habn wizzentliche gehenckt mit vrkunde diz brifs v(er)sigelt mit vns(er) Aller Insigeln Der gebn ist zů
hagenow Nach christs geburt drewzehenhundert Jar darnach in dem dreivndfůnfczigstem Jar an dem nechsten dÿnstag nach Aller heyligen tage