Wir ludwig genant der Romer von gotes genaden Margraue ze brandenburg zu lusicz des heligen Reichs Obrister kamer(er) Pfallenzgraue bey Reyn vnd herzog in Beyr(e)n Veriehen vnd tun
kund offenlich mit disem briue allen den die in sehen oder horent lesen daz wir mit bedachtem mut vnd mit rate vns(er) getrewen vnd ouch mit rechter wizzen fur vns alle vnser bruder vnd
ir Erben vnd nachkomen Margrauen zu brandenburg ewichlich geleicher weiz als der hohgeborn furstew vnd herr h(er)r ludwig der Elter pfallenzgraue bey Reyn vnd herzog in beyr(e)n
vnser bruder vnd ouch wir in der stat zu budissin getan haben vnd semliches lutes briue geben haben als hernach begriffen ist also haben wir vns nu von newens verzigen vnd verzeihn
vns ouch aller der rechten anredungen vnd anspruch ob wir dheine als Margrauen ze Brandenburg vnd zu lusicz gehabt haben vnd haben oder gehaben mochten zu dem lande zu budissin
vnd zu Gorlicz vnd zu den Steten luban lubow kamencz vnd and(er)n Steten lehen Mannen Mannschaftten Weichpilden vnd kreisen die darzu gehoren geistlichen vnd wertlichen vnd byname(n)
zu den Edlen hren vlreichen von pack von Sarow vnd zu dem lande zu Sarow vnd h(er)r Albrechten von hakembur(n)n vnd seiner hafschefte vnd ir beider Erbn vnd nachkomen ewichlichen vnd
waz da selbs der allerdurchluchtigste furste vnd vns(er) genediger herre her karle Romischer keis(er) zu allen zeiten mer(er) des Reichs vnd kunig zu beheim innehatt vnd die hohgeborn furste vnd herren
herren Johans ettwenn kunig zu beheim sein vater seliger vnd herre heinrich walent herzog zu dem Jawer vnser Oheim seliger innegehabt vnd besezzen habent vnd geloben mit guten trewen
an geverde fur vns vns(er)n bruder Margrauen Otten vns vnd sein Erben vnd nachkomen Margrauen zu brandeburg vnd zu lusicz mit geswornem eyde den wir daruber zu den heiligen getan ha
ben daz wir dem vorgen(anten) vns(er)n liben genedigen herren sein Erben vnd nachkomen kunigen zu beheim an dem vorgenanten lande budissin Gorlicz vnd den Steten luban lubow kamencz vnd and(er)n
Steten lehen Mannen Mannschaftten Weichpilden vnd kreysen vnd allen zugehorungen Geistlichen vnd wertlichen vnd bynamen an den vorgen(anten) herren vlreichen von pack von Sarow herren Albrechten
von hakembur(n)n iren Erben vnd nachkomen vnd aller irer zugehorunge nicht hindern beschedigen ansprechen noch betruben wollen vnd geloben mit guten trewen an geverde vnd mit dem vorgen(anten)
geswornem eide daz wir nach dem vorgen(anten) lande herren Steten Mannschaftten vnd allen zugehorungen als vor geschriben stet nymmer gesten wollen noch sullen mit anspruch anredunge noch
mit dheinen sachen geistlichen oder wertlichen wie man die genennen mag Ez sullen ouch alle briue vnd hantfesten die wir von vns(er)n vater seligen oder von yemant anders daruber haben vnkref
tig vntuglich vnd aller sachen absein vnd dem vorgen(anten) vns(er)n genedigen herren sein Erben vnd nachkomen kunigen zu beheim kein schaden bringen Wann wir vns mit wolbedachtem mute vnd mit gu
tem rate verzigen haben vnd verzeihen genzlich fur vns vns(er)n bruder Margrauen Otten vns vnd desselben vnsers bruders Erben vnd nachkomen Margrauen zu brandeburg vnd zu lusicz ewichlich(e)n
aller derselben hantfesten vnd briue ob dhein zu licht quemen oder furbracht wurden Mit vrkunt dicz briues versigelt mit vnserm Jngesigel der geben ist zu Nurenberg nach Christus
geburd dreuczehenhundert Jar darnach in dem funfvndfumfczigsten Jar des nechsten donerstags nach sant Andres tag des heligen zwelefbote(n)