Ich Ulbrecht von Ercnewig bekenne vnd tůn kunt offenlich mit diesem briefe allen den die in sehen oder horen lesen wann der allerdurch
leuchtigiste furste vnd h(er)re her Karl Romischer keiser zu allen zeiten merer des Reichs vnd kunig zu Beheim mein lieber gnedig(er) h(er)re
mir vnd meinen Erben fur den hochgebornen fursten vnd h(er)ren h(er)n Bolken herzogen von Sliez vnd h(er)ren zu der Swidniz vnd zu
dem Jawr vnd mit im gelobet hat vnd vns seine keiserlichen briefe daruber geben hat daz vns derselbe h(er)re der herzog alle
briefe vnd gelubde die er vns vmb sibenhundert schok Grozzer pfeninge prager mvmze die er vns fur den egen(anten) vnsern h(er)ren
den keiser schuldig ist geben vnd getan hat gancz vnd stet halden wolle vnd sulle darumb gelob ich fur mich vnd die egenante(n)
meine Erben dem obgen(anten) meinem h(er)ren dem keiser seinen erben vnd nachkomen kungen zu Beheim wenn daz geschiht daz vns
sulche briefe vnd gelubde von dem obgen(anten) herren dem herzogen gehalden vnd volbracht w(er)den vnd vns daz egen(ante) gelt gericht(et)
vnd bezalet wirdet daz wir denn demselben vnsern h(er)ren dem keiser vnd seinen Erben oder nachkomen kungen zu Beheim die ege
nanten seine brief widergeben wellen vnd sullen on alles versehen vnd widerrede Vnd des ze vrkunde gib ich im disen brief v(er)
sigelt mit meinem Jnsigel der geben ist zu prage nach Cristes geburte druzenhund(er)t Jare vnd in dem Sehs vnd fumfzigiste(n)
Jar an sant Lawrencen abent