Wir Beemond von got(es) gnad(e)n Erczbischof ze Trier der heiligen Romischen kirchen durch Welschelant vnd d(a)z kunigreich von Arelat Erczanczler Bekennen vnd tun kunt offenlich mit
diesem briue allen den die in sehent oder horent lesen Wann fride vnd gemach ane der fursten hilfe nicht besteen mag vnd alsouil desteminner frieden vnd auch gnad(e)n ist so die hochgeborn
fursten der heiligen kirche vnd benamen an den die kur vnd die macht liget ein houbt der cristenheit zu kiesen in iren herscheften eren vnd rechten gehindert vnd gesumet werden Do
uon ist notdurftig zu trost vnd zu gnad(e)n der gemeinen cristenheit daz man den fursten ire recht one alle mynnermüze in syner gancz behalte Douon tun wir d(a)z sei d(a)z vmb die
recht d(a)z durchleuchtigen fursten vnd h(er)ren d(e)z hochgebornen kuniges ze Beheim vnsers mitkurfursten keynerleie zwiuel nye gewesen sey vnd auch noch nicht sei noch gesin muge in
keynerweis Wann er von seynen vrenen Ene(n) vet(er)n vnd vrfarn geleich vns vnd allen and(er)n vns(er)n mitkurfursten Geistlichen vnd werltlich(e)n in der wale vnd kur eyns Romisch(e)n kuniges
eynes kunftigen keisers vollenkomens recht gehabt hat vnd auch noch hat als dieselb(e)n ding wol luterlich(e)n lantkundig vnd offenbar seint von sulchen alten langen zeiten die bei der leute
gedechtnuze raume nicht gesin mugen durch langes alters will(e)n Doch seint dem mal daz ettliche kinder der vinsternuze die mit blinden ougen von der gotlichen warheit also geuerret sein
daz sie in der clarheit d(e)z mittages tasten gleich als in den nechten vnd betrubnüz vnd strikke mach(e)n der vngerechtigkeit vnd auch der sunden von kuit diueliches nydes vnd mugen die
burde der warheit nicht getragen durch den last irer lugen vnd domit so vallen si in die betrubnüze die sie gemachet hatten vnd vrewen sich in die stricke irer vngerechten meynungen also
daz sie d(a)z liecht zyn vinsternuze vnd d(a)z vinsternuze ein liecht entscheyd(e)n So meynen wir durch merer sicherheit vnd auf die rede daz der egen(ant) durchleuchtige furst vnd h(er)re der kunig zu
Beheim sein erbn vnd nachkomen kunige ze Beheim ewiclich(e)n mit sicherheit bewart werd(e)n vnd d(a)z auch alsei aller zwiuels ergennige vnd d(a)z munge claffern wege irer bosheit vnd lugen
meht gelazen werd(e)n vnd duon mit wolbedachtem müte nicht von vreual od(er) vnbescheidenheit sunder von rechter vnderwisungen die wir warhafticlich(e)n wol erfunden hab(e)n mit sampt
all(e)n and(er)n vns(er)n mitkurfursten Geistlich(e)n vnd werltlich(e)n so erkennen wir vns vnd sprech(e)n mit rechter wizzen vnd kundigen d(a)z uffenbar allermeniclich(e)n daz die durchleuchtigen fur
sten die hochgebornen kunige von Beheim von iren vrenen Enen vet(er)n elt(er)n vnd vrfarn von sulcher langer zeit der gedechtnuze bei den leuten raume nicht gesin mag durch langes
alters will(e)n alle wege gehabt hab(e)n vnd noch hab(e)n vnd auch steadich(e)n hab(e)n sull(e)n vollenkumelichs recht vnd auch stymme genczlich geleich vns vnd and(er)n vns(er)n mitkurfursten Geist
lich(e)n vnd werltlich(e)n in der wale vnd kur eyns Romisch(e)n kuniges eyns kunftigen keisers also wenn vnd als oft ez zu pflicht schuld(e)n kumpt daz man kiesen sol daz man denn den
durchleuchtigen fursten den hochgeborn h(er)ren den kunig ze Beheim der in zeiten wirt od(er) zuder selb(e)n kur erberlich(e)n rufen sol vnd der sol denn in der kur vnd wal als d(a)uor begriffen ist
alle seine recht stat vnd stymme vnd alle andere ding genczlich(e)n hab(e)n die d(a)zu gehoren vnd sich der freuwen vnd genyezen od(er) von seynen wegen seyne boten die er d(a)zu sendet gleich
vns vnd all(e)n and(er)n vns(er)n mitkurfursten geistlich(e)n vnd werltlich(e)n die nu seint od(er) in kunftigen zeiten werden mit all(e)n wird(e)n vnd eren als durch recht vnd gewonheit d(e)z heiligen Reichs sulchs
recht styme vnd kur besess(e)n hab(e)n in vorgangnen zeiten Auch sprech(e)n bekennen vnd kundigen wir mit rechter wizzen als d(a)uor begriffen ist daz d(er) egen(ant) durchleuchtige furste d(er) hochgeborn
h(er)re d(er) kunig zu Beheim der nu ist od(er) in zeiten wirt d(e)z heiligen Romisch(e)n Reichs ob(er)ster schenk ist vnd d(a)z er d(a)z ob(er)st schenkampt fur eynem keiser od(er) fur eym Romisch(e)n kunige
in erblichen houen in kuniglich(e)n cronen nicht schuldig ist zu vben ez sei denn d(a)z er d(a)z selb tun welle mit seynem gutem will(e)n doch mag d(er) selbe kunig zu Beheim in gegenwürtikeit d(e)z keiser
vnd d(e)z Romisch(e)n kunige in sulchen erblichen houen gecronet siczen steen vnd geen nach syn(er) willekur als dieselb(e)n sach(e)n von hochgeborn kunigen ze Beheim vnd von iren elt(er)n vnd vr
farn mit loblich(e)r gewonheit von alt herkomen ist Zur vrkunt d(e)z briefs versigelt mit vns(er)m Ingsigel der geb(e)n ist zu Metz nach cristus geburt drewzehnhundert Jar dornach in dem
Sechs vnd funfczigstem Jar an dem nehsten Sontage vor sant Lucen tage der heiligen Juncfrowen