Wir Wilhelm von gots gnaden Erczbisschoff zü Coln des heiligen Romischen Riches in Jtalien Erczcanczeler Bekennen vnd tun kunt offenliche mit dysem briue allen den di jn
sehent oder horent lesen Wann fride vnd gemach an der fursten hulfe mast besessen mag vnd also viel destemmer steten vnd ouch guden ist do di hochgeborn fursten des hei
ligen Riches vnd beyname dy an de di kure vnd di macht liget eyn houbt der cristenheit zü keysen in jren herscheften eren vnd rechten gehindert vnd gestirret werden
Da von ist noitdorftig zü troste vnd zü gnaden der gemeynen cristenheid das man den fursten jre recht an alles widderruffe in seyner gancze behalte dauon wie wol
daz sey daz vmb di recht des durchluchtigen fursten vnd herren des hochgebornen kuniges zü Beheim vnses mitkurfursten keynerleye cwiuel ny gewesen sey von ouch
noch nit sey noch geseyn moge in d(er)me was wann er von seynen ouenen sney vettern vnd vorfarn glich vns vnd alln and(er)n vns(er)n mitkurfursten Geistlichen vnd Werntlich(e)n
in der wal vnd kure eynes Romischen kuniges eynes kunftigen keisers vollenkomenes recht gehabet hat vnd ouch noch hat als diselben ding wol luterliche kuntkun
dig vnd offenbar seind von s(ol)ichen alten langen zeiten dy bei der lute gedechtnisse itzunt nicht geseyn mogen durch langes alters willen doch seind demmal das etliche
kinder der dinsternisse di mit blinden ougen von der gotlicher warheit also geirret seind das si in der clarheid des mittages tasten glich als in den nechten vnd betrup
nisse vnd stricke machen der vngerechtigkeit vnd ouch der sunden von nite dunchches nydes vnd mogen dy binde d(er) warheid nicht getragen durch den last jrer lugen vnd
da myde so vallen si in di betrupnisse di si gemacht hatten vnd wirren sich in di stricke jr vngerechter meynunge also das si das liecht eyn dinsternisse vnd das dinst(er)
nisse eyn liecht entscheiden do meynen wir durch mer sicherheit vnd vff di rede das der ege(nannt) durchluchtige furste vnd herre der kunig zü Beheim seyne erbn vnd
nachkome kunige zü Beheim ewecliche mit sicherheit bewaret w(er)den vnd das ouch abesey alles cwiuels ergeringe vnd das missliche claffern wege jr bosheit vnd lu
gen nicht gelassen werden vnd dauon mit wolbedachtem mute nicht von irrsal oder vnbedechtliche sunder von rechter vnderwisunge dy wir warhaftigliche wol
erfunden haben mit sampt allen and(er)n vns(er)n mitkurfursten geistlichen vnd werntlichen so erkennen wir vns vnd sprecken mit rechter wissen vnd kundigen das offe
bar allermeniclichen das di durchluchtigen fursten di hochgeborn kunige von Beheim von jren vrenen sney vettern eltern vnd vorfarn von s(ol)icher langer czeit der
gedechtnisse bej den luten itzunt nicht geseyn mag durch langes alters willn allewege gehabet habn vnd noch habn vnd ouch stetecliche haben sullen vollenkomeliches
recht vnd ouch stymme ganczlich glich vns vnd and(er)n vns(er)n mitkurfursten Geistlichen vnd Werntlichen in der wal vnd kure eynes Romischen kuniges eynes kunftigen
keisers also wanne vnd als offe es zü s(ol)ichen schulten kumpt das man keysen sal das man dann den durchluchtigen fursten den hochgeborn h(er)ren den kunig zü Beheim
der in zeiten wirdet zü der selbn kure erberlichen rufen sal vnd der sal dann in der kur vnd wal als dauor begriffen ist alle seyne recht stat vnd stymme vnd alle and(er)
ding di darzü gehoren ganczlichen haben vnd sich der frowen vnd genyßen od(er) von seynen wegen seyne boten di er darzü sendet glich vns vnd alln and(er)n vns(er)n mitkurfurste(n)
geistlich(e)n vnd werntlichen di nu seind od(er) in kunftigen zeiten w(er)den mit allen wyrden vnd eren als durch recht vnd gewonheid des heiligen Riches s(ol)iche recht stymme
vnd kur besessen habn in vergangen zeiten Auch sprecken bekennen vnd kundigen wir mit recht(er) wissen als dauor begriffen ist das d(er) ege(nannt) durchluchtige furste der
hochgeborn h(er)re der kunig zü Beheim d(er) nu ist oder in zeiten wirdet des heiligen Romischen Riches oberster schenke ist vnd das er das oberste schenkeampt vor eynem
keiser od(er) vor eynem Romischem kunige in Erewirdige(n) houen in kuniglicher crone nicht schuldig ist zü vben es sei dann das er das selbe tun wille mit seyne(m) gutem
willen doch mag derselbe kunig zü Beheim in gegewertigkeit des keisers vnd des Romischen kunige in s(ol)ichen Erewirdigen houen gecrenet siczen sten vnd gen nach
seyner willekur als diselben sachen von hochgeborn kunigen zü Beheim vnd von jren eltern vnd vorfarn mit loblicher gewonheit von alter her komen ist asit in vr
kunde dis briefs versiegelt mit vns(er)m Jngesiegel Der ggeben ist zü metze nach cristus geburte druczenhundert Jar vnd darna in dem seches vnd funffczigesten Jare
an dem nehesten suntage vor sente lucy tag der heiligen Juncfrawen