Wir Albrecht von gots gnaden pfalenczgraf bei Rein vnd herczogen zu Beyern Bekennen vnd tun kunt offenlich mit disem brief
allen den die yn sehen odir heren lesen das wir mit wolbedachtem mut vnd mit rat vns(er) getruwen vnd ouch mit rehter wizze
vor vns vns(er) erben vnd nakomen eweclich vns verczigen haben vnd verczihen aller der recht anredung vnd ansprach ob wir dheine
gehabt haben vnd habn odir gehaben mochten in kunftigen ziten zu den landen zu Budissin vnd zu Gorlicz vnd zu den steten Luban
Lubaw Camencz vnd and(er)n steten lehenen mannen manscheften weipilden vnd kircz(en) die dar zu geherent geistlich vnd werntlich
vnd bei namen zu den edilen herren von pack von Garaw vnd zu dem lande zu Garow vnd zu den herren von Hackenborn vnd irer
herschaft vnd ir aller erben vnd nakomen eweclich vnd was do selbes der allerdurchluchtigiste furst vnd vns(er) gnediger herre herr Karl
Romischir keisir zu allen zeiten merer des Richs vnd kunig zu Behem innhot vnd die hochgeborn fursten vnd herren her Johan
czwan kunig zu Behem sein vatter seliger vnd herr heinrich weilent hertzog zu dem Jawir vnsir oheim seliger Jnngehabt
vnd besezzen haben vnd globen mit guten truwen ane geuerde vor vns vnsir erben vnd nakomen mit gesworn eide dem wir dor
vber zu den heiligen getan habn das wir dem vorgen(anten) vns(er)m lieben genedigem herren sinen erben vnd nakomen kunigen zu Behem
an dem vorgen(anten) lande Budissin Gorlicz vnd den steten Luban Lubow Camencz vnd andern steten lehenen mannen manscheften
weipilden kirczzen vnd allen zugehorungen geystlichen vnd werntlichen vnd bei namen an den vorgen(anten) edilen herren von pack von
Garow vnd von Hackenburn iren erben vnd nachkomen vnd aller zugehorung nicht hindern beschedigen ansprechen noch beirren
wollen vnd geloben mit guten truwen an geuerde vnd mit dem vorgen(anten) gesworen eide das wir nach den vorgen(anten) landen herren steten
mannen manscheften vnd allen zugehorungen als vor geschriben stet nymmer gesten enwollen noch sollen mit ansprach anredunge
noch mit dheinen sachen geistlich odir werntlich wie man die genennen mag Ez sollen auch alle brife vnd hantfesten die wir von vns(er)m
vatter seligen odir von ymand andirs doruber haben vnkreftig vntugelich vnd allir sachen abesein vnd dem vorgen(anten) vns(er)m gnedigem
herren sinen erben vnd nakomen kunigen zu Behem keinen schaden bringen wan wir vns mit wolbedachtem mut vnd mit gutem
rat verczigen haben vnd verczihen genczlich vor vns vnsir erben vnd nakomen eweclichen aller derselben hantfesten vnd brife ob die
heine zu lichte quemen odir furbracht worden Mit vrkunt dicz brifes versigelt mit vns(er)m Jnsigel Gebn zu prage nach gots
geburte druczenhundirt Jar vnd darnach in dem acht vnd funfzigistem Jar am nehsten dinstag nach dem heiligen Jars tag