Wir fridrich Balthasar vnd Wilhelm gebruder von gotes gnaden Lantgrauen zcu Duringen Marggrauen zcu Myssen in dem Osterland vnd zcu Landesperg Grauen zcu Orlamund vnd herren des landes
zcu Plyssin Bekennen vnd tun kunt offenlichin mit disem briue allin den die in sehen od(er) horen lesen Daz wir mit wolbedachtem mute mit Rate vns(er) getruwen vnd irratin in guten truwen on
geuerd vns v(er)bunden habin vn(d) v(er)binden vns auch mit dem allerdurchluchtigsten fursten vn(d) herren h(er)n karl Romischem keis(er) zcu allin zcitin mer(er) des Richs vn(d) k(un)ig zcu Beheim vns(er)m liebin gne
digin herren sinen erbin vn(d) nachkumen k(un)igen zcu Beheim vnd gelobin mit geswornem eide fur vns vns(er) erbin vnd Nachkumen m(ar)ggrauen zcu Myssen Daz wir dem obgen(anten) vns(er)m herren de(m) keis(er)
als einem k(un)ig zcu Beheim sinen erbin vnd nachkumen k(un)ige zcu Beheim getruw vnd geholfen sin sullin vnd wellen ewiglich zcu behalden ire furstentum land H(er)rschaft erb gut ere recht
vnd gewonheit vnd die hilfe sullin vnd wellin wir tun mit aller vnser macht on geuerd wid(er) allermenglich niemand vzzunemen von den sie angriffen gehindert od(er) geschedigt wurden vn(d) die
an ire lib furstentum H(er)rschaft gut lant oder lut geistlich od(er) werltlich griffen wolten binamen an daz k(un)igrich zcu Bemen die kur vnd stime die ein k(un)ig zcu Beheim von wegen siner land
hat vn(d) habin sal an der wal eins Romischin k(un)iges eins k(un)ftiges keisers an die manschaft vnd lehenschaft d(er) nachgeschribin furstentum d(er) marken zcu Merh(e)n der H(er)czogtum zcu Troppow vnd
zcu Ratebor vnd d(er) H(er)czogtum zcu Lignitz zcu dem Brige zcu Munst(er)b(er)g zcu d(er) Ossen zcu Glogow zcu dem Sagen zcu Opul zcu S(te)inaw zcu falkenb(er)g zcu Teschen zcu d(er) kossel zcu Bytum zcu der
Stynow zcu S(we)intz(e)n die von dem k(un)igrich den k(un)igen vn(d) d(er) Cronen zcu Bemen zcu lehen ruren vnd an die fursten d(er)selbin lande od(er) an die lant grifen wolten den steten Bresslaw Numm(ar)kt fran
kenstain Namslaw Glogaw stinaw vnd Gor an die mark Budyssin vnd Gorlitz vnd d(er) stete zcu pirn an an die edeln h(er)ren von p(ar)k genant von Berow vnd die von Haselstain die des k(un)igrichs
vn(d) d(er) Cronen zcu Beheim erplich man sint vnd an die vesten H(er)ss(te)in Newenstat B(er)nstain Liechtenstain die d(er) Hochgeborn fursten h(er)n Ruprecht(es) des eltern vn(d) h(er)n Rup(re)cht des iung(er)n pfallentzgrauen
bi R(in) vn(d) H(er)czogen in Beyern vns(er) oheim rechtes erb gewesen sin vn(d) die sie dem obgen(anten) vns(er)m h(er)ren dem keis(er) wissentlich vnd rechtlich v(er)kouft habin vn(d) an die land vn(d) nachgeschribin vesten
vn(d) m(ar)kte Sultzbach Rosenb(er)g Neistat P(ar)enstain Hohenstain Hilpoltstain Liechtenek T(ur)nreut(er) frankenb(er)g Aurbach H(er)spruken Laufen felden vnd daz p(ar)k Eschenbach Begnitz Husek
Werdenstain vnd Ruprechtstain die etwenne des Hochgebornn fursten h(er)n Rudolfs seligen pfallentzgrauen bi R(in) vn(d) H(er)czogen in Beyern vns(er)s h(er)ren des keisers swester vn(d) vns(er)s oheim gewesen sint
die uf die obgen(anten) h(er)n Rup(re)cht den elt(er)n vn(d) h(er)n Rup(re)cht den iung(er)n vns(er) oheim nach tod H(er)czogen Rud(olfs) des obgen(anten) erplich v(er)uallin waren vn(d) die sie dem obgen(anten) vns(er)m h(er)ren dem keis(er) wissentlich recht
lich vn(d) redlich v(er)kouft habin vn(d) an allin and(er)n landen vn(d) vesten die d(er) obgen(ante) vns(er) h(er)re d(er) keis(er) in dutschin Landen hat mit allin iren zugehoringen vn(d) an die manschaft zcu plaw vn(d) an Bernow
daz auch des k(un)igrichs eigm ist vnd an Eger floz vn(d) p(ar)kstein vn(d) alle ander pfantschafte wie die genant sint vnd binamen zcu den Landen des hochgebornn fursten h(er)rn polken H(er)czogen
zcu d(er) S(we)idnitz vn(d) zcu de(m) Jauer vns(er)s oheim vn(d) w(er) d(er) selb H(er)czog innehat die d(er) durchluchtigen furstinn vns(er) frawen vnd mumen fraw Annen d(er) Romischin keiserinn als ein(er) k(un)iginne zcu
Beheim vn(d) ires libes erbin die sie mit vns(er)m h(er)ren dem keis(er) hat gehuldet gelobet vnd gesworn habin vnd an alle ire lant H(er)rschafte manschaft lehen vesten Burge stete gut vn(d) an alle
ire zugehoringe wo od(er) in welchin landen die gelegen sint die sie ytczunt habin od(er) furbaz in d(er)henewis gewinnen Vnd wenne wir od(er) vns(er) einer vns(er) erbin vnd nachkumen m(ar)ggrauen zcu Myssin
von wegen des obgen(anten) vns(er)s h(er)ren des keisers siner erbin vnd nachkumen k(un)igen zcu Beheim des ermant werden so sullin vnd wellin wir inwendig firczen tagen od(er) so wir schierst mugen nach dem
als der hulfe not geschiht one geuerd nach dem tage sulch(er) manunge in zcu hilfe kumen in d(er) maze als dauor begriffen ist Wenn ouch wir den egen(anten) h(er)ren zcu hilfe kumen od(er) vns(er) volk in
zcu hilfe senden So sullin sie vns od(er) die selbin die wir senden werden mit bier mit brote kuchinspise an swa man nicht zcu felde leget mit futer besorgen on geuerd Nemen wir ab(er) od(er) die
vns(er)n d(er)henen schaden des sint sie vns nicht pflichtig vzzurichten Gewunne wir aber inremand vesten die in vns(er)n landen beidsit nicht gelegen weren od(er) von vns beiderseit nicht zcu lehen
giengen die sullin wir brechin od(er) sullin sie glich mit einand(er) teiln swie vns daz allerbest geuellet Nemen wir ab(er) f(er)rner an vesten die in vns(er)n landen gelegen weren od(er) von vns zcu lehen gingen
der frume sal vns allein blibin We(re) aber daz wir od(er) die vns(er)n f(er)rner nemen an geuangen die sullin wir nach recht(es) m(ar)ngel gewapent lute glich mit einand(er) teiln zcu vrkund ditz briues
versigelt mit vns(er)n insigeln d(er) gebin ist zcu p(ra)g nach C(ri)st(es) geburt Driczen hund(er)t iar in dem acht vnd funfczigsten iar an dem nesten donrstag nach dem suntag als man singet Reminisc(er)e