Wir karl von gots gnaden Romischer keysir zu allen ziten merer des richs vnd kunig zu beheim Bekenne(n) offenlich an disem bryff allen den die yn sehent odir ho
rent lesen das der hochgeborn Wenczlaw herzoge in Slezien vnd h(er)re zu lignicz vnsir lieber oheim vnd furste in vnsir gegenwirtikeit bekennet hat das er dem hoch
geborn Bolken herzogen in Slezien h(er)ren zu der Swidnicz vnd zu dem Jawr vnsim liebn Swager vnd fursten rechte vnd redeliche v(er)kouft habe das halbeteil
der Stete zu brige vnd zu der olaw mit dem lande manne vnd allen zugehorugen in sulcher bescheidenheit Sei das sache das der egen(ant) vnsir Swag(er) h(er)zog
Bolke von der Swidnicz ane sines leibes erbn v(er)stunde das dan die egen(ant) Stete land manne vnd zugehoruge des halbeteils als douor begriffen ist vff
den egen(ant) h(er)zogen Wenczlan vnsin oheim vnd vff sine erbn ledicliche vnd vngehindirt widiruallen sullen Wer aber das der egen(ant) h(er)zoge bolke von der Swid
nicz vns(er) Swager sines leibes erbn nach sime tode liesse von den selben erben sol h(er)zog Wenczla(w) odir sine erben ob sin nicht were die egen(ant) Stete land
mann vnd zugehoruge des halbenteils als douor begriffen ist vmb dritthalbtusent mark polonyscher zal behemischs gross(er) vor die mark achte vnd vierzig
grossen zu ritten ledige vnd losen vnd derselben losunge sol man h(er)zogen Wenczlaen vnd sinen erben gehenge ane widirrede vnd an alles hindirnisse Were
ouch sache das vns(er) Swag(er) von der Swidnicz deheinerlei gut rente gulde odir andirs was das were binne dem halbenteilen das yme geboren wirt als
vor begriffen ist koufen odir losen wurde was er dasselbe koufen odir losen wirdet das sal genzliche vnd ane alles gelt nach vns(er)s Swagers von der Swid
nicz tode ob er sines leibes erbn nicht lisse an den vorgen(ant) h(er)zogen Wenczlaen vnd sine erbn geuallen liesse aber vns(er) Swag(er) von der Swidnicz nach sime
tode sine leibes erbn wan den erben die egen(ant) dritthalbtusent mark beczalet werden als vor geschribn steet so sulle dan ouch dieselben gekoufte odir ge
loste gut vff vnsin oheim h(er)zogen Wenczlaen vnd sine erbn ane alle hindirnisse widirualle Ouch hat der egen(ant) h(er)zoge Wenczlaw dem hochgeborn ludwi
ge sime brudir vnsin oheim gelobet in vns(er) gegenwortikeit als er ouch yczut hat bestalt das vns(er) Swag(er) der h(er)zog von der Swidnicz an h(er)zog Wenczlan
stat vnd von sinen wege vor den Steten zum brige vnd zu der olaw vnd vor den Edeln luten derselbe lande die egen(ant) Stete lant manne vnd zugehoruge mit
dem vorgen(ant) h(er)zogen ludwigen odir sinen erbn teilen sal glich in zwei teil zwissin hie vnd pfingsten die schirst kunftig sein in aller wise als ein brud(er) mit
dem and(er)n mit gotliche losze billiche teilen sol ane geuerde Vnd welcher teil in derselbe zeit dem h(er)zoge von der Swidnicz von h(er)zogen Wenczlaws wegen
vnd an siner stat geboret vnd geuellet dar an sal der egen(ant) h(er)zoge ludwig vns(er) Swag(er) den h(er)zogen zu der Swidnicz vnd ouch h(er)zogen Wenczlaen vnd ir bei
der erbn nicht hind(er)n noch sie vord(er)s ansprechen mit dem rechte odir sust in deheine weis Sundir er hat vor vns bekennet er wolle yme an solicher teiluge
genugen lassen also das vns(er) Swag(er) h(er)zog bolke von der Swidnicz vnd h(er)zog Wenczla(w) vns(er) oheim vnd ir beidir erbe an dem teile der yn geburet vngehind(er)t
bliben sulle vnd hat ouch gelobet in guten truwen ane geuerde das er sie in besiczuge in gewere vnd in behaldug des selbe halbenteils furd(er)n sal vnd yn ouch
beholfen sin mit aller siner vermoge des halbenteils der yme an der teiluge geboren wirdet als vor begriffen ist ane argelist vnd geuerde vnd dasselbe habe die
egen(ant) h(er)zog bolke vns(er) Swag(er) vnd h(er)zog Wenczla(w) vns(er) oheim vor sich vnd yre erbn dem egen(ant) h(er)zog ludwige vnd ouch sinen erbn in stete gute trwen gelobet
zu sime halbenteil in aller der mazze vnd wise als douor begriffen ist Vnd wan die egen(ant) Stete zum brige vnd zu der olaw mit landen manne vnd alle zu
gehorugen von vns als von eime kunig zu beheim vnd von der Cronen desselbe kunigrichs zu lehen rurent So han wir als ein kunig zu beheim von bete we
gen beidir partien vnsin wille gunst vnd gehengmisse getan zu alle den egen(ant) sachen vnd tun sie dar zu an disem briue Mit vrkunt dicz briues versigelt mit
vns(er) keysirlicher maiestat Ingesigel Geben zu prage nach christs geburtz druczenhundirt Jar vnd dar nach in dem Acht vnd funfzigsten Jare an
dem nehsten Sunabent nach sente markus tag des heiligen ewangelisten Vns(er) Richs in dem zwelften vnd des keisirtums in dem dirden Jare