Wir Ludweig genant der Romer von gots gnaden Marggraff zu Brandemburg vnd zu lusicz dez heilgen Romischen Reichs obrist(er) Camer(er) pfallenczgraff bey Rein
vnd herczog in Beyern Bekennen vnd tun kunt offenlich mit diesem brieff allen den die in sehen oder horen lesen Wann vormals die Stat zu Eger mit dem
Lande vnd die Vesten flozz vnd parkstein mit yren zugehorungen den hochgebornen kunigen zu Beheim vnd der Croney desselben kunigrichs Vor Vierzcig
tausent Mark lotiges silbers Von wegen des heiligen Romischen Reichs zu rechtem pfande versaczt sein vnd wann wir vnd ander vnser Mitkurfursten mit
warhaftiger kuntschaft wol vnderweiset sein daz flozz die Vesten vnd waz dorzu gehort dez kunigrichs zu Beheim recht eygen ist vnd von vnwezzen vnd irre
sal dem egen(anten) kunigrich zu Beheim zu pfande worden ist in der weise als vns(er) vnd and(er) vnser Mitkurfursten briefe die wir doruber geben habn Volkumenlich
ist begriffen douon vnd vff die rede daz die hochgebornen kunige zu Beheim vnd die crone desselben kunigrichs in der and(er)n pfantschafft vngehindert beliben
Sint demmal daz flozz als Vorgescribn ist ir rechtes eigen ist vnd dorumb ir pfant nicht gewesen mag So meinen sprechen vnd lutern wir mit wolbedachtem
muet als ein kurfurste dez heiligen Reichs vnd obrist(er) Camer(er) daz die obgen(anten) hochgeborn kunige zu Beheim ir Erben vnd nachkomen ewiclich vnd die Crone
desselben kunigreichs zu Beheim die obgen(anten) Vierzcigtausent Mark lotiges silbers vff die Stat zu Eger vnd dem Lande vnd ouch vff der Vesten parkstein vnd
iren zugehorungen haben sullen als die pfant briefe sagen die Von des Romischen Reichs wegen doruber geben sint glicherweis als ob flozz in der egenan(ten)
pfandungen nie benennet were Mit vrkund diz briefs v(er)sigelt mit Vns(er)m Insigel der geben ist zu prag nach Crists geburt dreuczenhund(er)t Jar Vnd darnach
in dem Sechczigisten Jar an Vnser frawen abend liechtmesse