Wir Karl von gots gnaden Romischer keiser zu allen zeiten merer des Reichs vnd kunig zu Beheim Bekennen vnd tun kunt offenlich mit disem brieff allen den die jn sehen oder horen lesen Wann wir redlich bedenchen swerer sachen vberphluzzikeit die vns von des heiligen Romischen Reichs
wegen jnruwen So vinden wir vns demselben Reich vntwiffellich gebunden wann wir von des teutschs wegen keiserliche wirdikeit besizen Auch sint wir phlichtig vnser kunigreich zu Beheim zu furdern Vnd zu hohen Wann ez ist ein hoch vnd edler gelid desselben Reichs Vnd da
sein hohunge dem Reich kumpt sunderlich zu krefften Vnd zu wirden Des haben wir vnder andern sachen die wir neheste mit den Erwirdigen Vnd hochgebornen kurfursten besorget Vnd geainiget haben mit namen Vnd sunderlichen bedacht den wir mit gots hilfe neheste durch not
durft willen mit mechtigem her gen Swaben zogen sind also die Vesten Rihalin vnd hohenstauff die des Reichs eigen sint Vnd lange zite von danne entfremdet sint gewest jngewalt vnd aigenschaft des heiligen Reichs widgebracht haben Vnd zu derselben zite die Vesten
Luterburg Vnd Rosenstain Vnd die Stette Alen Vnd heubach von den Edlen Ludwigen den Eltin vnd Ludwigen den Jungen Grafen zu Oetingen vnsern lieben getwen recht vnd redlich von vnsers kunigreichs vnd der Cronen zu Beheim gelt vmb gut zu demselben kunigreich
vnd der Cronen zu Beheim gekoufet haben Vnd sie zu demselben kunigreich vnd der Cronen jngelaibet geeigent vnd geainiget furbas bedachten wir mit den vorgenanten kurfursten allain dieselben Vesten Rihalin Vnd hoenstauff da jn selbes dem Reich wol nuz sein doch waz not
durft daz sie mit bygelegen vesten Vnd guten gestewret vnd gebewet wurden Vnd daz ein sulche stewr vnd nuzunge derselben Vesten Rihalin vnd hoenstauff wol geschehen mochte den leuten gar nuzze vnd frummen mit einem wechsel vmb die obgenanten Vesten Luterburg Vnd Ro
senstain Vnd den Stetten Alen Vnd heubach Vnd jren zugehorungen wann dieselben Vesten Vnd stette den egenanten Vesten Rihalin vnd hohenstauff nahen bygelegen sint Vnd jr gemerke bydenhalben sich an einander ruren Auch bedachten wir mit den egenanten kurfursten jn gutem rate daz
die Veste Parkstain Vnd karlswald gelegen jn dem Egerland mit hundert lehen acker die da zu gehoren Vnd waiden die Stette mit jren guten dorfern zugehorungen Vnd gepieten allain sie des Reichs sein doch so sint sie biz gelegen dem kunigreich zu Beheim Vnd den Landen die wir zu
demselben kunigreich zu Beheim vber walt jn Beyern gewunnen haben wann dem Reich Vnd die Vesten Luterburg vnd Rosenstain dem heiligen Reich vnd die Vesten parkstain vnd karlswald dem kunigreich vnd der Cronen zu Beheim nuzlicher vnd beidenthalben baz gelegen sint vnd frumen tra
gen mugen also daz allez jn der warheit funden ist von befelhen die die kurfursten darzu getant haben davon nicht durch lieb vnsers angeboren kunigreichs noch durch haz vnser erben vnd nachkomen Sunder durch goteliche recht vnd vnser gewissen jn sulchen sachen die wir
mercken daz sie dem heiligen Reich vnd vnserm kunigreich zu Beheim desselben Reichs wirdigem gelid vnd furstentum mer nuzes vnd eren brengen mugen Haben wir mit wolbedachtem mute vnd vollem rate der obgenanten kurfursten vnd ander fursten vnd Edler des heiligen Reichs besunne
vnd aintrechtig betrachte die obgenanten gut an eynander zwisschen dem Reich an einem teil vnd dem kunigreich zu Beheim an dem andern zu wechseln des haben wir als ein Romischer keiser mit rate vnd willen derselben kurfursten jn vnserm vnd des heiligen Reichs namen mit
dem hochgebornen Johansen marggrafen zu Merhern vnserm lieben bruder Vnd fursten als mit vnserm vnd des kunigreichs zu Beheim verweser vnd pfleger die obgenanten Vesten Luterburg vnd Rosenstain vnd die Stette Alen vnd heubach mit jren dorfern guten gepieten vnd allen zu
gehorungen vmb die obgenanten Vesten parkstain vnd karlswald vnd vmb die Stette an der weiden vnd jr aller dorfer gut vnd zugehorungen mit ganzem rechten grunt aigenschaft vnd herschaft lehen swar recht vnd redlich verwechselt vnd verwechseln an disem brieff mit keiserlicher
macht vnd rechter wizzen Vnd wir als ein Romischer keiser mit keiserlicher macht von wegen vnd jn willen sulches wechsels haben vns vnzogen vnd vnzichen vff die obgenanten Vesten parkstain vnd karlswald vnd vff die Stette zu der weiden vnd vff alle jre gut dorfer herschaft recht
vnd zugehorungen vnd entlahen beynen vnd eygen ewiclich dieselben Vesten stat vnd alle zugehorunge dem kunigreiche zu Beheim vnd seiner edlen Cronen vnd ainlaiben aigenen vnd ainen sie ewiclich jn dasselben kunigreiche zu Beheim Vnd seiner Cronen aigenschaft recht herschaft
grut vnd erbschaft mit rechter wizzen zubleiben ewiclich vngeschaidenlich mit erplichen rechten Vnd die obgenanten Vesten Luterburg vnd Rosenstain Vnd die Stette Alen vnd heubach mit allen jren dorfern guten gepieten Vnd zugehorungen hat vnser egenanter bruder der marggraf zu
merhern jn namen sulcher pflege vnd verwesens als davor begriffen ist jn sulchen wechseln vor vns vfgegeben Vnd haben wir die als ein keiser vfgenomen vnd sie dem heiligen Reich vnd seiner Camer eingelaibet geeigent vnd geainiget Vnd ainlaiben ainen vnd eygen sie
jn desselben Reichs gewalt recht herschaft vnd aigenschaft ewiclichen zu bleiben furbaz haben wir gelobt vnd geloben mit disem brieff als ein Romischer keiser vor vns vnd vnser nachkomen Romische kunige vnd keiser Vnd hat gelobt vnser obgenanter bruder der hochgeborn Johans
marggraf zu merhern als ein verweser Vnd pfleger als davor begriffen ist von vns als von einem kunig zu Beheim darzu gesazt vor vns vnser erben vnd nachkomen kunige zu Beheim den obgenanten wechsel jn allen seinen stucken ewiclich stet vnd ganz halten vnd jn jncheinen ziten
dowider nichtes zutun noch zu suchen mit recht oder mit tat mit vns oder ander personen jncheinenweis domit sulcher wechsel gehindert oder abgen mochte Auch haben wir der obgenanten keiser karl als ein Romischer keiser fur vns vnd vnser nachkomen Romische kunige vnd kei
vnd der egenant vnser bruder marggraf Johans zu merhern von der obgenanten pfleg wegen fur vns vnser erben vnd nachkomen kunige zu Beheim mit rechter wizzen vns verziegen vnd vnzichen an allen den obgeschriben sachen Vnd was darauz enstan mochte jncheinenweis als davor
begriffen ist aller anspruch rechtes vnd forderunge Vnd aller hilfe Geistliches vnd werltliches rechtes domit wir beidenthalben vns behelfen mochten oder vns sulche sache vnd wechsel jmmermer mit recht oder mit tat jn gericht oder vzwendig gerichtes oder domit sulche
sache vnd wechsel abgen geqwelet mochte oder gebrochen werden jncheinenweis ob auch von rechtes wegen notdurft were daz sulche recht wie die genant sint mit namen solten jn disen briefen werden gelautert vnd von worte zu worte geschriben furbaz wir karl der obgenant
keiser tun abe vnd erfullen mit rechter wizzen Vnd mit keiserlicher macht volkomenheit allen gebrechen der jn den obgeschriben dingen oder jr jnlichen geschehen were der lautt etlich phantasi vnd arglist gedenken woren Vnd fest an worten oder an worten oder andern dingen
da durch alle die obgenanten sachen jn kunftigen ziten vndersprochen gehindert oder geswechet werden mochten jncheinenweis Vnd wollen mit disem keiserlichen gesetze daz den alles genge wast Vnd macht habe vnd ewiclich bestendikeit an allen seinen stucken artickeln
vnd puncten also daz jn allen disen sachen alle recht gesproben oder gewonlich oder geseze die dowider lauten oder sulche ding anders sezen besunderlich so wann wir alle sulche recht abnemen also vber sie die obgenanten sachen jren mugen Wir gebieten von allermeclich
niemand vzgenomen der niemant disem gegenwurtigen Vnserm keiserlichen gesetze jmmermer tun jncheinenweis Wer aber dawid tete der sei jn vnsers vnd des Reichs groz vngnade vallen als oft daz geschehe Vnd jn pene Tausent mark lotiges goldes der halben teil jn des Romischen
Reichs Camer Vnd der ander halbeteil jn eines kuniges von Beheim Camer der jn zeiten wirdet vnwiderruflich gar vnd genzlich gevallen Mit vrkund diz briefs besigelt mit vnser keiserlichen maiestat Jnsigel Der geben ist zu Nurenberg nach Cristus
geburt Dreuzenhundert Jar darnach jn dem Sechzigisten Jar an dem nehesten donerstag nach sand Endres tag des heiligen Aposteln jn vnsern Reiche jn dem funfzehenden Vnd des keisertums jn dem Sechsten Jare