Wir Eberhart von hohenberg der schulmeister vnd daz capitel ge meindich des Goczhaus zu
Babenberg bekennen vnd ver ichen vffenlich an diesem briefe daz wir in genumen
vnd enphangen haben von vnserm gnedigen h(er)ren h(er)r karolo dem aller ge waltigesten
keyser von Rome vnd kunege zu beheim tausent phu(n)t haller die er vns bezalt vnd
ge wert hat vm vnsers vnd vnsers goczhaus gut vnd gulte die wir heten zu erlangen
vnd die wir ime ver kauft haben mit worte vnd mit willen des erwirdigen h(er)ren
h(er)ren Leupolt(es) vnsers pyschofs zu Babeb(er)g vnd sagen in dar vm ledig vnd loz vnd
geben ime dar vber diesen quit brief der v(er)sigelt ist mit vnserm anhangenden in
gesigel. Der brief ist geben da man zalte noch crist(es) ge purt tausent iar vnd
dreu hundert iar in dem ein vnd seczegestem iare an dem heilegen crist(es) abende