Wir Rudolff von gotes gnaden Herczog ze Sachssen des heiligen Römisch(en) Reichs Obirster Marschalk bekennen vnd tůn kunt offenlich mit disem brieff allen den die in sehent oder hörent
lesen Wann der Allerdurchleuchtigiste fürst vnd herre Herr Karl Römischer keiser zu allen zeiten merer des Reichs vnd künig zu Beheim vnser lieber genediger herr ym als eyme
künig zu Beheim seinen erben vnd nachkomen künigen zu Beheim vnd der Cronen des künigrichs zu Beheim des Reichs Vesten Adelburg die vor vil Jaren vmb vier vnd
czweynczighundert schok grozzer pfennig Prágischer Münze von dem Reich vpfant vnd versaczt ist als dorüber aller kürfürsten brief zu den zeiten geben sint vmb die
selb Sume geltes recht vnd redlich gelöset hat mit seinem eygen gelte daz er von seinem erblichen künigrich zu Beheim dorzu genomen vnd bezalt hat als vns wol
wissentlich ist Vnd wann dieselb Veste Adelburg mit allen iren zugehörungen in pfandes weiz nützlicher vnd gewiglicher vnd zu grözzern eren dem Reich ist in eines küniges
zu Beheim handen der des heiligen Reichs kurfürst ist wenn in ander leute handen vnd er sie bas dem Reiche enthalden mag vnd kan wenn ander leute So habn wir der obgen(ant)
Rudolff herczog zu Sachssen als ein Oberster Marschalk des Reichs vnd ein kurfürst mit wolbedachtem můte vnd gůtem Rate ander vnser Mitkurfürsten zu der vorgen(ant)
lösunge der Vesten zu Adelburg vnd aller ir zugehörungen vnser gunst rat vnd willen mit rechter wizzen gegeben vnd bestetigen die in allen iren puncten worten vnd
Artikeln als sie begriffen ist fürbas sintdemmal dieselbe Veste Adelburg nicht wol erpawet ist sunder pawfellig ist vnd teglich an irem gebewde köstlicher besserunge bedarff
als wir worhaftiglich erfaren habn So habn wir mit and(er)n vnsern Mitkurfürsten sulche notdurft bedacht vnd fleizziglich besunnen vnd vff die rede daz die egenant Veste
nicht zemal verdirbe vnd dernydergee seyn wir vnd dieselbn vnser Mitkurfürsten eyntrechtiglich des zerate worden vnd geben dorzu vns(er)n willen vnd gunst mit rechter wizzen
als ein kurfürst vnd ein Oberster Marschalk des Reichs daz derselb vnser h(er)r der keyser vnd sein erbn vnd nachkomen künige zu Beheim an gebewde vnd besserung Můren
vnd Graben der obgen(ant) Vesten zu Adelburg vierhundert schok grozzer pfennig pragischer Münze legen vnd vertůn mügen als des not ist vnd wirt vnd als sie
daz allerbeste vnd nütze dunket vnd daz der egenan(t) vnser herre der keyser als ein künig zu Beheim sein erben vnd nachkomen künige zu Beheim die vorgen(ant) Vesten ze Adel
burg mit allen iren zugehörungen eren gülten rechten vnd nützen zu rechtem pfande also lang halden haben nützen vnd besiczen gemächlich vnd gerülich an alles hin
dernizze vnz an die zeit daz ein Reiche die vorgenant Vesten mit ir zugehörunge vmb die egenan(t) vier vnd czweynczig hundert schok vnd ouch vmb die vierhundert schok
der obgen(ant) grozzer pfennig die man verbawen sol von einem künige zu Beheim der in zeiten wirdet genzlichen geledigt vnd gelöset In vrkund diz briefes versigelt
mit vns(er)m anhangendem Insigel Der gebn ist ze Nüremberg nach Cristus geburt dreuczehenhundert Jar dornach in dem czwey vnd sechczigsten Jar an dem nehsten donrs
tag nach dem Sontag als man singet Reminiscere in der vasten