vnd des kúngreichs zu Beheim die Burg zu Podyebrad mit iren guten vnd was dorzu gehoret in crefften eynes nugen wechsels etwenn dem edlen Heinrichen von Sleben vnferm lieben ge
trewen vmb die vesten zu Sumerburg die man Konowig zu Behemischen nennet vnd vmb das Bergwerk zu dem Buchperg vnd vmb alles das zu der Burge vnd zu dem Bergwerk gehoret rechte
vnd redlich mit gutem rate seyner getrewen vndertanen zu rechtem lehen geben vnd verlyhen hat als ouch der egenan(te) Heinrich von Sleben dieselbe Burg zu Podyebrad in krefften eyns edlen
manlehens vil Jar fridlichen vnd in gemachsamer gewere behalden vnd besizzen hat Des haben wir gemerket mit fleizzigen mute das die egenan(te) Burg zu Podyebrad mit den guten die
dorzu gehoren als sie hernach mit sunderlichen worten leutirlich benennet sint zu der herschafft vnd eygenschafft der kunge des kúngreichs vnd der Cronen zu Beheim von alter ane mittel
nicht gehoret haben Sunder das dieselbe Burg zu Podyebrad vnd was dorzu gehoret von todes wegen eyns edlen mannes eyns herren zu Beheim den kungen dem kúngreich vnd der
Cronen zu Beheim verfallen sint Vnd haben gemerket das von sulcher gabe als vnser vater seliger getan hat vnsers kúngreichs zu Beheim wesen bezzer worden ist vnd das vnser kúngliche
wurde als vil desthoh(er) geeret ist So wir mit mer mannen dienern vnd getrewen vndertanen gesterket werden Wenn ouch eyn yelich ding leuchtiglich zu seinem ersten wesen widerbracht
wirdet So dunket vns nicht vnbillich das die Burg zu Podyebrad mit iren zugehorungen von genaden eyns kunges zu Beheim eynem edlen manne zu lehen geben vnd verlihen werde
Wann vns wol vnd leutirlich kunt ist mit rechter wizzen das dieselbe Burg von alter eyn Bohemische herschafft gewest ist Dauon wann wir vollenkomenlichen merken das von sulcher
lehenschafft vnser vnd vnserr nachkomen kunge zu Beheim des kúngreichs vnd der Cronen zu Beheim ere vnd wirde gebreitet wirdet So haben wir durch sunderliche bete des egenanten
Heinriche von Sleben der vns vmb sulche sachen die weil er lebt demuticlich vnd mit legerung seynes herzen ynniglich gebeten hat angesehen die getrewen steten dienste des edlen Bozken
von der Cunstat des egenan(ten) Heinriche eydem domit er vns mit rechtem fleizz vnd in guten trewen beheglich gewesen ist vnd nach in zukunfftigen zeiten alsovil dest getrewlicher vnd dest fleiz
ziclicher dienen sol vnd er wol nu dirkennet das wir yn mit grozzen genaden meynen Vnd dauon als wir wimals mit vnsern lateynen brieuen die weil wir Romischer kúnig waren vnder
der guldynen Bullen getan haben also tun wir ouch in dysen zeiten mit vnsern deútschen brieuen das wir mit wolbedachtem mute nicht von vngeual der vnbesichticheit Sunder mit gutem rate
der herren vnd der edlen vnsers kúngreichs zu Beheim nicht betrogen mit dheinen listen sund(er) mit rechter vizzen haben verlihen vnd verleihen ouch als eyn kúnig zu Beheim dem egenant(en)
Bozken von der Cunstat vnd seynen elichen erben mannes geslechte nur den alleyne die von seinem leibe bekomen zu rechtem edlen manlehen nach gewonheit deuzer lande vnd nach deutzschem
rechte die egenan(te) Burk zu Podyebrad mit allen iren guten vnd den nachgeschriben dorfern Sytnur Dobirschaw Pczely Wokyn Chrast Welen Sazka mit dem Vorwerk Hradissko Pyest
Zwierzynetz Zbiduhg Polabeg Sokolay Cluk Ossek Gbozie Podyebrad Kuck Patek Chotyeczye Strzieschlaw Wyekotysazze mit dem houe zu Babyn vnd mit dem newen houe mit allen
gemerken Greinzen kreuzen Vnderscheiden houen Vorwerken Pfflugen Erttrichen Ekkern wysen Weiden Holczen dienern knechten leuten Wachtern Czinsen eren Bergen Grunden
Slichten Welden Púschen Streuchin Geyegden Jagern Walthutern wazzern Bechen wazzerleuffen mulen Teychen Vischereyen Vischern Vogelweiden Gerichten Richtern vnd allen and(er)n
nuzen fruchten Rechten Gebieten kirchlehen die mit der gemeynschafft der andern dinge sich ergeen sullen mit allen zugehorungen besucht vnd vnbesucht geart vnd vngeart die er do
hat oder haben wirdet in aller der mazze als die egenan(te) Burg zu Podyebrad mit den egenan(ten) iren zugehorungen vff vns recht vnd redlich verfallen ist von tode des egenan(ten) Heinriche von Sleben
der ane erben mannes geslechte gestorben ist Mit sulchen vnderscheide das der egenan(te) Bozke vnd seyne erben mit demselben lehen vnd was dorzu gehoret vff vns vnser erben vnd nachkomen kún
ge zu Beheim vnd vff die Crone des kúngreichs zu Beheim als vff ire fursten vnd vff ire naturlichen ordenlichen lehenherren zuversicht haben sullen vnd sullen dauon vns vnsern erben vnd
nachkomen kungen zu Beheim vnd der Cronen des kúngreichs zu Beheim ere gehorsam vnd ouch wirde alleweg erbieten Vnd dorzu wenn seyn not wirdet vnd man des bedarff So sullen sie vns
vnd den egenan(ten) vnsern erben vnd nachkomen kungen zu Beheim vnd der Cronen des kúngreichs zu Beheim schuldiger trewen dienste tun nach recht vnd gewonheit anderr lehenmanne des egen(anten)
vnsers kúngreichs Vnd bynamey sullen nach mugen sie mitnichte noch in dheynenweis das egenan(te) lehen der Burge zu Podyebrad noch die gut dorffer vnd besitzunge vnd was zu derselben
Burge gehoret gar noch eyns teyles versetzen vorkaufen entpfremden oder sust bekummern ane vnser vnser erben vnd nachkomen kúnge zu Beheim sunderliche laube Ouch globen wir nu
als wir fúr vns vnser erben vnd nachkomen kúnge zu Beheim das wir den egenan(ten) Bozken vnd seine eliche erben mannes geslechte nur die alleyne die von seynem leibe bekomen bey dem
egenan(ten) lehen vnd bey allen rechten freiheiten hantfesten genaden freyungen vnd gunsten ander lehenmanne nach gewonheit deuzer lande vnd nach ordenunge deuzes rechten schirmen
vnd behalden wollen ewichlich als fursten vnd lehenherren iren lehenmannen vnd iren vndertanen von wegen obirster herschafft durcht recht oder gewonheit pflichtig vnd vorpunden seyn
Ouch meynen vnd wollen wir vnd leutern das mit wolbedachtem mute als wir wirmals getan haben das sulche gabe vnd lehen die wir durch lauter vnd sunderliche genade getan haben sich vff bru
der frunt oder mage des egenan(ten) Bozken mitnichte breiten sullen wann wir dieselben nur ym vnd seinen elichen erben mannes geslechte die von seinem leibe bekomen wirmals gemeynet haben in
andern vnsern brieuen vnd ouch mit rechter vizzen in dysen brieuen meynen Mit vrkund dis brieues versigelt mit vnsers keyserlichen maiestat Ingesigel der geben ist zu Prage Nach Crists
geburte dreyzenhundert Jar darnach in dem Zwey vnd Sechzigstem Jare des nehesten freitags nach sant ffrancisken tage Vnser Reiche in dem Sybenzendem vnd dem kirstums in dem Achtem Jare
Ad mandatum d(omi)ni
Jmperatoris Ernest(us)