Wir Stephan der elt(er) wir Stephan ffrid(erich) vnd Iohans gebrud(er) sein sun von gotes genaden phallentzgrauen bey dem rein vnd Hertzogn in bayrn bekennen
mit disem brief vnd tun kunt alln leuten di in sehent oder horent lesen daz wir mit dem allerdurchleuchtigisten fursten vns(er)m liebn genadigen h(er)rn
h(er)rn karel Romisch(er) kayser czu alln czeiten mer(er) des reichs mit wolbedachtem mut mit reit(er) wegen aintrahtigchleich vber ain komen sein in aller der
weis als her nach geschribn stet des ersten daz wir den Hertzogn von Ostreich di ieczt sint iren erbn vnd nachkomen hertzog(e)n zu ost(er)reich vnser lebtag nicht be
holfen sulln sein wider den egn(annten) vns(er)n genadigen h(er)rn h(er)rn karel den Romisch(e)n kayser vnd wid(er) daz Romisch reich vnd was dar czu gehort mit vns(er)m
hertzogtum czu bayrn vnd was dar czu gehort es sey aigen oder lehen auch sulln wir obg(enannten) hertzogn zu bayrn alln vns(er)n grauen ritt(er)n vnd knechten vns(er)n
burg(er)n gemain(e)n vnd alln vns(er)n vnd(er)tanen in vns(er)m land czu bayrn di dar czu gehoren vnd vns vnd(er)tanig vnd gehorsam sint vnser lebtag nicht ge
statten sulln daz si mit iren vesten sloszen leuten leib vnd guten in dhain weis den vorg(enannten) hertzogn von Ostreich iren erbn vnd nachkomen hertzogen
zu ostreich wid(er) den egn(annten) vns(er)n genadigen h(er)rn h(er)rn karel den Romisch(e)n kayser daz reich vnd was dar czu gehort helfen sulln od(er) mugen an arglist vnd
geuer was auch vnser obg(enannter) genadig(er) h(er)r als ein Romisch(er) kayser auf di vorg(enannten) hertzogn von Ostreich ir erbn vnd nachkomen hertzogn zu ostreich mit
recht ertodten od(er) erlangen dez sulln wir in als hertzogn von bayrn mit alln vns(er)n inuign mit dem hertzogtum czu bayrn beholfen sein daz er
zu seinem rechten daz er also erlangt hat werde komen an arglist vnd geuer Es sol auch vnser obg(enannter) genadig(er) h(er)r h(er)r karel der Romisch(er) kayser als lang
wir in krieg sein vnd beleibn mit den vorg(enannten) hertzogn von ostreich iren erbn vnd nakomen hertzogn zu ostreich vns di grafschaft zu tyrol vnd
was dar czu gehort di hochgeborn ludweigen vnd Otten marggrafen czu brandburg vnser lieb(e)n brud(er) vnd vettern auf haltn als ver(r) er mag daz
si vns obg(enannten) hertzogn von bayrn als lang der obg(enannte) krieg wert vmb daz ob(er) land zu bayrn nicht ansprechent werdn wolten aber di obgen(annten)
marggrafen von brandburg vnser lieb(e) brud(er) vnd vettern vns(er)m obg(enannten) genadigen h(er)rn des nicht geuolgig sein so sol er in als lang d(er) selb krieg wert mit
den egn(annten) hertzogn von ostreich iren erbn vnd nachkomen hertzogn zu ostreich wid(er) vns obg(enannten) hertzogn von bayrn nicht beholfen sein mit vrleug
vnd mit krieg vnd wenn d(er) obg(enannte) krieg mit den obg(enannten) von Ostreich v(er)sunt ist so mag vnser obg(enannter) genadig(er) h(er)r yetwed(er)m tail beholfen sein zu
seinem rechten ob er wil auch sulln wir vns(er) vorg(enannten) hertzogn von bayrn mit den egn(annten) hertzogn von ostreich iren erbn vnd nakomen hertzogn
zu ostreich nicht saynen wir neme dann in d(er) sunung aus daz wir den vorg(enannten) hertzogn von ostreich iren erbn vnd nachkomen hertzogn zu
ostreich wid(er) den vorg(enannten) vns(er)n genadigen h(er)rn h(er)rn karel den Romisch(e)n kays(er) vnd daz reich sein lebtag nicht beholfen sulln sein in dhain weis wer ab(er)
daz vns(er) obg(enannter) genadig(er) h(er)r oder daz reich sein lebtag von vns(er)n wegen in krieg komen gen den obg(enannten) hertzogn von ostreich iren erbn vnd nach
komen hertzogen zu ostreich so sulln wir vns mit den selbn von ostreich nimmer trichten an vns(er)n wizzen vnd wort des obg(enannten) vns(er)s
genadigen h(er)rn h(er)rn karel des Romisch(e)n kayser an arglist vnd geuer Vnd all di obg(enannten) sach vnd zu stetichait besund(er) habn wir fur vns in guten truwen
an aydes stat gelobt vnd gelobn mit kraft ditz briefs stet vnd vest czu habn vnzerbrochenleich zu behaltn vnd da nind(er)t wid(er) ze tun in dhain
weis Vnd des zu vrkund vnd ewig(er) warhait habn wir obg(enannten) hertzogn von bayrn vns(er)e Ingsigel an disen brief gehangt d(er) gebn ist czu
prag nach cristes geburt dreuczehn hund(er)t iar dar nach in dem vier vnd sechczigisten iar des nahsten dornstag nach dem obristen tag