Wir Karl von gotes genaden Romischer keyser zu allen zeiten merer des Reichs vnd kung zu Beheim Bekenne(n) vnd tun kunt offenlich mit disem brieve allen leute(n) dy yn sehent odir horent
lesen Wan wir durch sunderlich gute vnd genade als wir den hochgeborn Otten marggraven zu Brandemburg des heiligen Reichs obirsten kamerer vns(er)n lieben oheim vnd Herzog
in Bayern vnsern lieben Eydem vnd fursten freuntlich meynen ym gelobet haben in guten tru(e)n one allerley geuerde das wir ym di hochgeborn Elizabeth vnser tochter zu seiner elichn
husvrowe geben sulle(n) vnd haben auch gelobt das wir ym mit vnser tochter seiner gemaheln zu yren rechtem liebgdinge zwenzig tausent schok prager pfenninge gut(er) gancze
mit gereitem gelde genczlich geben vnd bezalen sullen vnd sulln inwendig sechs Jaren ancuzehen von sande walpurg tag der nehst kumt der hat vns vnser egnante(r) Eydem in
guten truwen gelobt ane geuerde mit worten gewissen das er vns(er) egnante tochter auch zu yrem liebgdinge dreyzg tausent schok der egnanten pfenninge vnd dorzu di vor=
genanten zwenzig tausent schok yres liebgdinges bewisen sull vnd sol bynnen sechs wochen von datum dicz brieves ancuzehen vff der stat zu frankenford vff der odere
vff der wogte zu lubus vff m(u)ncheberg mit allen yren zugehoringen vnd vff den staten strusberg agittenwalde vnd vff kopeznik vnd was dorzu gehoret In sulcher meynun(n)
hat hat es das vnse(r) egnante(r) Eydem vnd tochter sturben vnd erben von yrem leibe nitt eynander lissen an di erben sol das liebgdinge genczlich gevallen wer es abir
das sey keine erben mit eynander hetten vnd ir aines sturbe vnd das ander lebentig blebe so sol das ander das do lebentig beleibt sine lebetage das vorgenante liebgding
zu auch genczlichen behalden on alles hindernus wer iz auch das vnser Eydem vnd tochter beide sturben on liebes erben so sullen denne di dreyzg tausent schok vnd
dar uor strusberg agittenwalde vnd kopeznik vnd was dorzu gehoret an den hochgeborn ludewigen Marggraven Otten brudir vnd an sine erben von sinem leibe vnd erbes
erben mannes geslechte vnd an di marke zu Brandemburg ledichlichen widir gevallen vnd sullen denne ouch di zwenzig tausent schok vnd dar vor di stat zu frankenford
di wogte zu lubus vnd m(u)ncheberg mit allen yren zugehoringen an vns als an eynen kung zu Beheim an vnser erben vnd nachkomen kunge vnd an di crone desselbn
kungreichs zu Beheim lediclich gevallen Also das wir vnser egnanten erben vnd nachkomen vnd das kungreich zu Beheim sy als lange ynnehaben besiczen gnyessn
vnd gebruchen sullen geru(e)clich biz das marg(graue) ludewig egnant odir syne erben vnd erbes erben alles von synem leibe mannes geslechte di von vns vmb di egnante(n) zwenzig
tausent schok gelosen vnd swenne di also geloset werden so sullen sey desselben marggraven ludewiges vnd siner egnanten erben widir sy vnd an di marke zu Brandemburg
lediclich gevallen als vor Auch sol diser brieff vnd was vor geschriben stet vnschedlich sin allen brieuen di wir als eyn kung zu Beheim vnser erben vnd nachkomen
kunge zu Beheim vnd di crone des selbn kungreichs vormals von den egnanten Marggraven ludewige vnd Otten haben vnd aller dis egnante sache zu orkunde haben
wir vnser keyserlich Insigel hengen lazen an disen brieff der geben ist zu pyrn nach gotes geburte dryzehenhundert Jar dornach in dem vir vnd sechczigstem Jare
an dem suntag als man synget in der heilign kirchen Jubilate vnser reiche in dem achtzehenden vnd des keysertums in dem zehenden Jare