Wir friderich balthazar vnd wilhelm gebruder von gotis gnadin lantgrauen in doringen marggrauen czu meissen in dem ostirlande vnd
czu landisberg grauen czu orlamunde vnd herren des landis czu pleissen bekennen offinlich vor vns vnd alle vnse erbin vnd tun
kunt an disem kegenwertigen briue allen den die in sehen horin odir lesin daz vns der allirdurchluchtigiste furste vnse liebir
gnediger herre karl romischer keiser vnd kunig czu beheim czu drezden in vnse stat mitheilsin gancz czumale vnd also
wol beczalt hat von der hochgebornen furstin vnse liebin ohmen ludewig des romers vnd ottin sines brudirs mar=
grauen czu brandinburch vnd irer erbin wegen der ein vnd czwenczik tusint marke lotiges silbirs erfordirtis gewichtis
vnd cehen tusint schocke pragschir grosschin als wir der selbin summe czu richte mit dem egen(anten) vnsim herrn dem keisere
noch vswisunge andirr vnse briue obirquamen vor daz lant czu lusicz daz wir in der beczalunge billichin vnd ginc
dankin vnd sagin vnd kündigen den selbin vnsin liebin gnedigin herrn den keiser vnd kunige czu beheim alle sine
erbin vnd nachkumin kunige czu beheim die egen(anten) vnse liebin ohmen die marggrauen czu brandinburch vnd ire erbin
des obgeschribin ein vnd czwenczik tusint marke lotig silbirs vnd cehen tusint schok pragschir muncze luticlichin
vnd czu male quijt ledig vnd loz mit vrkunde dis briues dar an wir alle drie czu merer sicherheit vnse ingesigil
habin lazzin hengen der gegebin ist daselbis czu drezden noch gotis geburt driczenhundirt iar dar nach in dem vier
vnd sechczigistin iare an allir gotis heiligen tage