Wir die Rachte vnd die Burger gemenlich der stat zu luckaw Bekennen uffimlich an diesem briue vnd tun kunt allen luten die yn sehen oder
horen lesen Wann die hochgeborn fursten vnd herren her ludewig der Romer vnd her otte gebruder Marggrafen zu Brandemburg vnser lieben
gnedigen herren mit wolbedachtem mute mit rate yrer getruwen vnder tanen dem hochgeborn fursten vnd herren her Wengla kunige zu Beheim
Marggrafen zu Brandemburg vnd zu lusig herzogen zu luzelnburg vnd zu Slesien vnd herren zu sulzpach sinen erbn vnd nachko
men kunigen vnd der Cronen des kunigrichs zu Beheim vns vnd die Marggraffschaft zu lusig mit steten dorfern Manscheften lehene
renten nutzen gulten gulten geluten welden Buschen velden heiden hofen ackern wisen wazern wazzerleufen teichen vischerey holz
penden tzungen gerichten herscheften vnd waz anders dar zu gehoret wie man daz mit sunderlichn worten mag benennen vmb Eyn vnd
czwenzig tusent Marg lotiges silbers Erfurter gewichtes vnd Eysenscher schrot breiter groschen prager muntz Berkauft habn zu wi
derkauft vmb die egen(ant) summe gelts vnd vnser egen(ant) h(er)ren die Marggrafen vns an vnsirn egen(ant) h(er)ren den kunig zu Beheim an sine erbn
vnd nachkomen kunige vnd an die Cronen des kunigrichs zu Beheim gewist habn dauon han wir mit wolbedachtem mute mit
rechten wizzen mit vnsirn frien willn vnbetwungen von geheize vnd von gebote vnser obgen(ant) herren der Marggrafen von Brandem
burg vnsirn vorgen(ant) h(er)ren dem kunige zu Beheim von sinen siner erbn vnd nachkomen kunige vnd der Cronen des kunigrichs zu Be
heim wegen in guten truwen gelobt gehuldet vnd kuntlich mit ufgerakten henden zu den heiligen gesworen daz wir dem hochge
born fursten h(er)n Bolken herzogen zu slesien vnd herren zu der swidnitz vnsirn liebn h(er)ren syne lebetage von willn vnd geheize
vnsers egen(ant) herren des kuniges zu Beheim gehorsam vndertanig vnd gewartig sulln in alln sachn als vnsirn rechten erblichn
naturhichn herren vnd noch sime tode sulln vnd wolln wir dem egen(ant) vnsirn h(er)ren dem kunige von Beheim den vorgen(ant) sinen erbn
vnd nachkomen vnd der Cronen des kunigrichs zu Beheim eweclich wartin gehorsam holt getruwe vndertanig sin ir bestes werbn
yren schaden warnen vnd alle ander sache tun als wir vnsirn rechten erblichn vnd naturhichn herren schuldig vnd pflichtig sin
zu tun als lange biz vns(er) vorgen(ant) herren die Marggrafen zu Brandemburg vnd yre erbn von yrme libe manes geslechte vns
vnd die Marggraffschaft zu lusig mit yren tzu gehorungen von vnsirn herren den kunige zu Beheim sinen erbn vnd nach
komen kunigen vnd von der Cronen des kunigrichs zu Beheim vmb die egen(ant) summe gelts genzlich widerkeufen vnd sulln wir der
egen(ant) huldunge globde vnd eide nimer ledig sin noch ledig werdin mogen vnser egen(ant) herre der kunig zu Beheim sine erbn vnd
nachkomen kunige zu Beheim sagen vns dan von erste der egen(ant) huldunge globde vnd eide muntlich ledig vnd los vnd verczihn uff
vns mit yrem guten frien willn vnd aller dieser sache zu vrkunde vnd stediger warheit han wir vnser stete Ingesigel an die
sen briff gehangen der gebn ist zu luckaw noch crists geburte druzenhundert Jar dar nach in dem vier vnd sechtzigestem Jare an
sant Martins tag des heiligen Bisschofs :-