Wir Ruprecht der elter von gots gnaden pfaltzgraff beym Reyn des heiligen Romischen Rychs Ertztruchsesz und Hertzog zu Beyern Bekennen und tun kunt offenlich mit disem brieve allen
den die in sehen oder horen lesen Wann der Allerdurchleuchtigste furste und herre her Karl Romischer keyser zu allen zeiten merer des Rychs und kunig zu Beheim unser lieber gnediger herre
umb des Rychs nutz beste wirden und eren dem hochgebornen fursten hern Wentzla kunige zu Beheim Marggraven zu Brandemburg und zu lusitz unserm lieben oheim und seinen nach
komen die ewiclich zu Beheim kunige werden zu lehen verlihen hat die dorffere heytingsfelt und bernheim mit allem dem daz darzu gehoret als in unsers herren des keysers nach
geschribenen brieve daruber gegeben vollenkomenlich ist begriffen Wir Karl von gots gnaden Romischer keyser zu allen zeiten merer des Rychs und kunig zu Beheim Bekennen und
tun kunt offenlich mit disem brieve allen den die in sehen oder horen lesen Wann der hochgeborn Wentzla kunig zu Beheim Marggrave zu Brandemburg und zu lusitz unser lieber sun und
furste seine freye eygene guter mit namen seine burg zu heytingsfelt und waz darzu gehoret und seine burg und stat zu Briesendorff mit allen zugehorungen und die dorf
fen bernheim auch mit allem daz darzu gehoret die er umb seine eygene pfennige gekaufft hat zu dem kunigreiche und der cronen des kunigreichs zu Beheim von uns als
von eyme Romischen keysere und von dem heiligen Romischen Ryche zu lehen empfangen hat also daz er und alle seine nachkomen die ewiclich kunige zu Beheim werden die
vorgenanten lehen allezeit von uns und unsern nachkomen an dem Ryche Romischen keysern und kunigen und von dem heiligen Romischen Ryche ewiclich zu lehen haben halten und
empfahen sullen Davon han wir mit wolbedachtem mute mit rechter wizzen und mit rate kurfursten ander fursten graven freyen herren und ander unser und des Rychs
getruwen zu eyner erstatunge der vorgenanten gute dem egnanten Wentzla kunige zu Beheim und allen seinen nachkomen die kunige zu Beheim ewiclich werden die dorffer heytingsfelt
und Bernheim mit zehenden weingelte daz heizet betewein dreysig pfunt haller geltes die die leute zu heytingsfelt geben Sechs pfunt haller geltes die der Apt zu
sant Burcharte zu Wirtzburg gebet Vier pfunt haller geltes die der Apt von Selle gebet Vier pfunt haller geltes die die frawen des closters von Selle bey Wirtzburg ge
legen gebent Syben pfunt Neun schillinge und vier haller die die Margretente zu heytingsfelt geben Acht pfunt haller geltes oder doley die do gevallent von den grawt
garten zu heytingsfelt Sechs malter und drey achteyl kornes oder doley die jerlich zu heytingsfelt gevallent von den dritteilern funff malter kornes die doselbes
gevallent von weingarten Eyme pfunt pfeffers und mit dem dritteil des weins der do kumet jerlich von funfzig morgen weingarten zu heytingsfelt gelegen die do
heyszent die kunigstucke daz alles zu heytingsfelt gehoret Und auch mit funff und zwentzig malter weitzes jerlichs zinses fugtey und gerichte die zu Bernheim
gehoren und mit allen andern irn zugehorungen wie man die mit sunderlichen worten mag benemen die der egnant kunig zu Beheim umb funfftausent gulden gut von golde und
swer von gewichte von dem Byschove zu Wirtzburg dem sie langezeit zu pfande gestanden hant mit seime eygen golde hat geloset zu rechtem lehen verlihen han und verleyhen
in die mit crafft ditz brieves umb die egnanten gute und auch umb daz eyn iczlich kunig zu Beheim und die seine von seinen wegen herberge haben mugen von Beheim zu farn
heinfurt uff dem meyne zu Reyten wan iz sich geburet eyme Romischen kunig zu kyesen und auch zu Reyten dohin zu andern kurfursten fursten und herren zu kuniglichen und
keyserlichen hoven parlamet und gespreche zu haben und des Rychs sache da zu teydingen Auch sal der egnant Wentzla und alle seine nachkomen kunige zu Beheim die vogtey
uber daz closter zu heytingsfelt ewiclich haben also daz sie das vorgenant closter seine leute und guter und waz darzu gehoret als irer rechte vogte schirmen verteyding
en und vurtrethen sullen und mugen in allen werntlichen sachen Auch han wir dem egnanten Wentzlaw und seinen vorgenanten nachkomen mit wolbedachtem mute mit rechter wizzen
und von keyserlicher machte gnediclich erlaubet daz sie heytingsfelt und Bernheim mit zinnen mauren turmen pforten erckern und ander wie sie wellen vestent und stete
da machen mugen ewicliche wan sie wellen und sullen in derselben steten stocke halzgerichte und alle andre gerichte hoch und nyder haben und gebruchen Auch mugen die egnanten
der kunig zu Beheim und seine nachkomen den vorgenanten steten wochenmarkte geben wie sie nutzlich und bequmlich duncket Und sullen auch die vorgenanten stete haben alle freyheit
recht und gnade die da hat und gewinet die stat zu Briesendorff und die burgk daselbs Auch mugen die vorgenanten kunig zu Beheim und seine nachkomen inwendig inen der
steten heytingsfelt und Bernheim und dar in den dorffen und zugehorungen derselben stete salczen haben und redere tun setzen umb geverte zu tun von pferden leute
Getzeuge dirre dinge sint der Erwirdige Gerlach Ertzbischoff zu Mentze des heiligen Rychs in deutzschen landen Ertzkantzler der hochgeborn Ruprecht der elter pfaltzgraff bey reyn
des heiligen Rychs Ertztruchsesz und hertzog in Beyern und Rudolff hertzog zu Sachsen des heiligen Rychs Ertzmarschalk kurfursten des Rychs die Erwirdigen Albrech
zu Wirtzburg lamprecht zu Speyer Rudolff zu Verden peter zu swerin und Albrech zu halberstat die Byschofe die Edlen friderich Burggrave zu Nurenberg Adolph Johan
Ruprecht und Gerlach von nassaw Walram zu spanheim Wilhelm zu katzeneinbogen heinrich zu veldentz Ulricch und Johans lantgraven zu dem leuchtenberg Burckart
und Rudolff zu Wirtzburg graven friderich hertzog zu Tecke Gerlach zu hohenloch Andres zu Rynneck und Ulricch der junge zu hanow herren und vil ander fursten graven
und ander des Rychs mane an urkunt ditz briefes versigelt mit unsers keyserlichen anhangenden Ingesigel Geben zu Wirtzburg nach unsers geburte dreyundzweinzigste Jar
darnach in dem syben und sechtzigstem Jare an dem nuwen Jares tage unsers Rychs in dem ein und zwentzigsten und des keysertums in dem zwelfftem Jare Und wann
die egnante sache redlich und dem heiligen Romischen Ryche nutze erlich und bequmlich sint als in den vorgeschriben unsers herren des keysers brieven gescriben stet Davon han
wir mit wolbedachtem mute mit rechter wizze und mit rate unser frunde und getruwen als eyn obirster Truchsesz und eyn kurfurste des heiligen Romischen Rychs unsern willen wort
int und gehengnizze getan zu allen den vorgeschriben sachen und tun dissen willen wort int und gehengnizze zu denselben sachen mit crafft ditz brieves und aller dieser sache
zu urkunt und ewiger warheit han wir unser Ingesigel an diesen brieff gehangen Der geben ist zu Wirtzburg nach Cristes geburt dreytzehenhundert Jar darnach in dem sy
ben und sechtzigstem Jare an dem nechsten freytage nach dem obirsten tage