In Gotes name(n) Ame(n). Ich Dytrych pfasus purger czu prage in d(er) Gro(e)ss(e)n Stat Bekenne vnd geczeuge offenbar all(e)n den dy nu sind vnd auch den dy her nach ku(e)nftik werdn dy disen kegenwirtigen
pryeff ho(e)rn adir lesend Daz Ich nu gesu(n)din leib vnd mit guter vornu(n)ft getan vnd beschiht han meyn leztes gescheft das her nach stet beschribn von alle meym gute des doch leid nicht vil ist
denn daz haus in dem Ich wone daz gelegen ist am Newenm(ar)kt czu prage czwisschen den ho(e)fsn des Andres Golsm(i)d vnd des matheus ym turm vnd auch kawm dreissik schok gross do mit man mir mein
leigraft tu(e)n sal dy Ich lize dy mir got gebn hat in mein arwait den worte daz keyn krik nach meyn tod erste czwisschn nymand dar vm vm disen Erbn Leuten Matheus pez heyna peyer Matheus
kram(er) vnd f(r)ancz von Bru(e)nn Gesworn Schepfen czu d(er) czeit in d(er) gna(n)te(n) stat czu prag vnd ditz gescheft hab Ich enpfolhn disen Ersam(e)n Leuten h(er)n Wenczlabn Tausetm(ar)k pfarrern czu sent
Gally kirchn vf dem egnaten Newenm(ar)kt czu prag dem Niclas Weger in d(er) Eysengasse vnd dem fanczan gnat von Bern purgr(n) auch in d(er) egnate(n) stat meine(n) libn fru(e)ndn dy Ich su(n)derlich erkorn
vnd gepetn han da czu mit vollem rechte daz dy mit meyn gescheftlewt dy habn sich gu(e)tlich vnd williklich vnderwundn ditz geschefts durch Got von mein peth wegen In su(e)lch weiz daz d(er) gnant pfarrer
vnd auch eyn Iclich ander pfarrer der nach Im ku(e)mt do selbst czu sent Galln vnd di czwen gnatn purger meine gnatn gescheftes su(e)lln pflegen nach irn trewen das es nicht abegeh sunder in alln
stu(e)ckn gancz pleib vn(d) vnczuprochn Auch wenn es geschiht daz der egnaten czweier purger eyner stirbt legirhaft vnd sich besorgit des todes so mak her vnd sal mit vornu(n)ft wenn her wil mit
voller gewalt nach seim sele gewissen an seyn stat kyesen wen h(er) wil aus seym geslechte mit wissen des pfarrers von sent Galln vnd auch des purgr(s) seins mitgnosn d(er) nach ym bleibt lebnde czu disem gescheft
Adir sturbt her daz h(er) nicht enko(e)st nach erwelt da su(e)lln der pfarrer in sent Galln vnd seyn mitgnos d(er) purgr(s) d(er) lebnde pleibt eynen and(e)rn czu In kyesen auch aus dem geslechte des gescheftmanes der abget
vngekorn Ist als kein fru(e)nd keyner da nu(e)czen sy wol vnd su(e)lln mit eigner gewalt czu In kyesen Eynen and(e)rn Erbn man aus d(er) egnate(n) pfarr sent Galln wer her sey der all dink wy Ich dy hy schaff tu(e)yt
sampt In handel vnd ausricht nach seinen trewen Nu geb Ich des ersten auf meyn gnant haus vnd hoffstat Sechs schok gross prager pfennyge ewiges Gims czu einer ewigen messe h(er)n herma(n) dem
prister d(er) do ist czu sent Galln daz her dy selb messe teglich sprech do selbst got czu lob wann Ich mein beigraft auch aldo habn wil vnd d(er) in sein messe meyn gedenk vn(d) d(er) m(ar)gretyn mein hausfrawen der
got gnad mit alln glaubigen doch wenn her adir eyn andere prister d(er) nach ym ku(e)mt czu d(er) selbn messe eynen tag adir czwen in der wochen wil seyn ane messe daz mak her wol tu(e)n Auch wil Ich vnd
daz mein gnate gescheftlewt nach d(er) gnad h(er)n herma(n)s tod den egnante(n) Gims der da geho(e)rt czu der vorbenaten messe durch got su(e)lln vorleihn nach meym tod stetlich eym Ersamen prister wer her sey d(er)
in sein messe vnd in seyn gepeth habe mein gedenknisse vnd m(ar)gretyn mein hausfrawen vnd mein altfodn mit alln glaubigen seln Dornach so schaff Ich daz di gescheftlewt czuhant nach meym tode
sich su(e)lln vnderwindn meins gnante(n) haus mit sampt seim hoffstat vnd su(e)lln daz vorkaufen wenn sy mu(e)gen vnd waz geltz dar aus w(ir)t nach meiner schaczunge hundert schok gross vnd e mer denn myn dar
vm su(e)lln sy widerkaufen dy vorbenante(n) Sechs schok grosser prager pfennyge ewiges perges czinses czu der egnaten messe eym caplan wer her sey da czu Sy su(e)lln den selbn Gims all Iar gebn deme
selbn Caplan wer der wirt halp vf sent Iu(e)rgen tag vnd daz ander halpteil auf sent Galln tag d(er) dar nach gnant ku(e)mt Vnd nach den selbn sechs schok gross ewiges czins su(e)lln sy denne ab
kaufen auch drey schok grosser prager pfennyge ewiges perges czinses vn(d) daz gelt daz da pleibt Ebn dy sechs schok gross des egnante(n) czins vnd der selbn dreier schocke gross ewiges czins schaff
Ich czwey schok grosser daz man mir Ierlich da mit dynen sal in der egnaten kirchn sent Galln alle Iar achtsstunt des ersten an meynem Iarstage das ander an Iarstage meyn egnaten hausfrawen
vnd denn in ye der nesten wochen vor nach weynachten vnd dar nach gnant nach ostern eyns vnd denn dar nach in der nesten wochen nach yclicher Cwate(m)m(er) eyns Also daz eyn yclich dinst gancz
werd mit eym vierdunge grosser vnd d(er) selbn sal man gebn dem pfarrer czu sent Galln syben groze seinen sankhern drey gros den schu(e)lern dy vilge singen eynen grosen von dem gelo(e)wt czwen gros vnd
vm licht czu d(er) vilge vnd auch czu d(er) messe czwen groze Auch schaffe Ich daz drit vnd das lezt schok gross czinses dem pruder Nidas czu sent Thomas meym o(e)hmen czu seym leib Aber nach seym tod sal es
ewiklich gefalln vnd werdn den p(r)u(e)d(e)rn do selbst czu prage in den Conuent all Iar dar vm d(er) gnant Conuet denn alle Iar ewiclich in sein kirchn got dyne sal fu(e)r mein sele vn(d) fu(e)r mein egnanten
hausfrawen sele an vnser peid Iarstage mit vilge singen vnd mit gen lesn als gewonlich ist Obir ditz wil Ich vnd schaff auch ab des gnante(n) vorkauften czinses peid an den sechs schockn is vnd an de(n) leztn
dreien schockn gross icht abeget es sy von des gnante(n) hauses wegen ad(ir) von d(er) stat losung wege adir wy daz gescheh da sal an alln czinse abegen w(ir) al ye eym schocke als vil sam dem and(e)rn Wu(e)rd abir
des czins mer denn dy Newn schok gross da su(e)lln dy vorbenaten gescheftlewt daz vbrige durch got gebn wo sy wissen do es bestat sey durch vnser sele willn mein vn(d) mein hausfrawen Des lezte schaff Ich auch
dy weil mein gnant haus vnd hoffstat nicht vorkauft mak werdn da su(e)lln es mein gnaten gescheftlewt hynlasen vm eynen gnaten czins den su(e)lln sy denne wendn an meyn gnant gescheft nach irn twen
als verr sy gelangen mak vnz der wege eyns kaufs wirt als vor stet beschribn Czu warem geczu(e)knisse meins gnaten lezten geschefts han Ich egnant Dytrych mein eygen Infigel gehengit an disen pryeff
vnd auch czu eyner steten bestnu(n)g des selbn geschefts daz es in alln stu(e)ckn gancz pleib vnd vnczuprochn so habn di egnaten vir gesworn schepfen durch eins rechten willn von mein peth wegen Ir
eygen Infigel auch gehengit da czu der Brieff ist gebn do man czalte nach Cristes gepu(e)rte dreiczehn hondert Iar In dem Eyn vnd sechczigsten Iare Eyns mitwoches des abendes sent Marien tag
Magdalenen der heiligen frawen