Wir bruder francz d(er) Abt vnd der c(on)uent gemain dez chlosters zv Waldsassen
beche(n)n(en) offenbar vnd tvn chvnt allen den di disen brif sehen od(er) horen lesen
daz wir mit bedahtem mvt vnd mit haintem willen vnß aller den erb
gen Gaistleichen frowen der ercheleiten der Ebtessin vnd dem c(on)uent
zv Egr der mynner brud(er) orden von vnsers chlosters wegen reht vnd red
leich verchavfft haben zv rehtem erb daz dorf zv der Grvn vnd waz wir
da hetten mit allem nvtz vnd rehten mit aller der freyhait vnd mit alle
dem daz dar zv gehort ob der erd vnd vnter der erd gesvcht vnd vnver
svcht als wir es her praht haben vmb hvndert pfvnt vnd vmb secht
vnd sechtzig pfvnt haller der si vns gentzleich gewert vnd bezalt habn
daz selb gelt alles an vnser vnd vnsers chlosters frvmen vnd nvtz chomen ist
vnd wir gelobn in daz egenant dorf zv werten vnd zv entweren Iar vnd
tag fvr aller ansprach als erbs reht ist vnd daz wir si an dem selben
dorf nim(m)er gehindern schvllen noch si darinn besweren mit panne mit
gaistleichem noch mit wereltleichem g(e)richt mit d(er) fvrsten gebott
noch mit ir bett noch mit chaines lay weder wir schvln chainerhand weg
noch weis svchen noch vinden da mit wir si dor an hindern oder darinn
besweren mochten vnd darvmb daz daz also stet belaib an alles geverde gebn wir
in disen offen brif dez zv vrchvnde bestett mit vnsern payden Insigeln daz ge
schah do man zalt von christes gebvrt drevtzehenhvndert Iar dar nach
in dem siben vnd viertzigsten Iar an sand lorenzen tag