Ich Sigmunt Junckher zu den zeiten zu Wilesein gesessen Bekenne fur mich
mein Eliche hawffraw all vnse Erben vnd nachkomen offenlich an disem
briefe allen den die In sehen aber horen lesen das wir vnser getreyd ge
henden vnd auch den czehenden den wir auf dem dorffe zu nehern bey
der frawt haben gehabt In allermaß vnd wie den Innegehabt vnd her
bracht haben vnd als der an vns komen ist haben redlich vnd recht ew
ewiclichen zukauffen geben vnd verkaufft dem Ersamen Weisen Niclesen
Homerawer Burger zu Eger seiner Elichen hawffrawen vnd allen seinen
Erben vnd nachkomen vmb ein Suma gelds dy sy vns bereit bezalt vnd
awsgericht vnd die wir an vnser fromen vnd nucz gekert vnd gewendt
haben vnd wir geloben In denselben zend zuwarten vnd zusprechen
vnd von allen ansprachen von allermenyglich zufreyen zuledigen vn
zu entheben Jar vnd tag als Stat vnd lanndes recht ist vnd ge
reden auch daz wir all vnse Erben vnd nachkomen furbas ewichlich phn
nmermer keinerley zuspruch noch ansprach dorzu noch dornach sullen
wollen noch mugen gehaben weder mit geystlichn noch werltlichen
rechten noch in keinalaiweiß In alle geuerde Vnd des alles zuurkund
hab ich obgenant Sigmunt Junckher mein eygen Insigel vnden an
disen brief gehangen vnd zu mer gezeugnuß hat mein liber Bruder
Endres Junckher Burger des Innean Rates zu den zeiten zu Eger
durch meiner pete willen Im on schaden sein Insigel zu dem meim
an disen brief gehangen der geben ist an sand laurenti tage Nach crists
geburd vierzehnhundert vnd Im Newnvndczwenczigisten Jare