Ich Endres kesselpoden mit purger zw eger bekenn offenbar an dyse
offen briffe vor allen dy yn lesen sehen oder horen lesen das mir
dy wirdige frawen Catharina von Seeberg abtessin hy zw eger
zw sant claren hath wider geantwert es isseyn puchsleyn mit
gelt das ich der wirdigen frawen kungunde abtessin ir vorfarn
hab zw trewer handen zw behalten geben das ich nu hab wol
empfangen gantz vnnd vn vorrucket von der obgenante wirdige
frawen catharina abtessin Jngegenwurtigkeith des wirdige vater
heinric linte dy zeith gardian vnd Johannis forchaw vicegardia
vnd prediger hy zw eger Auch des verstantigen Jorge Sachssinger
der auff ich obgenant Endres kesselpoder vor mich all meyn erbe
vnd erbneimen sy gantz quit ledig vnnd loß sage vnd sy nymar
von meyne wegen zw clagen hat da vmb noch vmb nicht
mer scholl noch mag an langen wider mit recht noch on recht
geystlich noch wertlich yn keyner weiß wy das mechtin fym
wartten ddingken deß zw war gezeugnuß vnd vrkund gieb ich
obgenant endres kesselpoden yn dyssem briff mit meyne auff
gedruckten Secret da zw hab ich gepetten den wirdigen vater
heinric linte yn der zeith gardian der brud(er) sancti francisci deß
closters hy zw Eger das er seyns ampts Sigill zw dem meyne
hath vnden auff den briff gedrugkt Vnd auch gepeten den
obgenanten wirdigen vater yn der zeith vicegardian deß oben
gemelten closters auch sulche dinge zw bezeugen mit seyne eygen
hantschrifft gethan vnter dem Secret vnnd sigill vnden an
dyssen brieff Der gegeben ist nach C(h)r(ist)i gepurth funfcz hndert
Jare An dem abent deß hochwirdigen festes vnser liebe frawen
verkundunge yn dem funffzehende hundertsten Jar