Wir Matel vnd Hanns furman gebruder zu treinitz Bekennen fur vns all vnser
erben vnd nachkomen offenlich an diesen brieff gen allermeniglich, das wir
mit guten willen vnd rechter wissen vnsern hoff gelegen aldo zu treinitz zwischen
alten Steffels vnd lorenntz gablers hofen, mit grunt poden allen rechten vnnd
zugehorungen nichts außgenomen zinst Jerlich den Closter Junckfrauen zu
Eger ein star weitz anderhalb star korn anderhalb star habern ein hennen funff
zehen aier vnd zehen keß, sunst frey, dem Ersamen hannsen franckenn itzt
darauff geseßen allen sein erben vnd nachkomen vmb ein Sum gelts Nemlich
hundert vnd acht schock grosser statwerung zu Eger, der wir von Jm gar bezalt
worden sein, vnd Jn der quit frey ledig vnd los sagen, Haben recht vnnd redlich
zukauffen geben vnd verkaufft, des wir vns auch hiezum leuterlich verzeihen
als er nu auch den lenger denn Jar vnd tag on all verhelich einspruch in
mutz vnd gewere Jnngehabt vnd beseßen hat, on all geuerde, vnd gereden
das weder wir all vnser erben vnd nachkomen noch nymant von vnserm
wegenn, den genanten keuffer all sein erben vnd nachkomen von des bestimb
ten hoffs mit aller zugehorung noch von gedachter kauffsum wegenn, hinfur
zu ewigen zeitten nymer mer betaidigen anlangen noch zusprechen sollen noch
wollen weder mit recht Gaistlich weltlich haimlich noch offenlich noch on
recht gantz in kainerweis, bey vnsern guten waren treuen on arck vnd on
geuerde, des zuwarer vrkund haben wir genanten Matel vnd hans furman
gebruder fur vns all vnser erben vnd nachkomen gebeten, die Erbarn vnnd
weisen hern Thomasen weyol vnd hannsen smidel baid des Rats zu Eger, das
sie Jr Jnnßigel von vnser bete wegen des zugezeucknus in on schadenn an
den brieff haben gehangen, der Geben ist den abent katherina virginis
Nach Cristi geburt funffzehenhundert vnd Jm sibenvndzwaintzigisten Jare.