Ich Peter helm von Treüntz Bekenne vor mich, Alle meine Erben vnd Erbnemen Offentlich annt
diesem brieff gegen Jedermenniglich, dz ich mit guettem willen vnnd Rechtenn weissenn meinn halben hoff daselbsten
Zweischen sein vnnd Jorg der helm gebrüeder höffenn gelegenn, Ist der Ehrwürdig vnnd Andechtigenn abtissinn vnnd Conuent
des Stiffts vnnd Jungkfrawen Closters Sanct Clara Ordens Zue Eger Zinsspar vnnd Vnderthänig, sonnsten aüsser des Zehenndt
vnnd schüldiger Ehestewr ledig vnnd frey, mitt genandt sodenn Allenn Rechtenn, gerechtigkeittenn, nuzung ein vnnd Zuegehö
rung, Allermassenn solchs Zue dorff vnnd Veldt mitt Rainn vnnd Stainenn vmbefangenn ich aüch dannselben Jnngehabt
genuzt genossenn vnnd gebraüchet, nichts aüssgenommen, hab, Recht vnnd Redlichenn, dem Erbeittsammen Thoma Löwen
vonn Treüntz Allenn seinnenn Erbenn vnnd Erbnemenn Vmb einn Summa geldts, derer Ich von Jme bar, ober, vnnd woll Zue
danckh enntricht vnnd bezallt wordenn binn, Zue kauffenn gebenn vnnd verkaufft, vnnd thue eüch dessenn Allenn genzlichenn
Ein Aüssthuen verzeyhenn, Zuesage vnnd gelobe hierauff vor mich alle meine erbenn vnnd erbnemenn, dz wir eüch Niemandt
vonn vns ferent wegenn, genanttenn meinnenn abkäuffern, Alle seinn erbenn vnnd erbnemenn, Obberürts Jme Ver
kaufftenn halben hoffs, der darfür aüssgezalttenn kauffsumma, noch Annders deshalben, weder vmb Cleinn, gross, we
nig oder Viell, hinfüro Zue ewigenn Zeittenn nimmermehr beschaidigenn anlangen noch beschwerenn sollenn, noch
wollenn, weder mitt noch ohnne Recht, gantz in kheinnerlay weiss noch wege, wie Jmmer Zuerdennkhenn sein möchte
Sondern Jmergenn entwerfenn, freyenn vnnd ledigenn wollenn, Alls des Egerischenn Craisss altt herkhommenn
Recht vnnd Gewonheidt ist, Bey meinnenn wahrenn Trewenn vnnd glaübenn, Ohnngeuärde, Zür Vrkundt
hab ich für mich alle meine Erbenn vnnd Erbnemenn, mitt sonnderm fleiss gebettenn, die Ehrnn, Vnn Erbarnn
vnnd weisenn Herrnn, Andreasenn Meinel vnnd Wolffgang Zaigelln, beede des Raths, der Stadt Eger, dz sie Jhr
angeborne Jnsigell, Jedoch Jnen ohne schadenn, Zü gezeügnus an diesenn brieff habenn gehangenn, Geschehenn
vnnd gebenn denn Sechs vnnd Zwaintzigistenn Monats Tag Augusti Jm fünfftzehen hundert Acht vnd Neünzigistenn
Jar