In dem Namen des herren Amen Der Jare geburde desselben Tausent vierhundert vnd in dem funfzehendem an der sechsten Jndicion an dem einvndzwenzigistem tage des mondes Januarii zu mittentage
oder dabey zu den zeiten des allerheiligisten in got vaters vnd herren h(er)n Johansen von gotes fursichtikeit Babsts des dreyvndzwenzigistem in dem Jare desselben dem funften in der wirdiglichen stat Eger
hinnetenwe des pfarrhofes zu Eger Egerenspurger bistums Jn mein hernachgeschriben offenwarn schreibers vnd der hernachgeschriben gegenwurtikeit der zeugen darzu beruft vnd sunderleich gebeten Nem=
leich des fursichtigen mannes Nickel Puschpergers burger dazeit ratherewn zu Eger von seinen vnd des gantzen rats namen twegen bracht fur in pargamen geschriben etliche briefe vnabgetan vngeschedin
vnd in chainen iren teylen verburget noch gefelscht Sunder an alle bose zuuersicht vnd makel der vier an der zale warn vnd der erste vnder den in lateinischer sprache geschriben was Also als hernach von worte
zu worten geschriben stund vnd laute Wir Johans von gotes gnaden Romischer kunig vnd Grafe zu lutzelburg Tun kunt mit dem briefe offenlich Das wir haben betracht willige vnd getrewe dinste
So vnser libe getrewe Cunrat forster Spernuogel genant vnd Niclas forster sein bruder beide burger zu Eger vns erzeigt vnd getun habent Wellen wir sy vnd ire erben hinfur zu vnsern dinsten willig machen
Darumb haben wir Jn den vorgehan Niclasen vnd Cunratn Jren erben vnd nachkomen vnser ritterlich lehen der hiecken zu Selben als das an vns vnd vnser erben mit allem rechte zu gehort von kunig=
licher macht geben vnd verlihen vnd mit vollem rechte ubergeben Geben also mit worten das sy hinfur auf die egenan hiecken alleste sy des wirdet ein erbage tugliche person welich sy wellent ewir
leuten darauf antwurten sullen Vnd ob vnwißenleich oder wie das geschehe Ja der benan hiecken hie vtmants antwurten oder vnser erben darzu geben so wellen wir dieselben antwurtung eytl vnd vn
nutz sein vnd chain kraft haben Des zu vrkund haben wir vnser groz Infigel mit vnserm wissen an den brief geschaft zehengen Geben zu lutzelburg an dem tag der heiligen sant lucen Juncfrawen
Jn dem Jare des h(er)ren Tausent dreyhundert vnd vierzigistem Desselben Infigels was weit groz vnd gestelt in gemein weisses wachs gedruckt an einer snur von seyden roter vnd gruner farbn hang
vnd rond an der flechte desselben Infigels was gegraben ein pild eines gewapenden als auf einem pferd mit harnasch vmbgeben sitzend aufhabend einen helme vnd darauf in der hohe flugel ubersich
gerecket vnd an der prust als an der lincken seiten einen geviertailt schilt vnd iglich teil des leibn warden mit dem zagel zweitailt vnd als gesprochen ist die vier leibn warden gegrabn in dem schilt
vnd die rechte hant ein swert aufgereckt vnd ein swert darinne zu den slage indewings weise Desselb Infigel pustablich vmschrift was also Johans von gotes gnaden kunig zu Behem vnd Grafe zu
lutzelburg Vnd an dem rucke des benan Infigels was in wachs gedrucket dasselbe mit hilf einem chleinern Infigel dann das vorder Jn dem was ein aufgereckter Adlar vnd het als vor geschribn ist
einen viergeteilten schilt vor Jm also das er das grozteteil des adlers bedeckte Hernachvolgt die inhaltung eines andern briefs der lautet also Wir Johans von gotes gnaden kunig zu Behem vnd
Grafe zu lutzelburg Tun kunt allermenncleich die disen brief sehen das wir vmb grozer begirde wegen So vnser getrewe Cunrat forster Spernuogel genant vnd Niclas forster gebruder burger zu
Eger zu vnser hochwirdikeit getragen habent vnd noch tragent vns hie eigne erbguter innetanen der walt forst genant da da beduret die vesten hochbrechstein vnd den wald genant kornberck
in dem benan walde beslagen mit aller seiner zugehorunge in vnser hende vngenot vngezwungen sunder von gutem vnd freyen iren willen Billichleich vnd freyleich aufgegeben habent Dadurch den
vorgenan brudern Cunratn vnd Niclasen vnd Jren erben haben wir widerumb verlihen vnd entpfagen komen Jn vnd Jren erben in den vogenan walde forst wo oder in welchem tail Jn das am besten
fuget hundert hube auszurewten zu pawen vnd powlich zumachen zu lehen gegeben von denselben hundert huben vns vnd vnsern nachkomen zu Behem kunigen sy trewliche dinst als ander vnser
lehenmanne nach desselben lehens freyheiten hinfur ewicleich sullen erzeigen vnd tun Wir geben vnd leihen auch den oftgenan brudern vnd Jren erben volle vnd freyliche macht die benan
hube zu verkauffen zu versetzen zu verwechseln hinzugeben zu beschnicken im leben oder im tode vnd damit zuschicken vnd tun als mit andern irem erbe vnd eygen gutern nach iren willen vnd
wolgeualnusz doch vnsern lehen vnd getrewlichen dinsten vnentgolten Vor aber das den Waldmeisterleuthen fursten hern ludwig den keyser oder sein nachkomen die stat Eger mit irer lant
schaft von vns oder von vnsern erben abzelosen vmb das gelt so er vns schuldig ist nach voller ausweisung der briefe darvmb gemacht hinfur gepuret So wellen wir das dann die vorgenan
Cunrat vnd Niclasen vnd Jre erben von vns vnd vnsern erben sullen des benan lehen gentzlich vnd volkumleich ledig sein Wir gepieten auch ernstleich vnd vesticleich allen vnd iglichen vnsern
getrewen vndertanen vnd lehenmanne in welchem stande oder wesen sy sein derselben lantschaft gegenwertigen vnd kunftigen das sie den obgenan bruder vnd Jre erben in solicher vnser
gnaden nachlasung vngehindert vnd vngenot zelazen vnd zu cheiner zeit zu betruben vnd ob yemant dawider in freflicher turstikeit tete tet der sol wissen vnser swere vngenad vber Jn zu ergeen
Zu vrkund haben wir vnser Infigel gehaissen an den brief hengen Geben ze pragm an dem tage der heiligen Juncfrawen sant katherin des Jares vns(er)s gepurde Tausent dreyhundert vnd
in dem ein vnd viertzigistem Jare Des briefes Infigel an der gesigurten groze grabung gelachnusz hinden vnd vorn was mit allen dingen als des ersten briefes Infigel Des Infigels gestalt
ist volkumleich in den vorgeschribn bedeutet Nur das drey wapung als vor gemeldet ist des pferdes auf dem ein gewapender gesehen ward was als ein tebich oder ein semliche decke mit
mangerley leibn gepildt in beiden Infigeln Sunder des ersten briefes Infigel was gehenget an ein seiden snur als vorgemelt ist Aber des gegenwertigen briefes Infigel hieng an einer
pargamenen presse Hernachvolgt des dritten briefes laut die wort gentzlich inhaltende Wir Johans von gotes gnaden kunig zu Behem vnd Grafe zu lutzelburg Bekennen mit dem
brief gen allermenncleich das in solichem geschichte So vns vnser liebe getrewen Cunrat Spernuogel Niclas genant forster gebruder burger zu Eger vnd Albrecht von Sakenberg
mit Jren freunden vnd gesellen in einem offenn krieg wider alle herren vnd volk von vnser stat Eger Selben vnd falkenberg durch bewarung wegen der lantschaft Eger vnd nachuolgung
vnser veinde ettliche schaden entpfangen habent wie die geschehen sein Darvmb sy gehaissen vnd geloben wir denselben mit guten trewen sulche ire schaden So sy ire freunde vnd gesellen
als berurt ist genomen habent vnd oblich sich entpfangen erzeiget habent vnschedlich genug vnd ein gentzlich benugung zutun Zu vrkund des briefes Geben zu prag am freytag
nach sant Dorotheen tag der heiligen Juncfrawen An Jare des h(er)ren Tausent dreyhundert vnd in dem zweyvndvierzigistem Das Infigel desselben briefes was chlein vnd ein wenig
grozer dann ein dreyssigister groschen vnd sinckel in summes wachs gedruckt vnd ein weisses wachs gemischet vnd was gepildet als das groze Infigel an dem rucke mit allen dingen
Ein schilt mit viern viergeengelten lewbn vnd hinden ein schilt den der Adlar allenthalben ubertraft vnd furget Die pustabn des Infigels vmschrift warn also Das secret
kunig Johansen kunig zu Behem vnd Grafen zu lutzelburg Hernachvolget der laut des vierden vnd des letzten briefes als hernach geschribn stat vnd dewtisch ist vnd laut also
Wir karl von gotes gnaden Romischer keyser zu allen zeiten Merer des reichs vnd kunig zu Behem Bekennen vnd tun kunt offenleich mit dem brief allen den die Jn sehent oder horent
lezen das vnser liebe getrewen Nickel ehenant forster von Selbe fur vns komen ist vnd mit fleisz gepeten hat das wir Jm Nickel seinem bruder vnd Niclas Jrem vetter genant
die forster vnd Jren erben geruchten zu leihen gemeinleich vnd besunder den forst die Bunnel ire hofe vnd alles ir gut zu Selbe in dem gerichte die von vns vnd dem heiligen
Romischem reiche zu lehen ruret als ire eltern dieselben herbracht besessen hant vnd an sy komen sein Des haben wir an gesehen vleissige bete der obgenan Nickels Nicklas vnd
Niclas forster von angeborner miltikeit kaiserlicher gute vnd haben denselben vnd Jren rechten erben gemeinlich vnd besunder iglichem zu seinem rechten vnd als verre es ist mit
willen vnd wissen der vorgen Nickl vnd Niclas genant forster Die egen forst die Bunne ire hofe vnd alle ire freye aigen gut in dem gerichte zu Selben die zelehen sein von vns
vnd dem heiligem reiche gelihen in der maze vnd als verre Jre eltern dieselben recht vnd bescheidenleich herbracht vnd besessen habent vnd bestetigen in dieselben mit disem briefe
gemeinlich vnd iglichem zu seinem rechte vnschedlich vns dem heiligem reiche vnd niemleich an seinem rechte Zu vrkund des briefes versigelt mit vnserm Infigel Der geben
ist nach des heiligen chrewtzes tag als es gefunden ward Vnser reiche in dem eilften vnd des kaisertums in dem dritten Jare Dises hantfesten Infigel was chreit vnd sinckel
vnd grozer dann die vorgeschribn des ersten vnd des andern briefes Infigel in gemein weisses wachs gedruckt vnd hieng an ein pargamenen presse vnd was hiech er gegra=
ben ein kaiserliches pilde in seinem kaiserlichem gewande sitzend auf einem stule habende in der lincken hant einen Apfel ein creutz darauf vnd in der rechten hant ein Scepter
tragund mit gereckten anklitz anzusehen vnder augen tragund ein kaiserliche krone auf dem hewbte vnd zu iglicher seyten einen Adlar mit aufgereckten flugeln von Jm kert
vnd iglich adler kert das gesichte an des schildes rucke vnd hielten ein schilt d(er) schilde in den Snekels in dem schilde zu der rechten seiten ein aufgereckter Adlar vnd zu d(er) linck(en)
ein leobe mit einem zwitailigen zagel obned gesehen Der laut der pustabn des Infigels vmschrift was also karl der vierd von gotlicher miltikeit Romischer keyser allzeit ein
Merer vnd kunig zu Behem Auch also an dem rucke des yetzgesprochen Infigels aufdruckung was anders chleiner sunder das Infigel was in rot wachs gedruckt vnd dar=
nach einem weissen wachse eingedruckt in das grozer Infigel Jn demselben Infigel was ein Adlar als zu dem flug geschickt mit hindersich gekerten snabl vnd die pustablich
bedewtung vmbs dasselb Infigel hiesz also hinder der menschen richtet recht Nach uberlesung solch hantfesten vnd furbrengung vnd mit gesunde geystawet
der obgen Nickel puschperg von seinen vnd ander des rates oder in des gemeinen rates namen pat mich dieselben durch mich offenn schreiber hernach benanten
zu vernewen zu verendern vnd offen die brief als vorgeschribn stet Jch getrewlich vernewet vnd geoffenwart hab mocht darzu noch dauon gesatzt das den sin
oder verstentnusz mocht verkeren Die dinck sind geschehen des Jars Jndicion Tage Monde Stunde zu der zeit des Babstes vnd an der stat als oben geschribn ist Jngegen
wertikeit der weisen Manne herren fridreichs Crapfs Custers hansen hutleins hansen Schonpint Erhart Tussen bruder Sielvater ordens prewssen Conuents zu
Eger h(er)n Erharts Semler vnd hansen zimermannes Cappelens daselbs als getrewe zeugen

Vnd Jch Jost Josts weylent hensels von der Topf seligen Sun prager bistums von kaiserlicher wirdikeit ein offenwar schreiber
pin gegenwertig bey diser briefe furbrengung lesung bitug vnd hiller vnd vnd iglicher ob geschribn sachen als gemeldet
ist mit geschung mitsambt den obgenan gezeugen yegenwerticleich gewesen vnd hab es also geschehen gesehen vnd gehort
vnd meinem selbs hant beschriben vnd in dise offne furm gebracht vnd mit meinem gewonlichem zaichen vnd Namen
gezaichent darvmb gebeten vnd geuordert die obngeschribne sache zu bezeugen