Wir Ferdinand von Gots genaden Romischer auch zu Hungern und Behem ec(etera) Kunig
Infant In Hispanien Erczherzog zu Osterreich Herzog zu Burgundi Steyr Kernten
Crain und Wirtemberg ec(etera) Grave zu Tyrol ec(etera) Bekennen offentlich mit disem
brieff Nachdem unß der Wolgeborn unser lieber getreuer Peter Herr zu Rosenberg
auf Krumbau ec(etera) auf unser gnedig ansinnen und begern zu gegenwertigem zug
wider gemainen Cristenhait Erbfeindt den Turken zway falkennetl und zwo
halb slangen sambt Irem gefäß dergeleichen und hiezu uberantworten lassen das
wir darauf obgemeltem Petern Herrn zu Rosenberg ec(etera) hiemit und in Crafft
diz briefs zugesagt und versprochen haben Als wir Ime nach verrichtung obange=
zaigts furgenomnen Kriegszugs anzaigte zway stuck falkennetel und zwo halbslangen
sambt dem gefäß Inmassen unß die geantwurt worden widerumben an nach=
tail und schaden zustellen wo aber dieselben zerprochen oder unß sunst von handen
kemen das wir alsdann merbemeltem Herrn zu Rosenberg obberurte zway falkennetl
und zwo halbslangen ec(etera) anndern weg genuegclich und zu seinem begnugen erstatn
lassen sollen und wellen Ungeferlich mit Urkundt diz briefs Geben in unser Stat
Lincz den anndundzwainzigisten tag May Anno ec(etera) Im zwayunddreissigisten
Unnserer Reiche des Romischen Im Zwelfften und der andern im Sechzehenden
Ferdinandus
Ad mandatum d(omi)ni
Regis proprium
Franckhuller