Wir ferdinannd von Gotts genaden Romischer kunig zu alle(n) zeytten merer des Reichs in Germanien zu Hungern Beheim
Dalmatien Croatien (et)c kunig Infant in Hispanien Erczherzog zu Osterreich Herzog zu Burgundi zu Steyer zu Karndten
Marggraf zu Merhern vnd Lausicz Graff zu Tyroll (et)c Bekennen Als wir dem wolgebornen vnserm lieben getrew
en Ihan popel dem Eltern von lobkowicz auf Zbiroh vnserm Rat vnd obristen Hoffrichter in vnser Cron Beheim von wegen seiner zerung
so Er in etlichen vnsern geschefften vnd notturfften auf vnsern beuelch ins kunigreich polen furstentumb Glogaw vnd anndre ort
gethan vnd dann auch von wegen seiner ausstendigen Hoffrichterambts vnd a(n)ndern besoldu(n)g vnsers chamergerichts Raths besoldung
abgerechnet haben vnd Ime vermug solcher abrechnung fur zerung ain Hundert Neun vnd zwainczig schok dreyzehen groschen
funff halben phening vnd fur Ratz vnd Hoffrichterambts besoldung bis auf den lesten tag Monats Ianuarij ditz zwai vnd
vierczigisten Iars Diben Hundert Neun vnd achczig schok drey groschen alles Behemisch schuldig worden welhes zusam(m)en
in ainer Sum(m)a thuett Neunhundert Achtzehen schok Sechzehen groschen funff halben phening auch alles Behemisch
Inhalben er vns vmb bezallung vnnderthenigist angelangt Wiewol wir aber diser zeytt in vnser Chamer mitt
gellt nicht gefast hatt er vns Ime solcher schuld halben vnser brieff vnd vrkhundt damit Er dieselben in khunfftig zeytt fur
herpringen habe zegeben gehorsambist gepetten Des wir Ime in ansehung seines pillichen begern nicht abslagen muge(n)
vnd haben darauff gedachten von lobkowicz sein Erben vnd nachkhomen zugesagt vnd versprochen Thuen das selb auch
hiemit wissentlich in Crafft ditz brieffs das wir In selbe berurtte Sum(m)a gellts mit Eynem als so geswint muggenal
Eer vnd vergnuegen sollen vnd wollen Vnd ob aber Ime selbe Sum(m)a gellts so volligkhlich vnd gar mit einander
nicht bezallt werden mochte vnd Ime desterzeytten in abslag derselben etwas daran bezallt wurde das selb so Ime Ime yede
zeytt bezallt wirdet soll auf disen vnsern schuldbrieff geschriben vnd daneben auch ordenlich quittung von Ime ge
nom(m)en werden Vngeuerde Mit vrkhundt ditz brieffs verfertigt mit vnserm kuniglichen hiefurgedruckte(n)
secret Geben auf vnser kuniglichen sloss prag am Achten tag Ianuarij Anno (et)c im Zwai vnd vierczigisten
Vnserer Reiche des Romischen im Eylfften vnd der anndern im Sechzehenden
Ferdinand