Wir d(ie) Burgermaister vnnd Ratt der Stadt Elbogen, Bekhennen fur
vnns vnnsere Erben vnnd Nachkhomen, offentlich mit diesem brieff,
vor meniglich, d(a)ß der Aller Durchleuchtigist, Großmechtigist, vnnd
vnuberwindlichist furst vnnd Herr, Herr Ferdinandt Romischer
Kaiser, Auch zu Hungern, vnnd Behaimb Khunig, Ertzhertzog zu
Osterreich, vnnser allergnedigister Herr, den Craiß Elbogen,
von den Durchleuchtigen hochgebornnen fursten vnnd Herrn,
Herrn Hainrichen dem Eltern, vnnd Hainrichen dem Jungern,
des hailigen Romischen Reichs Burggraffen zu Meissen,
Graffen zu Hartenstain, vnnd Herrn zu Plawen, vnnd
Ernaw, Widerumben In Irer Kai(serlichen) Ma(jes)t(a)t vnnd derselben
Erben vnnd nachkhomen +Camer abzulosen entschlossen, vnnd vnß den=
selben, auf vnnser vnnderthenigist bit, vnnd erbietten,
das wir Irer Kai(serlichen) Ma(jes)t(a)t vber die Pfandt Suma, der vier=
vnndzwainzig Tausent Taller, So wolgedachte Burggrauen
zu Meissen darauff verschrieben gehabt, noch Sechs Tausent
Taller, vnnd also volliglich dreissig Tausent Taller, gehorsamist
darfur ausZallen, vnnd sollichen Craiß nach dreissig Jaren (von
der Zeit, vnnd derselb abgetretten wirdt, anzureitten)
Irer Kai(serlichen) Ma(jes)t(a)t oder derselben Erben, vnnd Nachkhomen Khu=
nigen zu Behaimb, vmb sonst, wider In derselben Camer
abtretten sollen vnnd wollen, Allergnedigist eingeben