Durch die Grundthertzliche Barmhertzigkeit Gottes, In welchere vnns Besucht
hadt der auff ganck der hohe, welcher leitte vnnsser füsse auff denn weck des
friedenn, welcher vns gegebenn hadt den Zepter des, Keÿsserischen keÿsser
thumbs zu halttenn, Die selbige Barmhertzigkeit Gottes in der dreifaldig sei gelobtt,
Wir Grosser Herr Keÿsser vnnd Grosfürst Iwan wassilgewitz aller Reüssen, der Wolo
dimirschen, Moskawischen, Nawogardischen, Keÿsser zu kasan, Keÿsser zu astrichan, Herr zur Pels
kawe, vnnd Grosfürst zu Smalentz, Twerski, Jugorski, permski, watzki, Bolgarski vnnd anderer
herr vnd Grosfürst zu Nawogardenn im Niederlande, tsernikofski, resanski, polotzki, rostofski,
Jorastafski, Bolesofski, odorski, obdorski, Condinski, vnd aller Siebirischen landen, vnd Norder
siden ein Gebitter vnd Herr vnd Erbe des Lifflandischen landes vnd anderer, Vnnserem freundtlichen Bruder
Maximilianus Von Gottes gnaden Erwelter Romischer Keÿsser fürmehres des reichs zu allen
zeitten, in Germanien, Vngern, Dalmatien, Croatien, vnd anderer, Konick, ertzhertzuck zu osterich,
hertzuck zu Burgündis, Brittanien, vnd Lodiringen, vnd Brabandt, lachles, vnd lamsken, krans
konin, gilemberch, Lützelburch, Geldernn, fürst zu flandern, aufburch, vnd Tirol, vnnd kibin
dischen, vnd artsoischen, vnd Borgen, vnd anderer, Holandt, Sehelandt, vnd Namirschen, vnd Zütphen
sischen, des romischen keÿsserthums, vnd Burgkgraff, vnd Landtgraff zu elsagen, vnd Herr frelipsischen
vnd Sclalawischen, vnd pordenschen, vnd Jerusalem, mecheln et(c). Das eüger keÿ(serliche) Maÿ(estät) hadt Begerth
von vnser keÿ(serliche) Maÿ(estät) Bis dem konig friederich zu dennemarck, eügern Gesanthen ein Geleitsbrieff
vnd so haben wir zu eüch vnserem freundtlichen Bruder vnd gutten freunde, aus freundtlicher
Züneigliche halber, vnnd vns Bruderlicher gesinnthen halber, vnd ohne vnderlassenns stetige
Zwischen vns freundtschafft, vnd freundtlichtlicher Liebe, Diessen vnnsern Geleitsbrieff auff eüger Bith
Gesantten, zu gesanndt, vnd wan ehi vnser freundtlicher Bruder vnd gutter freundt, auff diesse
vnser freundtlicheit, eüger Grosse Gesantten zu vnser keÿ(serliche) Maÿ(estät) werden senden, vnd sollt eüch vn
seren freundtlichen Bruders Grossen Gesantten, in vnnseren Landenn, vnd in vnnser Erbe, im Liff
lendischen lande, vnd im pleskawischen, vnd Nawogardischen zu wasser vnnd landt, daß zu vn
ser keÿsserthums Hoffe der stadt Moskiwa, vnd wiederumb zu rücke von vnserer Herrschafft, von
vnnseren Landen allenthalben einen reinen weck, Ohne allerleÿ anhaltunge, vnd hindernunge,
Desgleichen eüch vnserem freundtlichen Bruders Grossen Gesantten, auff ihrem Züge sol keinn
schaden gescheen, von vnseren Boiaren, vnd fürsten, vnd vnsern Stadthaltern, vnd woiwoden,
vnnd kriegsleütten, vnnd von allen Brieffsleütten, vnnd von den Nageischen Mürsen, vnnd
vom Teüptschen volcke, vnnd hackenschützen, vnd knechten, vnnd von allem rüssischenn
volcke, Sollen sie zu kom(m)en in vnser keÿsserthums, vnd wiederumb zu rücke zihen freÿwilligk
mit allen zeügen,
Nach diessem vnnserem Geleitsbrieff, Geschrieben in vnser keÿsserthums Hoffe der Stadt
Moskiwa, Im Jare von Schaffunge der welt, 7079. Julij Indicta 14. vnser herschafft
im. 36. vnd rüssischenn keÿsserthums im. 23. kasanischen im. 18. Astrachanischen im. 16.