Wir, Rudolff der Annder von Gottes genaden Erwelter Romischer Kaiser zu allen Zei
ten Mehrer des Reichs In Germania zu Hungern Behaimb Dalmatien Croatien rc. Khunig Ertzhertzog zu Osterreich Hertzog zu Burgundi Marggraff zu Mahrern Hertzog zu Lutzenburg vnd In Slesien Marggraff
zu Laußitz rc. Bekhennen hiemit offentlich vnd thuen khundt gegen allermennigclich Als noch weilennndt der Allerdurchleuchtigist Großmechtigist furst vnd herr herr ferdinandt Romi
scher Kaiser auch zu Hungern vnd Behaimb rc. Khunig rc vnnserr geliebiester Ahnherr hochloblichister vnnd seeligister gedechtnus, verruckhtes ZwayvndSechtzigisten Jahrs In krafft vnnd nach ausweisung dersel
ben fundation vnnd Guldenen Bullen, so Irer Kay: Matt: rc vnnd lieb den Wierdigen Gelerten vnnserrn Andächtigen vnnd lieben getreuen N: Rectori vnnd Collegio der societet JESV bey Sanct Clementen allhie
zu Prag aus sonndern Kaiserlichen gnaden zuekhommen lassen, neben anderm statuirt vnd verordnet, das dasselbe Collegium zu deßo bessern vnderhalt, auf des Closters vnnd Stiffts Jöbin Guettern In vnnserm
Marggrafftumb Oberlaußitz gelegen, Ein Tausent vnnd vierhundert Taller Järlichen vnnd Jedes beids vnder auf zween vnnderschiedliche Termin (wie die in der fundation benennet worden sein) In khünfftige ewige
Zeit haben vnnd empfahen solte, Vnd aber vber diß der auch Allerdurchleuchtigist Großmechtigist furst vnnd herr H: Maximilian Romischer Kaiser auch zu Hungern vnnd Behaimb Khunig, vnnser geliebti
ster herr vnd Vatter gleichfalls hochloblichister gedechtnus, den Ersamen vnsern lieben getreuen Di: Burgermaister vnnd Rathmannen der Statt Zittaw, hernacher angeregte Jöbinische Guetter khäufflichen
zuekhommen lassen, So wol wir selbs mit erwehnnten Rathmannen der Stadt Zittaw dißfals allerlay tractationes vnd handlungen gepflogen vnnd ins werckh gestellet haben, Dannenhero die gedachte
samblung des Collegij societatis JESV allhie besorge getragen, es möchte soliche abhandlung Inen in khünfftig praiudicirlichen sein auch von denselben wegen Ir angebürnus von denen von der Zittaw Inen
vorinthalten, oder doch aufs wenigist disputierlich gemacht wollen werden, Darumben sy auch vns alles vleis angelangt vnnd gebetten haben, Sy hierinnen zu assecurirn, so wol vmb khünfftiger
mehrer sicherhait vnd richtigkeit auch vnverhinderlicher einbringung willen, des Jenigen so Inen an diesen Vierzehenhundert Tallern vberkhurtz oder lang ausstehen oder Restirn möcht, baide vnnsere
offene vnnd verschlossene befelch an Jetzige vnnd khünfftige vnnsere Landtuogte des Marggrafftumbs Oberlaußitz aus Kaiserlicher huldt vnnd gnaden mitzutailen, Wir auch gnedigist
wargenommen vnnd betracht haben, den steten vnaufhörlichen vleis auch mühe vnnd embßigkait, so angeregtes Collegium der societet JESV mit fortpflantzung der Catholischen Religion bey Tag
vnnd Nacht vnuerdrossen anwenden, dasselbe auch hinfüro wol thun khunnen sollen vnnd mugen, So haben wir vns so uiel weniger bedencken gehabt, In soliche Ire de
mutige auch aller billigkhait gemese bitt vnnd begeren In gnaden Zübewilligen, Bewilligen vnd Consentirn dannach in gedachte des Collegij der societet JESV zimbliche
vnd billiche anliegen, Als Behaimischer Khunigclicher macht vnnd volkhommenhait, vnnd als Marggraff In Oberlaußitz, mit vorgehabtem vnnsers Edlen Raths vnnd Obristen Officier der Cron Be
haimb Rath hiemit, In krafft dis Brieffs, Also vnd dergestalt, das vielgedachtes Collegium der Societet JESV allhie bey Sanct Clementen, vermug vnnd nach ausweisung Irer fundation, oben
vermelter Vierzehenhundert Taller auf die In der fundation benenten Termin Järlichen vnd Jeder derselben besonnder, Im guetter gangbarer Lanndeswärung, auch Inen dem Collegio angenemmen müntz
ohn alle Irrnus vnd vncosten vergnüget vnd Contentirt werden sollen, Da sichs aber in khünfftigen zeitten züetragen vnd begeben wurde, das erwehntes Collegium der Societet
JESV allhie von den Rathmannen der Stadt Zittaw, als gegenwertigen, oder auch anndern khünfftigen Innhabern der Jöbinischen Guetter, wes Standts oder Würden die sein mochten, solicher Vierze
henhundert Taller zu den gesetzten Terminen nicht befriedigt, Sonndern Inen dasselbe Im was wegs das beschehen möchte, vorinthalten wurde wollen, oder auch sich sonnsten mit diesen Jöbinischen
Guettern veranderungen züetragen wolten, So gebietten wir vor vnns vnd vnsere nachkhommende Khunige zu Behaimb vnnd Marggrafen In Oberlaußitz hiemit vnnsern Jetzigen
vnnd khünfftigen Landtuogten daselbs ernstlichen vnnd wöllen, das Sy Landtuogt, sambt Iren Ambtsverwaltern, welche Jederzeit sein werden, wann vnd so offt das vielgedachte Collegium oder Ire
vollmechtige vor Inen Landtuogten oder Iren Ambtsverwaltern klaghaft aus diesen vnnserm offenen befelch furdringen werden, Inen allwege schuldig vnnd verpflichtt sein sollen, nach ausweisung
der Marggrafftumbs Oberlaußitz Priuilegien, Statuten auch Recht vnnd Gerechtigkhaitten, durch Iren Hofrichter vnd andere Ine zuegeordente gerichts Personen vielgemeltem Collegio In einer khurt
zen zeit vnnd aufs lengst In Sechszehen feldt zu solchem außstandt Inuerhelffen vnd dasselbe ohne alle verwaigerung oder aufschub, wie das Immer erdacht werden möcht, Inn alle vnnd Jede des Stiffts
vnd Closters Jöbin Guetter dörffer auch ein vnnd zuegehörungen, wie die benent werden mugen, derselben nach Irem besten nutz vnnd gefallen Inzueuessen, zügebrauchen, Ire knecht anndern züuberge
ben auch damit so lang biß Inen der außstandt sambt aufgeloffenen schaden vnd vncosten volligclichen vnnd zu Irem gueten benuegen baar vberentrichtet wirdet, züthun vnd zulassen, wie in
solchem fall vblichen vnd breuchlichen ist, Vnd also allenthalben sy des alles mit Recht erkhannen, vnd an sich gebracht einzufueren, mit weniger auch Sy dabey tragenden Ambts halber vnwaiger
lichen züschützen vnnd handtzühaben, Als lieb Inen sey vnnser vnd vnser nachkhommen schwere straff vnd vngnade züuermeiden, Daran thuen wir ernstlich zu Vrkhundt des sigelt mit vnnserm
Kaiserlichen Secret Insigel, Geben auf vnnserm Khunigclichen Schloß Prag den Ersten Tag des Monats Aprilis, Nach Christi vnnsers lieben herrn vnd Hailanndts Geburt Im funffzehenhundert