Wir Albrecht von gots gnaden Marggraffe zu Branden=
burg vnnd burggraue zu nurnberg, Bekennen vnd
thuen kund offentlich mit dem brieffe gen aller=
menniglich die Jne sehen horen oder lesen, als von
solicher vorderung vnnd ansprache wegen, So der durch=
leuchtig furste vnser lieber her vnnd swager here
Jorg konig zu Behaim, Marggraue zu mehren der slesi=
en vnd zu lutzenburg hertzog, Marggraue zu lausitz,
zu dem hochgebornen fursten vnsern lieben swager
heren fridrichen des heiligen Romischen Reichs Ertzmar=
schalck vnnd churfurste, vnnd hern wilhelmen gebru=
dern hertzogen zu sachsen, als landgrauen zu dorin=
gen vnnd Marggrauen zu Meissen, vnd Jren vorfaren
soliger gedechtnus etlich schlos vnd stett halb, die crone
zu Behaim berurende hat, vnd widerumb auch dieselben
vnsere liebe swager von sachsen als landgrauen zu
doringen vnd Marggrauen zu Meissen, Ansprach zu dem
obgedachten vnserm lieben heren vnnd swager, dem
konig, seinen vorfaren konigen auch seligen vnd lob=
licher gedechtnus, vnd der cron zu Behaim haben von
vorderunge spruche vnd etlicher gelt schulde wegen, nach
Jnhaldt versigelter brieffe daruber sagende Welche
vorderunge vnd ansprach, zwischen baiden obgenanten parthei=
eien vnd Jren vorfaren etlich vil manche Jare vnd zeitte