RVDOLPHVS
SECVNDVS DIVINA FAVENTE CLEMENTIA
Electus Romanorum Imperator, semper Augustus, ac Germaniæ, Hungariæ, Boemiæ, Dalmatiæ, Croatiæ, Sclauoniæ Rex etc(etera) Archidux Austriæ, Dux Burgundiæ, Brabantiæ, Stiriæ, Carinthiæ, Carniolæ, Marchio Morauiæ, Lucemburgiæ, supe=
rioris et inferioris Silesiæ, Virtembergæ et Teckæ Dux, Princeps Sueuiæ, Comes Habspurgi, Tirolis, Feretis, Kiburgi et Goritiæ, Landgrauius Alsatiæ, Marchio Sacri Romani Imperij, Burgouiæ ac superioris ac inferioris Lusatiæ, Dominus Mar=
chiæ Sclauonicæ, Portus Naonis et Salinarum, etc(etera) NOTVM facimus tenore præsentium, vniuersis et singulis ad quos præsentes litteræ nostræ peruenerint. CVM Imperatores, Reges et Principes inter alias sublimes solicitudines, non
modo gloriæ nominis sui splendori consulere, salutique subditorum maturo consilio et armis prospicere: Verum etiam ad æternæ vitæ patriam ac domicilium mentem quandoque arrigere, statum spiritualem, Dei Basilicas, monasteria ac Collegia, eo=
rum gubernatores, cultores (præcipuè autem quos præter pietatem, multaque virtutum merita, in sedula iuuentutis tam morum Christianorum quàm omnis generis litterarum, diligenti institutione habendarumque ad populum concionum,
assiduitate, zelo et fide insudare: multorum fide dignorum relatione atque quotidianis experimentis edocti sumus) cum fundationibus, priuilegijs, libertatibus ac immunitatibus ipsorum in Dei opt(imi) max(imi) honorem et communem reipublicæ vtilitatem
pro officio pij Christianique Principis clementer defendere, manu tenere, deseruentiumque in eisdem Ecclesijs et in Collegijs imperitam pubem, docentium commodum, vtilitatem, profectum, benignè conseruare deceat, Maiestatique nostræ Imperiali Genero=
sus et Magnificus Adamus Baro de et in Noua Domo, Fraunberck, Tolesio et Polna, Consiliarius et Cubicularius noster atque supremus Regni Boemiæ Burggrauius, syncerè nobis dilectus humillimè exposui fecerit, qualiter clero almæ Societatis
JESV, in Ciuitate dominij sui Noua Domo, Collegium templumque erexerit, eidemque Collegio de certis annuis censibus ac redditibus alijsque libertatibus ius dominij sui concernentibus per Instrumentum publicum prouiderit: suppli=
citer petens, ut omnia et singula, quæ in dicto instrumento continentur, gratia nostra Cæsarea, Imperiali, et tanquam Rex Boemiæ, nec non omnia et singula illorum priuilegia, iura, indulta, libertates, gratias, census, possessiones da=
ta, concessa, attributa, datas, concessas et attributas, approbare, innouare, ratificare et confirmare ac perpetuò valitura corroborare, in ipsasque Regni nostri Boemiæ tabulas inferenda dignaremur. NOS itaque, pijs prædecessorum
nostrorum uestigijs inhærentes, iustis et rationi consonis precibus permoti, non per errorem aut improuidè, sed animo deliberato, sano Procerum, Baronum et aliorum fidelium nostrorum ad id accedentè consilio, de certa nostra
scientia, authoritate Imperiali, et tanquam Rex Boemiæ, Collegium Societatis JESV et fundationem eius in Ciuitate Noua Domo situm, atque omnia et singula ipsorum priuilegia, iura, indulta, libertates, gratias, immunitates, cen=
sus et possessiones ipsis clero almæ Societatis JESV, eorumque alumnis ac studiosis eiusdem Collegij, à supranominato Adamo de Noua Domo dilecto fideli nostro, data, concessa, et attributa, datas, concessas et attributas in omnibus
eorum punctis, clausulis, sententijs et tenoribus (ac si præsentibus de uerbo ad uerbum totaliter inserta sint siue forent) approbauimus, ratificauimus, innouauimus, clementer concessimus et confirmauimus: ac approbamus, ratifica=
mus, innouamus, de nouo concedimus, atque tenore præsentium confirmamus, decernimusque Imperiali et Regio Boemiæ nostro edicto firmissimè ac constituimus omnia et singula in eisdem contenta, plenum, firmum et inuiolabile
robur, futuris temporibus obtinere. Rogantes atque obsecrantes successores, posterosque nostros futuros Reges Boemiæ, ut eiusmodi fundationem, erectionem præfati Collegij Societatis JESV in Noua Domo, eiusque dotationem à dilecto
fideli nostro Adamo Barone de Noua Domo (ob eius præclara et indefessa erga nos, prædecessoresque nostros honorandissimæ memoriæ Augustiss(imos) Rom(anorum) Impp(eratores) et Sereniss(imos) Reges Boemiæ: tum etiam excelsissimam Domum nostram Au=
striacam omni tempore præstita studia et seruitia) factam, eiusque hanc nostram confirmationem, non solùm ratam habere, sed et manu tenere ac defendere dignentur, quo memorata fundatio effectum suum et executionem in
solido semper habeat ac consequatur. Volentes vt sæpedictus clerus almæ Societatis JESV et eorum alumni in dicto Collegio degentes, vna cum eius studiosis memoratis, iuribus vti et gaudere liberè possint et valeant: Im=
pedimentis quibuscunque non obstantibus gratiosè mandantes tenore præsentium dilectis fidelibus nostris, maioribus et minoribus, tabularum Regni nostri Officialibus, ac reliquis incolis, ut clerum almæ Societatis JESV, cum
suis alumnis ac studiosis, super his omnibus, à nemine molestare permittentes, protegant: simulque decernimus, quandocunque aut ipse dilectus fidelis noster Adamus de Noua Domo uel ipsi Patres Societatis, id expetierint,
ut tam ipsa ab illo facta fundatio, siue fundationis instrumentum, quàm hæc nostra confirmatio, tabulis Regni nostri Boemiæ inseribantur. Nulli ergo hominum liceat hanc nostræ concessionis, approbationis, ratifi=
cationis, innouationis, et confirmationis paginam sub indignatione nostra grauissima uiolare uel infringere, aut ei quouis ausu temerario contraire, In quorum omnium fidem has litteras Sigilli nostri Cæsarei apensione
iussimus communiri. Datis ex Regali nostra Praga Vigesima quinta die Mensis Septembris, Anno à partu Virginis Millesimo quingentesimononagesimo sexto Regnorum nostrorum.
Ad mandatum Sacræ Cæs(areæ)
Ma(ies)t(a)tis proprium
J. Haffnerus