Wir Iorg von gotes gnadn kunig zu Behem Marggraue zu Merhern Herczog zu Luczemburg vnd In Slesien vnd Marg
graue zu Lusa(cz) (etc.) Bekenn fur vnns vnnser erben vnd nachkomen kunig der Crone zu Behem vnd tun kunt offenlich an
diesem brieue vor allen die In sehen oder horen lesen Wann wir den Edellen vnnsn liebn getreuen Mathes Slicken von Lazan
vnd Wenczeln seim brudr herrn zur Weysskirchen von solher Irer erblicher abtrettung des Sloss Neydeck vnd seinen zugehorungn
vnd aller guter wegn So sy vnns zu vnnserm willen vnd wolgefallen auf vnnser begeren gutlich abgestandn vnd wir das mit
seim zugehorung vnd allen gutern zu vnnserm Sloss Elbogen dabey zu beleyben vnd des darzu zugebrauchn geslagen
haben Derselben Mathe(s) vnd Wenczeln vnd Iren Erben vnd Erbne(m)en rechter redlicher schuld schuldig worden sein zwey
Tausent gulden Remisch guter vnd gemein lanndswerung dieselben zweytausent gulden Remisch wir In auf vnnser Sloss
Stat vnd lannd Elbog(n) zu der Sum die sie vor In andern vnnsrn vorfarn vnd vnnsern brieue dorauf habn genediglich geslagn
haben vnd slahen In die dorauf redlich vnd rechte mit gute(m) Rate vnnser getreuen vnd wissentlich In Crafst dicz brieues
vnd von kuniglicher macht zu Behem(n) Also das die egenaten Mathes vnd Wenczel Ir Erben vnd Erbneme oder wer
den brieue mit Irem gut(n) willen Innhab der genant(n) Sloss Stat vnd lanndes Elenbog(n) nicht abtrettn sollen wir oder
vnnser nachkume kunig zu Behem(n) haben In dan solich zwaytausent gulden mitsampt der Hauptsum die sie vor auf
dem Elbog(n) habn gancz vnd gar aufgericht vnd bezalt vnd an sulcher bezalug Sol In nicht hindern keyn enthaldunge
oder einrede wie vnd In wicherma(ss) die geschehn mocht das In Irrunge oder aufschlag an Irer bezalug mocht breing(n) alle ge
uerde vnd argelist hirin ganczlich aufgeslossen Mit vrkunde dicz briefs versigelt mit vnnserm kuniglichen anhangenden
Insigel Geben zu Prag am Sonabent nach der heylign Ailftausent Mayde tag Nach Cristi vnnssrs liebn herrn ge
purt Vierzcehenhundert vnd dornach In dem zweyvndsechczigsten vnnssrs Reichs Im fufften Iare
Ad mandatum
d(omi)ni Regis