Wir der Rom: Kay: Auch zu Hungarn vnd Behem (et)c: Khun: Mai(esta)t: vnsers Allergnedigisten Herrn ver
ordneter President vnd CamerRäht Im Khunigreich Behem, Bekhennen hiemit offentlich vor Jedermenniglich, das sies N. vnd N. die Erbrichter vnd freypaurn, so priuilegirt vnd aini hunderer Standt Inn
der Grafschafft Glatz sindt, Auff Jrer Mai(esta)ts dahin verordneten Commissarij, mit Jnen Jüngst gepflogner Vnderhandlung gegen den Edlen, Gestrengen vnd Ehrnuesten Hainrichen Stillfriedt von Ratnitz auf NeuRoda
sambt seinen Fünff Söhnen, vnd Sechs angebottnen vom Adel alß: Georgen Tchor zu Neudorf, Hannsen Vllersdorff zu Vllersdorff, Christoffen Vllersdorff zu Vllersdorff, Georgen Donigkh zum Schlegel, Donat Donigkh
zu Vlrichs Steine, vnd Friderichen Ratisir zu Baingendorff, Vnd dann dem Ehrnuesten vnd hochgelerten Valentin Franckh aus Raititz vnd Bolmsdorff der Rechten Doctor, Jrer Kay: Mai(esta)ts Raht vmb zehentausent Taler Conra
den Adelsbach von dambsdorff vmb fünffzehenhundert Taler, Christoffen Hotschaw Matsch genandt von Zegersdorff vmb aintausent Taler, Hainrichen von Zeneuitz vnd Rengersdorff aus Albendorff vmb aintausent
Taler, Friderichen Walditz von Wernersdorff vmb Sechshundert Taler, Melchiorn Donigkh von Stanitz zur Wutzel taina vmb Vierhundert Taler, Hainrichen Zeisewitz von vnd zu Ziesewitz vmb fünffhundert Taler,
Dann auch gegen den Edlen vnd Thugendtsamben frawen Anna gebornen Rudin weilandt Melchior Bärgewitz nachgelassenen Wittib vmb dreytausent fünffhundert Taler, vnd Anna gebornen Walditzin, auch weilandt Wenzl
Büschnerß hinderlassenen Wittib vmb dreyzehenhundert Taler, Vnd also vmb Neuntzehentausent Achthundert Taler, so Sy Jrer Mai(esta)t zu gegenwertigen Kriegsnoturfften wider den Erbfeindt den Türggen, vnd Rettung All
gemainer Christenheit auf drey Jhar lang, von Jtzo Michaëlis tag anzeraiten, vermüg gefertigter Verschreibungen, treuherzig dargelihen, die Pürgschafft gehorsambist eingelassen, Welches Jre Mai(esta)t zu Allergnedigistem
gefallen angenomben, Vnd Jnen darüeber gnuegsambe Schadlos verschreibung außgericht haben, Dieweil dann obgedachter Herren Commissarij abhandlung, auch beyde, der Behm: Vnd Behemisch Camer Neben Schadlos
brieff besagt Also haben Wir zu Jrer der Erbrichter vnd freypaurn, destomehrer versicherung, auch volziehung der Herren Commissarij abhandlung Jnen ferner auch zugesagt vnd versprochen, Zu thuen vnd versprechen
Jnen auch hiemit in Crafft diß Vnsers Brieffs, Das Wir sambt wolermelter Behm Camer nach außgang der dreyer Jhar, bey hochstgedachter Kay: Mai(esta)t darob sein, auch die mügliche befürder: vnd versehung thuen wellen,
das Sy die Erbrichter, freypauren vnd Jre Erben gegen angezeigten darleihern, solcher Pürgschafft der Neuntzehentausent Acht hundert Taler halben, gäntzlich schadlos gehalten, vnd vertretten werden, Auch solche Pürgschafft
Jnen, Jren Erben vnd Nachkhomben, an Jren freyheiten, gerechtigkheiten vnd Rechten, ohne ainige gefahr, schaden vnd nachtheil sein soll, treulich vnd ohne gefehrde. Zu Vrkundt haben Wir obgemelter Behemischer Camer
President vnd Räth, Vnsere angeborne Innsigel wissentlich hierauf gedruckht, Vnd auch mit aignen handen vndershriben. Actum Prag am Tage Michaëlis Anno, Ein Tausentsechshundert vnd aindens.